OL KANTRI NA OL MANMERI
Visitim Panama
PLANTI man i save long Panama bikos long Panama Canal, em wanpela traipela baret i bungim solwara Atlantik na solwara Pasifik wantaim. Dispela baret i bungim Not na Saut Amerika wantaim na long dispela rot i gat kain kain man i sindaun long Panama. Em ol manmeri bilong narapela narapela lain na kalsa. Planti manmeri tru em ol i hapkas Panama na Yurop.
YU SAVE LONG DISPELA? Rokrok bilong Panama i gat gol kala (Atelopus zeteki), em i save meknaisim bel na tupela baksait lek bilong en bilong pulim ai bilong meri rokrok na bilong pretim ol birua bilong en.
Long yia 1501, ol man bilong Spen i raun i kam long Panama na ol i painimaut olsem i gat planti ol asples lain i gat kain kain sindaun long dispela hap, na sampela bilong ol i stap yet long nau. Wanpela bilong ol em lain Guna (bipo ol i kolim Kuna). Planti man bilong lain Guna i sindaun long asples bilong ol long hap bilong ol ailan San Blas na long nambis bilong solwara Pasifik klostu long boda bilong Panama na Kolambia. Long dispela hap, ol i save painim animal long bikbus, kisim pis long ol kanu ol yet i wokim, na wokim gaden.
Pasin bilong lain Guna em olsem, taim man i marit em i save go stap wantaim famili bilong meri bilong em na mekim wok bilong helpim ol. Bihain sapos meri bilong em i karim pikinini meri, orait em bai kisim famili bilong em na i go statim nupela sindaun bilong ol yet.
I gat 300 kongrigesen bilong ol Witnes Bilong Jehova long Panama. Ol i save mekim ol miting long tok Spen, tok Saina, tok Inglis, tok Gujarati, tok Guna, tok Kriol Bilong Haiti, tok Ngabere, na tokples sain bilong Panama.