Yu Stap Gut Long Ai Bilong God?
“Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.”—LUK 12:21.
1, 2. (a) Ol man i bin redi long lusim planti samting bilong ol bambai ol inap kisim wanem samting? (b) Ol Kristen i gat wok long mekim wanem, tasol ol i mas was gut long wanem samting?
LONG bipo yet i kam inap long nau, ol man long planti kantri i bin wok strong tru, long wanem, ol i laikim tumas long kisim planti mani samting. Olsem: Bihain long yia 1800, ol i painim gol long Australia, Saut Afrika, Kanada, na Amerika, na dispela i kirapim ol man long ol longwe hap na ol i lusim haus na famili bilong ol bilong go painim gol long wanpela kantri ol i no save long en na ating i no gat gutpela sindaun. Tru tumas, planti man i redi long kisim bagarap na lusim planti samting bilong ol bambai ol inap kisim ol samting ol i laikim tumas.
2 Maski klostu olgeta man long nau i no insait long wok bilong painim gol, ol i mas wok strong bilong kisim mani bilong lukautim ol yet na famili bilong ol. Wok bilong kisim mani long dispela taim nau yumi stap long en, em i hatwok na inap putim hevi long man. Sapos man i wari tumas long kaikai, klos, na ples slip, ating dispela inap mekim na nau em i no tingim tumas ol samting i bikpela samting moa. (Rom 14:17) Jisas i kamapim wanpela tok piksa i stori long dispela samting. Dispela tok piksa i stap long Luk 12:16-21.
3. Stori liklik long tok piksa bilong Jisas long Luk 12:16-21.
3 Jisas i kamapim dispela tok piksa long wankain taim em i mekim tok lukaut long pasin bilong mangal, em yumi bin stori gut long en long stadi i kamap paslain long dispela. Bihain long Jisas i tok long yumi mas klia long pasin mangal, em i stori long wanpela maniman i gat ol haus we em i bin bungim ol gutpela samting bilong em, tasol em i ting ol dispela haus i no inap, olsem na em i tingting long brukim na wokim ol bikpela bikpela haus na bai em inap bungim planti samting moa. Em i ting sapos em i mekim olsem, em bai stap malolo na amamas, tasol God i tokim em olsem em bai dai, na olgeta gutpela samting em i bin bungim i stap, narapela man bai kisim. Bilong pinisim dispela tok piksa, Jisas i tok: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.” (Luk 12:21) Yumi inap kisim wanem skul long dispela tok piksa? Olsem wanem yumi inap bihainim dispela skul long i stap bilong yumi yet?
Wanpela Man i Gat Hevi
4. Dispela man long tok piksa bilong Jisas, yumi ken ting em i wanem kain man?
4 Planti man i save long dispela tok piksa bilong Jisas. Bilong kirapim stori, Jisas i tok: “Gaden bilong wanpela maniman em i karim planti kaikai.” Jisas i no tok dispela man i bin kisim ol planti samting bilong em long rot bilong giaman o brukim lo, nogat. Na em i no tok em i wanpela man nogut. Long tok Jisas i mekim long dispela maniman, yumi inap kisim tingting olsem em i wanpela man i bin wok strong. Em i bin tingting gut na bungim ol samting bilong lukautim em yet long bihain, na ating famili bilong em tu. Olsem na yumi ken ting olsem em i man bilong wok na man bilong lukautim em yet na famili.
5. Man long tok piksa bilong Jisas i gat wanem hevi?
5 Tasol maski em i wanem kain man, Jisas i tok em i wanpela maniman, olsem em i gat planti gutpela samting pinis. Tasol olsem Jisas i tok, dispela man i gat wanpela hevi. Gaden bilong em i karim planti kaikai, winim tru ol samting em i mas i gat na ol samting em inap lukautim. I gutpela em i mekim wanem?
6. Planti wokboi bilong God long nau i mas skelim wanem ol samting?
6 Samting i bin painim dispela maniman, wankain samting i save painim planti wokboi bilong Jehova long nau. Ol trupela Kristen i save givim bel long mekim stretpela pasin long wok, na ol i wok strong, na ol i mekim gut wok. (Kolosi 3:22, 23) Maski ol i wok aninit long wanpela bos o ol i gat bisnis bilong ol yet, ol i save mekim gut wok. Taim bos i laik givim ol sampela wok i gat namba o rot i op long ol i kisim sampela wok bisnis moa, orait nau ol i mas wokim disisen. Ol bai kisim dispela nupela wok na kisim planti mani moa o nogat? Na olsem tasol, planti yangpela Witnes i save mekim gut wok long skul. Dispela inap mekim na skul i makim ol long go long bikpela skul i gat namba bilong kisim sampela save moa, na gavman bai baim skul. Ol i mas mekim wanem? Bai ol i go long dispela skul o nogat?
