Nius i Kam Long Olgeta Hap
Inap 17 pesen bilong ol pikinini long Brasil husat i gat 10 i go 13 krismas i save buli long narapela na sampela i save karim hevi long dispela pasin.—O ESTADO DE SÃO PAULO, BRASIL.
Hai blut presa, gris kolestrol long blut i antap tumas, kidni ston, na hevi long waitlewa, em ol sik nau i painim ol pikinini i no winim yet 12-pela krismas. Wanem as bilong dispela? Ol i sindaun planti tumas, ol i kisim rabis kaikai, na ol i pat tumas.—ABC, SPEN.
Pe bilong lukautim wanpela pikinini i bon long Amerika long 2008 insait long famili i gat gutpela sindaun liklik, em i antap tru. Pe bilong lukautim em i go inap long taim em i gat 18 krismas em “K642,434 (K846,848 taim pe bilong ol samting i go antap).” Tok bilong wanpela dipatmen bilong gavman.—DIPATMEN BILONG LAIN DIDIMAN BILONG AMERIKA.
Ol i Lusim Tingting Long Pasin Bilong Pilai
Wanpela ripot i tok, inap 20 pesen bilong ol papamama long Briten i lusim tingting long “pasin bilong pilai wantaim ol pikinini bilong ol.” Inap 33 pesen bilong ol papamama i tok olsem ol i les long pilai, na ol arapela i no gat taim o ol i no save wanem kain pilai ol bai mekim. Profesa Tanya Byron i tok: “I gat 4-pela samting inap helpim papamama na ol pikinini long pilai gut wantaim. Taim ol i pilai wantaim, ol pikinini bai lainim ol nupela samting, wokim ol samting, lainim ol gutpela pasin, na toktok gut wantaim ol narapela.” Long olgeta 3-pela 3-pela papamama, wanpela i save pilai ol kompiuta gem wantaim ol pikinini bilong ol, tasol planti bilong ol dispela pikinini i laik bai ol yet i ken pilai ol dispela gem. Planti pikinini i gat 5 i go inap 15 krismas i laik pilai spot o pilai kas samting wantaim papamama.
Ritim Stori Long Pikinini
Wanpela lain i kamapim program long Intenet we ol i helpim ol papa husat i bisi tumas long ritim stori long pikinini taim em i slip. Niuspepa bilong Sydney, (Daily Telegraph) i tok, “Dispela program i rekodim nek bilong papa i ritim stori, na i putim musik na pairap bilong ol samting tu insait long dispela rekoding. Bihain ol i salim long E-meil i go long pikinini. Tasol sampela saveman i gat tupela tingting long dispela samting. Dokta Richard Fletcher, i wok long Newcastle University, bilong Australia na i save skelim ol samting bilong famili, i tok: “Pasin bilong rit i helpim famili long pas gut moa wantaim.” Olsem, papa i mekim ol samting wantaim pikinini, holim em, na lap wantaim em. Fletcher i tok, E-meil i no inap kisim ples bilong papa long sindaun wantaim pikinini na rit long em.