Lukim Ol Gutpela Pasin Bilong Ol Narapela

Hevi

Pasin hambak inap kirapim yumi long luk daun long narapela lain. Man i save hambak em i save mekim ol tok i apim nem bilong em yet. Em i tingim em yet i winim ol narapela na skelim ol man i no wankain long em olsem ol i samting nating. Planti man inap kisim kain tingting. Buk Encyclopædia Britannica i tok: “Planti lain [bilong kain kain kalsa] i ting olsem sindaun bilong ol, kaikai, klos, pasin, bilip, tingting bilong ol, na ol narapela samting, i nambawan winim ol narapela.” Hau bai yumi sakim ol dispela kain tingting kranki?

Stiatok Bilong Baibel

“Yupela i mas daunim yupela yet na tingim olsem ol arapela i winim yupela.”—FILIPAI 2:3.

Dispela i makim wanem samting? Bilong sakim pasin hambak, yumi mas kisim narapela pasin—pasin daun. Pasin daun i helpim yumi long luksave olsem long sampela samting, ol narapela i winim yumi. No gat wanpela lain i gat olgeta gutpela pasin na inap mekim gut olgeta samting.

Tingim eksampel bilong Stefan. Em i go bikpela long Komiunis kantri, tasol em i daunim pasin bilong bel nogut long ol man i no bilong ol Komiunis kantri. Em i tok: “Mi bilip olsem pasin bilong tingim ol narapela i winim yu, dispela i bikpela samting long helpim yu long rausim pasin bilong bel nogut long narapela lain. Mi no save long olgeta samting. Mi inap lainim sampela samting long olgeta man.”

Samting Yu Ken Mekim

Traim lukim gut pasin tru bilong yu yet na tingim olsem yu save popaia. Luksave olsem ol narapela i save mekim gut moa sampela samting winim yu. No ken ting olsem olgeta man bilong wanpela lain i gat wankain pasin kranki.

No ken kisim kwik tingting kranki long wanpela man bilong narapela lain, i gutpela long askim yu yet:

Luksave olsem ol narapela i save mekim gut sampela samting winim yu

‘Ol pasin we mi no laikim long dispela man tru tru ol i pasin nogut, o ol i narapela kain tasol?’
‘Ating dispela man i lukim sampela pasin kranki bilong mi?’
‘Dispela man i mekim wanem ol samting i gutpela moa winim mi?’

Sapos yu kamapim bekim tru long ol dispela askim, ating yu bai sakim pasin bilong bel nogut long narapela lain, na tu, yu inap lukim ol gutpela pasin em yu laikim long dispela man.

Wanpela Stori Tru: Nelson (Yunaitet Stets)

“Taim mi yangpela, mi bin stap planti yia long eria we bikpela populesen em ol man bilong wanpela skin kala na bekgraun. Tasol taim mi gat 19 krismas na muv i go long biktaun long wok long wanpela faktori, mi wok na stap klostu long ol man bilong kain kain skin, bekgraun, na kalsa.

“Taim mi save gut long ol wanwok bilong mi na mipela i kamap pren, mi lukim olsem skin kala, tokples, na lain, ol dispela samting i no kamapim klia pasin bilong ol long wok strong, mi inap trastim ol, o i kamapim klia pasin tru bilong ol, nogat.

“Bihain mi maritim wanpela meri bilong narapela kantri na skin kala i narapela long mi, na mi amamas long lain long ol narapela kaikai na kain kain musik we i nupela long mi. Ol samting long laip i skulim mi olsem yumi olgeta i gat ol gutpela pasin na yumi save popaia. Mi inap tok tru olsem, mi kamap gutpela man moa bikos mi laikim na bihainim ol gutpela pasin bilong ol man i no wankain long mi em ol i gat narapela skin na kalsa.”