Kristen i Mas Ting Olsem Wanem Long Mani Kago?

YU BIN kaunim namba wan pas aposel Pol i salim long Timoti? Yu bin kaunim tok em long 1 Timoti 6:6-19? Ol dispela tok i helpim yumi ol Kristen long kisim stretpela tingting long mani kago. Taim Pol i raitim pas long Timoti, Timoti i stap long ples Efesas. Planti maniman i stap long dispela taun. Ol Kristen long dispela taun ol i mas was gut, nogut ol i bihainim tingting bilong ol man. Ol dispela ves i tok: Samting yumi kisim pinis yumi mas ting em inap long yumi. Yumi no ken tingting long kisim planti samting. Ol man i gat planti samting, ol i no ken ting ol dispela samting inap helpim ol. Nogat. Yumi mas kamapim planti gutpela wok na redi long givim samting long narapela man.

Sapos man i no kisim stretpela tingting long mani kago, em bai tingting tasol long kisim planti samting, na isi isi dispela samting bai pulim em long lusim tok bilong Krais. Bai tingting bilong em i no klia, na kros bai kamap namel long em na ol brata long kongrigesen na ol manmeri bilong ausait. Ol dispela man i lusim tok i tru, “ol i bel nogut long arapela man, na ol i pait, na ol i tok bilas, na ol i tingting nogut long brata, na oltaim ol i tok kros nabaut. Kain man i save mekim olsem tingting bilong ol i kranki, na ol i no save holimpas tok i tru. Na ol i ting pasin bilong God em i rot bilong kisim kago.”—1 Timoti 6:3-5.

Sampela man ol i mekim wok long ol brata Kristen bilong ol bambai ol yet i ken kisim win mani. Ol i no givim bel tru long God, olsem na ol i no inap kisim dispela gutpela samting tru “em inap helpim yumi long dispela laip nau yumi stap long en, na long laip bai i kamap bihain tu.” Olsem na Pol i tok, “Sapos yumi gat kaikai na laplap samting, orait yumi ken tok, ‘Em inap long mi.”’—1 Timoti 4:8; 6:8.

Yu Laik Kisim Planti Samting?

Taim ol maniman i litimapim nem bilong ol, ating ol narapela i pilim olsem ol i samting nating tasol. Ating bai ol i bel nogut long maniman, na bai ol i mangalim samting bilong ol. O ating bai ol i kisim tingting kranki na bai ol i ting i no gat rong long singaut long mani na strong strong long ol i mas givim mani long ol na ol i no laik bekim. Yumi amamas, long wanem 1 Timoti 6:6-16 i helpim yumi long save bilong wanem yumi no ken laikim tumas mani na olsem wanem yumi ken abrusim dispela pasin.

◻6:6-8—Man i gat planti mani kago, em i no save stap amamas long olgeta taim. Tasol man i bihainim pasin bilong God em i save stap amamas. Yumi no ken mangalim samting bilong narapela man. Ol dispela samting i bilong nau tasol. Taim mama i karim yumi, long dispela taim yumi no gat mani samting, na taim yumi dai, bai yumi no inap karim samting bilong yumi i go wantaim yumi.

◻6:9^—“Ol man i ting long kisim planti kago” ol i kain olsem wanpela animal i pas long kalabus. Bai bel bilong ol i kirap long mekim “planti samting nogut” na bai ol i “lus na bagarap tru.”

◻6:10—“Pasin bilong laikim tumas mani em i as bilong olgeta pasin nogut.” Sampela man i tingting long kisim mani na ol i bin kilim i dai narapela man, o sakim lo bilong gavman, o stilim samting bilong narapela man, o mekim pasin pamuk, o putim narapela man long han bilong kot, o mekim tok giaman. Pasin bilong laikim tumas mani i kirapim man long mekim kain kain pasin nogut. Pasin bilong laikim tumas mani em i as bilong olgeta pasin nogut. As bilong diwai i save stap hait, na as bilong pasin nogut tu i stap hait. Olsem na sampela Kristen ol i no pilim tru ol samting nogut inap kamap sapos ol i laikim tumas mani. I no gat rong long holim mani, tasol “sampela man ol i bin laikim tumas mani, na dispela pasin i pulim ol na ol i lusim bilip pinis.” Ol i tingting long kisim planti samting, na ol i kisim planti hevi. Mani kago tasol i no inap helpim man long i stap amamas.

