Rot Bilong Abrusim Pasin Bilong Tromoi Planti Mani

Tru ol edvetaismen samting i putim presa long yumi long baim ol samting, tasol laik na pasin bilong yumi yet tu inap mekim na yumi tromoi planti mani. Dispela em 6-pela rot bilong helpim yumi long abrusim pasin bilong tromoi planti mani.

Sakim pasin bilong baim nating samting. Yu save amamas long raun baim samting na nau yu painim ol samting em pe bilong ol i daun moa? Nogut dispela i mekim na yu laik baim nating samting. Bilong abrusim dispela pasin, stap isi na tingim ol hatwok bilong baim, yusim, na lukautim gut dispela samting yu tingting long baim. Stop na tingim ol samting em bipo yu no bin tingting gut na baim nating na bihain yu bin rigret long en. Lusim sampela haptaim long skelim gut tingting paslain long yu mekim disisen bilong baim samting.
No ken baim tasol ol samting bilong mekim yu pilim gut. Pasin bilong raun na baim samting inap mekim yu pilim gut inap sotpela taim. Tasol taim yu bel hevi gen, ating bai yu laik tromoi planti mani moa bilong pinisim bel hevi bilong yu. Bilong mekim yu pilim gut, no ken baim ol samting, i gutpela yu go lukim ol gutpela pren o go wokabaut.
No ken baim ol samting bilong kisim amamas tasol. Long nau ol bikpela stua i no ples bilong baim samting tasol, em i kamap ples bilong amamas tu. Maski yu go raun long stua o sekim ol samting long Intenet bilong kisim amamas, planti samting yu lukim i bilong kirapim laik bilong yu long baim samting. Go raun long stua long taim yu tingting long baim wanpela samting stret, na baim tasol samting yu nidim.
Makim gut ol pren bilong yu. Pasin na toktok bilong ol pren bilong yu inap kirapim laik bilong yu long baim samting. Sapos yu tromoi planti mani bambai yu ken pilim olsem yu wankain olsem ol pren bilong yu, orait makim ol pren husat i no save tingim tumas mani na ol kago samting.
Bihainim savetingting taim yu yusim benk kat. Taim yu save olsem yu gat mani i stap long benk, yu save yusim kat nating nating bilong baim olgeta liklik samting na nau yu luksave olsem yu no gat mani bilong baim ol bikpela samting olsem kaikai na ol bil samting. Na tu, yu mas save long hamas teks na ol fi samting em benk i save rausim long akaun bilong yu taim yu yusim kat long baim samting, dispela bai helpim yu long bihainim savetingting taim yu yusim benk kat.
Save long hamas mani yu gat. Em i isi long tromoi nating planti mani sapos yu no save long hamas mani yu gat. Oltaim raitim hamas mani yu tromoi na bai yu ken save long hamas mani i stap yet. Wokim wanpela baset long hamas mani yu save kisim na hamas mani yu save tromoi. Raitim hamas mani yu tromoi na skelim dispela wantaim baset bilong yu. Askim wanpela gutpela pren long helpim yu kliagut long sampela samting yu no kliagut long en long sait bilong mani.

Was Gut Long Ol Pikinini na Bai Ol i No Ken Baim Planti Samting

Ol man bilong edvetaisim samting i save laik pulim tingting bilong ol pikinini. Ol yangpela long nau i save tromoi planti mani moa bilong baim ol samting winim olgeta taim bipo. Long Amerika, ol tineja i save tromoi planti bilion dola long olgeta wan wan yia.

Tasol savemeri Juliet Schor i tok, ol pikinini em ol i insait tumas long pasin bilong baim ol samting, ol i save bel hevi na wari, na ol i no gat gutpela pasin pren wantaim papamama bilong ol. Olsem wanem yu inap was gut long ol pikinini bilong yu? Tingim samting sampela papamama i bin mekim bilong was gut long pikinini bilong ol.

SKULIM OL: “Yu no inap helpim ol pikinini long abrusim edvetaismen bikos edvetaismen i stap long olgeta hap. Olsem na mipela i tokim tupela pikinini meri bilong mipela olsem ol man bilong edvetaisim samting i tingting long helpim ol yet tasol na ol kampani i haiarim ol i laik kisim mani. Ol i no gat tingting liklik long helpim yumi.”—James na Jessica.

BOSIM GUT OL: “Ol pikinini i laikim wanpela samting, ol bai strong strong i go inap long yu baim dispela samting. Tasol em bikpela samting long yu no ken tru bihainim laik bilong ol. Bihain bai ol i lain olsem ol i no inap kisim olgeta samting ol i laikim. Taim mipela i mekim bikpela long pikinini meri bilong mipela, planti taim mipela papamama yet i toktok long pasin bilong holim stretpela tingting na kisim ol samting inap tasol long skel.”—Scott na Kelli.

NO KEN LARIM OL I LUKIM PLANTI EDVETAISMEN: “Famili bilong mipela i no save lukim tumas televisen. Em i no pasin bilong famili bilong mipela. Dispela haptaim mipela inap lusim bilong lukim TV em mipela i save yusim bilong mekim ol narapela samting. Mipela i save kuk, na kaikai wantaim, na ol pikinini man bilong mipela i save amamas tru long ritim ol buk.”—John na Jenniffer.