No Ken Lusim Taim! Bihainim Kwik Tok

“SAPOS yu no bihainim kwik tok, bai yu lus.” Em wanpela tok bilong ol man. Na tru tumas, sapos yumi no bihainim kwik tok bilong Man bilong wokim yumi, em God Jehova, bai yumi lus.

Baibel i stori long planti man, em ol i no bihainim kwik tok bilong God o ol i sakim tok bilong God. Ol samting i bin painim ol dispela man i givim save long yumi long nau.

Lot na Meri Bilong Em

Yumi ken tingim ol samting i bin painim Lot na meri bilong em. Ol i bin i stap 3,900 samting yia bipo. Lot wantaim smolpapa bilong em, Ebram, ol i go sindaun long ples Kenan. Tasol kros i kamap namel long ol wokman bilong Lot na ol wokman bilong Ebram. Ebram na Lot i no laik bai kros i kamap bikpela, olsem na Ebram i go sindaun long narapela hap na Lot i go sindaun long narapela hap. Ebram i no tingim skin bilong em yet, em i larim Lot i makim pastaim wanem hap em i laik i go sindaun long en. Lot i lukim olgeta graun long arere bilong Wara Jodan na olgeta hap i go inap long Soa. Dispela hap graun olgeta i gat planti wara. Olsem na Lot i kisim olgeta graun long arere bilong Wara Jodan. Em i sanapim ol haus sel bilong em klostu long taun Sodom na taun Gomora. Em i tingting gut na em i go sindaun long wanpela ples em inap helpim em long i stap gutpela long skin. Tasol em i no tingim gut ol samting bilong spirit. Dispela ples inap bagarapim em long ol samting bilong spirit.

Ol manmeri bilong Sodom “ol i mekim bikpela sin tru” long ai bilong Jehova. “Olgeta man bilong taun ․․․, ol yangpela wantaim ol lapun” ol i tingting tasol long mekim ol pasin i gat sem. (Jenesis 13:13; 19:4) Lot i ting olsem wanem long pasin bilong ol dispela manmeri? Aposel Pita i tok: “Yes, dispela stretpela man em i stap namel long ol, na i lukim pasin nogut bilong ol, na long olgeta de em i harim tok nogut bilong ol. Bel bilong em i stap stret, na em i kirap nogut na bel bilong en i pen tru long pasin bilong sakim lo ol i mekim.” Ol i mekim pasin nogut tru na God i mas givim strafe long ol. Baibel i tok: “Orait Yawe i tok, ‘I gat planti tok i kamap long kain kain pasin nogut tru i stap long Sodom na Gomora.’” Ol i gat bikpela rong tru long ai bilong Jehova, olsem na Jehova i tingting pinis long bagarapim dispela tupela taun wantaim ol man nogut i stap long en. Dispela ples, em pastaim Lot i lukim olsem gutpela ples i gat planti wara, nau em i no gutpela ples bilong i stap long en.—2 Pita 2:6-8; Jenesis 18:20, 21.

Olsem wanem Lot wantaim meri pikininini bilong em ol i ken abrusim bagarap i laik painim Sodom na Gomora? Ol ensel bai bagarapim dispela tupela taun, tasol pastaim tupela ensel i go tokim Lot long ol samting em wantaim famili bilong em i mas mekim bambai ol i no ken bagarap. Ol i mas mekim wanem? Wantu ol i mas ranawe lusim dispela taun!

No Ken Lusim Taim

Orait, Lot wantaim famili bilong em ol i mekim wanem? Tok bilong ol ensel i klia. Lot i go lukim tupela man ol i bin makim tupela bilong maritim tupela pikinini meri bilong em, tasol tupela i sakim tok bilong em. Ol i ting em i tok pilai tasol. Lot i no lusim kwik ples. Em i wet pastaim. Em i no bihainim kwik tok bilong God na ranawe. Tasol dispela tupela ensel i no lusim taim. Tupela i bihainim tok bilong God. Tupela i mekim olgeta samting God i tokim tupela long mekim. “Yawe em i sori long Lot. Olsem na tupela ensel i holim han bilong em wantaim meri na tupela pikinini meri bilong en, na tupela i bringim ol i go ausait long taun.”—Jenesis 19:15, 16.

Olsem wanem? Nau Lot wantaim famili bilong em i kirap kwik na ranawe i go long ol maunten olsem God i tokim ol long mekim long maus bilong ensel? Nogat! Ating meri bilong Lot i pulim em o nogat, em yumi no save, tasol em i tokim ensel bilong Jehova em i mas sori long em na larim em i ranawe i go long wanpela taun klostu. Ensel i orait long dispela samting na ol i ranawe i go long Soa. (Jenesis 19:18-22) Meri bilong Lot i ting olsem wanem long dispela samting God i tokim em long mekim, olsem em i mas lusim haus bilong em na olgeta samting bilong em na ranawe i go sindaun long narapela hap? Em i no bilip olsem Jehova bai lukautim em. Em i gat tupela tingting olsem man bilong em, tasol bihain man bilong em i bihainim tok. Meri i no bihainim tok. Em i “lukluk i go bek, na em i kamap olsem sol na i sanap olsem wanpela pos i stap.” (Jenesis 19:26) Em i no bihainim kwik tok na em i lus.

