Meri Bilong Lot i Lukluk i Go Bek

LOT na famili bilong em ol i stap wantaim Abraham long Kenan. Tasol bihain Abraham i tokim Lot: ‘Dispela hap graun i no inap long olgeta animal bilong yumi. Mobeta yu lusim mi i go long narapela hap. Sapos yu laik i go long wanpela hap, orait bai mi go long narapela hap.’

Lot i skelim graun na em i lukim wanpela gutpela hap graun i stap long hap bilong Jordan em i gat wara na gutpela gras bilong ol animal bilong em. Olsem na Lot i kisim famili na olgeta animal bilong em na ol i go sindaun long taun Sodom.

Ol manmeri bilong Sodom i save mekim pasin nogut tru. Lot i no laikim pasin bilong ol, long wanem, em i gutpela man. God tu i no laikim pasin bilong ol. Olsem na God i salim tupela ensel bilong i go toksave long Lot olsem em bai bagarapim Sodom na Gomora.

Tupela ensel i tokim Lot: ‘Hariap! Kisim meri na tupela pikinini meri bilong yu na lusim dispela taun!’ Tasol Lot na famili bilong em ol i isi tumas, olsem na tupela ensel i holim han bilong ol na bringim ol i go ausait long taun. Orait nau wanpela bilong dispela tupela ensel i tok: ‘Ranawe i go! No ken lukluk i go bek! Ran i go long ol maunten, na bai yupela i no ken bagarap.’

Lot na tupela pikinini meri bilong em ol i bihainim tok na ranawe i go. Ol i no malolo liklik na ol i no lukluk i go bek. Tasol meri bilong Lot i sakim tok. Taim ol i go longwe liklik lusim Sodom, em i sanap na lukluk i go bek. Olsem na em i tanim i kamap olsem pos sol. Yu lukim em long piksa?

Dispela samting i lainim yumi olsem: God i save helpim ol man i bihainim tok bilong em, tasol ol man i sakim tok ol bai bagarap.