◻6:11-16—Ol Kristen i bihainim savepasin, ol i no tingting long kisim planti mani kago. Ol i no save mangalim samting bilong narapela man. Ol i save givim baksait long dispela pasin na ranawe. Ol i wok strong long “kisim stretpela pasin, na pasin tru bilong God, na bilip, na pasin bilong sori, na pasin bilong sanap strong na karim olgeta hevi, na pasin bilong isi long ol man.” Ol i laik “holim strong laip i stap gut oltaim oltaim.” Na ol i laik i stap gut na bai ol man i no inap tok nogut long ol na ol i laik i stap klin long ai bilong Jehova na Krais Jisas na ol wanlotu bilong ol.

Yu Wanpela Maniman?

Sampela Kristen long namba wan senseri ol i maniman. Ating papa bilong ol i gat planti mani samting na taim papa i dai, ol i kisim, o ol i mekim wok bisnis na ol i kisim. Tingim Lidia, long ples Filipai. Em i wok bisnis long laplap na kain kain marasin bilong putim kala long laplap. Ating em i kisim bikpela mani long dispela rot, long wanem ol dispela samting i gat bikpela pe bilong en. Ating Lidia em i wanpela manimeri. Tasol em i mekim wanem long dispela mani bilong em? Em i no litimapim nem bilong em yet. Em i gat pasin daun, na em i mekim gutpela pasin Kristen. Em i tingting long helpim ol narapela brata bambai ol inap mekim wok autim tok i go long narapela hap. Long nau tu i gat sampela brata sista, em ol i gat wankain tingting olsem bilong Lidia.—Aposel 16:14, 15, 40.

Long 1 Timoti 6:17-19 Pol i kamapim sampela gutpela tok bilong helpim ol manmeri, em ol i laik bihainim pasin bilong Lidia.

◻ 6:17—Baibel i tok ol maniman i no ken hambak long mani kago bilong ol; nogat. Ol i mas bihainim pasin daun. Ol i no ken ting ol i winim ol rabisman. Ol i mas bihainim pasin daun. Ol samting ol i save mekim i mas makim olsem ol i bilip tru long God inap helpim ol, na ol i no tingim mani em i nambawan samting. Sapos ol i mekim olsem, orait bai ol i no inap pundaunim ol man i no gat planti samting; ol i no ken kirapim ol narapela man long mangalim samting bilong ol. Na ol i no ken lusim tingting long dispela samting, olsem: Ol samting bilong ol em i no inap i stap oltaim, em inap bagarap wantu tasol.

◻ 6:18, 19—Mekim wok long mani kago bilong yu bilong helpim yu yet na ol narapela man long mekim wok bilong Jehova. Ol maniman i mas tingting long mekim ol wok bilong God, na ol i mas redi long helpim ol man em ol i sot tru long ol samting bilong helpim ol long i stap laip. Na ol i mas amamas wantaim olgeta brata sista long kongrigesen, ol brata sista i stap rabis tu.

Olsem na ating ol brata sista long kongrigesen, em ol i no gat planti samting ol i ken singaut long ol maniman long kongrigesen long givim samting long ol? Nogat. Long 2 Tesalonaika 3:10-12 na 1 Timoti 5:8, Baibel i tok, olgeta Kristen i mas lukautim lain bilong ol yet. Olsem na sapos man i no laik wok, na yumi givim mani long em, dispela samting i no inap helpim em. Na i wankain tu long man i tromoi nabaut mani bilong em long kain kain samting. Sapos yu givim sampela mani moa long dispela kain man, yu no helpim em. Tasol taim wanpela Kristen i sot tru, na ol wanlotu bilong em i helpim em long samting bilong skin na spirit, em gutpela samting tru. Long dispela rot, olgeta brata sista i tingting long bungim ol gutpela samting long heven na bai ol i kisim planti gutpela samting. Bai Jehova i givim planti gutpela samting bilong spirit long ol.

Olsem na long nau, yumi olgeta wan wan i mas tingim, yumi stap olsem wanem long ai bilong God na Krais. Provep 11:4 i tok: “Maski yu gat planti mani, dispela i no inap helpim yu long taim Bikpela i laik bekim rong bilong yu. Tasol sapos yu bihainim stretpela pasin, dispela bai i helpim yu na yu no ken dai kwik.” Pasin bilong dispela graun i laik pinis, olsem na yumi no ken holim strong samting bilong dispela graun. (1 Korin 7:29-31) Sakim pasin bilong laikim tumas mani kago! Taim i sotpela nau olsem na yumi no gat bikpela hap taim moa bilong kisim gutpela nem long ai bilong God. Gutpela sapos yumi tingting long bungim planti gutpela samting long heven.—Matyu 6:20.

[Piksa long pes 21]

Lidia i mekim gutpela wok long ol samting bilong em bilong helpim ol brata na wok bilong autim tok

[Rait long pes 23]

“Taim i sotpela nau,” olsem na yumi no ken “holim strong samting bilong dispela graun.”–1 Korin 7:29, 31.