Olsem Wanem? Ol Kristen Bilong Pastaim i Bihainim Tok?

Ol ensel i tokim Lot wantaim famili bilong em ol i mas hariap ranawe lusim ol man nogut long hap bilong ol. Na Jisas i bin givim wankain toksave long ol manmeri long taim bilong em. Em i tokim ol, bihain bai ol ami i kam banisim Jerusalem na sapos ol i no laik bagarap ol i mas ranawe i go long maunten. (Luk 21:20, 21) Nogut ol i gat tupela tingting na ol i lusim taim. Em i tokim ol: “Man i stap antap long haus i no ken i go daun bilong kisim ol samting long haus bilong en. Na man i stap long gaden, em i no ken tanim i go bek bilong kisim saket bilong en.”—Matyu 24:17, 18.

Taim ol ami bilong Rom i lusim Jerusalem long 66 C.E., ol Kristen i tingim tok bilong Jisas. Ol i harim tok bilong em na ol i bihainim tok bilong em. Kwiktaim ol i lusim Judia na ol i ranawe i go long ples maunten i stap long hapsait bilong Wara Jodan. Ol Juda i no bilip na ol Kristen i gat tupela tingting ol i sindaun i stap long Jerusalem. Ol i ting God i save lukautim dispela taun. Fopela yia bihain ol Rom i kam bek na ol i bagarapim tru Jerusalem na ol i kilim i dai planti manmeri, winim wan milion. Ol Kristen i bin bihainim tok na lusim Jerusalem, taim ol i harim tok olsem Jerusalem i bagarap pinis, ol i amamas! Ol i no lusim taim. Ol i bihainim kwik tok na ol i no bagarap.

Olsem Wanem long Nau?

Ol samting i bin painim Sodom na Gomora na Jerusalem i lainim yumi long wanem samting? Jisas i stori long bagarap i painim ol dispela ples na em i tok wankain samting bai kamap taim “Pikinini Bilong Man i kamap ples klia.” (Luk 17:28-30; 21:5-36) Ol man i save lainim tok bilong Baibel ol i skelim ol samting i bin kamap bihain long 1914, na ol i save klostu nau bai God i givim strafe long ol man i bin mekim pasin nogut. Liklik taim tasol na bai Jehova na Jisas i bagarapim olgeta man nogut.—Revelesen 19:11-21.

Dispela save i mas mekim wanem long yu? Olsem: Sapos yu tingting long kisim baptais, yu ting i gutpela sapos yu tingting long mekim dispela samting bihain biihain? Yu no ken lusim taim. Yu mas bihainim tok bilong Jisas. (Matyu 28:19, 20) Yu kisim save pinis long Jehova na long Kingdom bilong Em, olsem na sapos yu kisim baptais, bai yu inap kamapim bel bilong yu, yu amamas tru long i stap pren bilong Jehova. Sapos yu kisim baptais, i olsem yu tokaut long ai bilong ol man yu givim skin bilong yu long God bilong mekim wok bilong em.—Matyu 10:32, 33.

Ol Kristen i baptais pinis ol i mas skelim ol samting ol yet i save mekim. Ol i mas tingim meri bilong Lot. Em i no givim bel tru long God, olsem na em i lus. Em i no wokabaut long pasin bilong bilip. (Luk 17:31, 32) Ating sampela long nau tu, ol inap mekim bikpela wok moa long ol wok Kristen, tasol ol i surik long mekim. Olsem: Ating sampela ol inap mekim wok painia helpim o wok painia regula. Ol inap kisim planti blesing sapos ol i mekim dispela wok! Planti ol i kirap mekim dispela wok, na nau ol i mekim wok misineri, o ol i wok long Betel, o mekim wok olsem painia spesel o wasman sekit o wasman distrik. Ol i go insait long dispela “dua i op i stap,” na ol i amamas tru.—Revelesen 3:8.

Ol Kristen long nau ol i save ol i no ken lusim taim. Pasin nogut bilong dispela graun i laik pinis. Olsem na ol i no ken kisim tupela tingting. Oltaim ol i mas redi long harim tok na bihainim. Ol i mas tingim ol samting bihain bai kamap na ol i mas bilip long Jehova. Ol i mas bihainim pasin bilong Ebraham, em i bin bihainim kwik tok. Aposel Pol i stori long em, olsem: “God i bin tok long samting bai i kamap bihain, na Ebraham i ting long dispela na i no tubel na i lusim bilip. Nogat. Em i strong long bilip. Em i litimapim nem bilong God na i save pinis, God em inap mekim olsem bipo em i tok long mekim.”—Rom 4:20, 21.