Yau Bilong Grasopa Katydid i Save Harim Gut Ol Saun

GRASOPA Katydid (Copiphora gorgonensis) bilong Saut Amerika i gat tupela yau em ol i liklik na sais bilong ol em aninit long 1 milimita, tasol ol i save wok wankain olsem yau bilong ol man. Dispela grasopa inap harim na save long saun bilong ol samting i stap longwe tru. Olsem, em inap save long wanem em krai bilong wanpela katydid, na wanem em krai bilong wanpela blakbokis i painim abus.

Tingim: Yau bilong katydid i stap long tupela fran lek bilong en. Em i wok wankain olsem yau bilong ol man, yau bilong katydid inap harim ol nois, skelim, na save em nois bilong wanem samting na i kam long wanem hap. Tasol ol saientis i painimaut olsem insait long yau bilong katydid i gat wanpela kain samting olsem blista. Wok bilong dispela blista i wankain olsem wok bilong wanpela kain samting olsem koil (cochlea) i save stap insait long yau bilong ol man, tasol dispela blista em i liklik tru. Dispela samting olsem blista i helpim katydid long harim gut ol saun.

Profesa Daniel Robert bilong University of Bristol’s School of Biological Sciences long Yunaitet Kingdom i tok, dispela save bai helpim ol ensinia long “wokim ol liklik masin tru bilong helpim man long harim gut tok, winim ol kain masin i bin stap bipo.” Na tu, ol saveman i ting dispela bai helpim wok bilong kamapim ol nupela teknoloji olsem altrasaun masin samting, na ol X-rei na sken masin samting bilong haus sik.

Yu ting wanem? Yau bilong grasopa katydid inap harim gut ol saun, i kamap long rot bilong evolusen? O wanpela i bin wokim?