7. Man long tok piksa bilong Jisas i mekim wanem bilong stretim hevi bilong em?
7 Orait nau yumi ken tingim gen tok piksa bilong Jisas. Maniman i mekim wanem taim gaden bilong em i kamapim planti kaikai na em i no gat haus inap long bungim ol dispela kaikai? Em i tingting long brukim ol haus kaikai bilong em, na wokim ol bikpela bikpela haus bilong putim olgeta wit na olgeta gutpela samting bilong em. Dispela tingting i mekim na em i stap isi, na em i tingting olsem: “Bai mi tok long mi yet olsem. Man, mi win tru ya. Mi gat planti gutpela samting i stap inap long planti yia. Orait nau mi ken i stap malolo. Bai mi sindaun na mekim bikpela kaikai oltaim na amamas i stap.”—Luk 12:19.
Bilong Wanem Em “Longlong” Pasin?
8. Man long tok piksa bilong Jisas i no tingim wanem bikpela samting?
8 Tasol olsem Jisas i tok, tingting bilong dispela maniman i giamanim em; em i ting em i stap gutpela, tasol nogat. Em i ting samting em i laik mekim i gutpela, tasol i gat wanpela bikpela samting em i no tingim. Em i no tingim laik bilong God. Em i tingting long em yet tasol, long olsem wanem em i ken stap malolo, na kaikai na dring, na amamas i stap. Em i ting olsem sapos em i gat “planti gutpela samting,” orait em bai stap laip inap “planti yia.” Tasol sori tru, dispela samting i no kamap olsem em i bin tingim. I olsem Jisas i bin tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Long dispela nait stret, olgeta samting dispela man i bin wok strong long kisim ol i pinis wantu, olsem God i bin tokim em: “Yu longlong man tru. Nau long dispela nait tasol bai yu dai. Na olgeta dispela samting yu bin redim i stap, em husat bai i kisim?”—Luk 12:20.
9. I gat wanem as na God i tok dispela man long tok piksa bilong Jisas em i longlong man?
9 Orait nau yumi ken tingim bikpela astingting bilong tok piksa bilong Jisas. God i tok dispela man em i “longlong” man. Wanpela buk (Exegetical Dictionary of the New Testament) i tok, hap tok Grik ol i kisim dispela tok long en “i makim olsem man i no gat gutpela tingting.” Buk i tok, long dispela tok piksa God i yusim dispela tok bilong kamapim olsem “tingting bilong ol maniman long ol samting bilong bihain i no inap helpim tru ol.” Dispela tok “longlong” i no makim olsem man i no gat save, nogat; em i makim olsem “man i no laik tru long wetim God i helpim em.” Stori bilong Jisas long dispela maniman i kirapim yumi long tingim ol tok bihain em i givim long ol Kristen long kongrigesen Laodisia, Esia Maina. Em i tok: “Yu save tok olsem, ‘Mi gat planti mani, na mi gat planti samting i stap. Mi no sot long wanpela samting.’ Tasol nogat. Yu stap nogut tru, inap long ol man i ken sori tru long yu. Yu stap rabis tru na yu aipas na yu stap as nating. Na yu yet yu no save long dispela.”—KTH 3:17.
10. Sapos man i gat “planti gutpela samting,” bilong wanem dispela i no makim olsem em bai stap laip “planti yia”?
10 I gutpela long yumi mas tingim gut samting dispela tok piksa i laik skulim yumi long en. Nogut yumi kain olsem dispela man long tok piksa, em i wok strong tru na bai em inap kisim “planti gutpela samting,” tasol em i no mekim samting em i mas mekim na bai em inap i stap laip “planti yia.” (Jon 3:16; 17:3) Baibel i tok: “Maski yu gat planti mani, em i no inap helpim yu long taim Bikpela i laik bekim ol rong,” na “sapos man i ting mani bilong em tasol inap helpim em long stap gut, orait em bai i lus tru.” (Sindaun 11:4, 28) Olsem na Jisas i tok moa: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.”—Luk 12:21.
11. Bilong wanem yumi no ken tingim tumas ol samting bilong skin?
11 Taim Jisas i tok “dispela kain samting bai i kamap,” em i laik tok olsem samting i bin painim maniman long tok piksa, em bai painim ol man i tingim tumas ol samting bilong skin. I no olsem i gat rong long man i ‘hipim hipim planti samting bilong em yet,’ nogat; tasol i gat rong sapos man i “stap rabis long ai bilong God.” Disaipel Jems i mekim wankain tok lukaut olsem: “Mi gat tok long yupela ol man i save tok olsem, ‘Ating nau o tumora mi bai go long wanpela taun na mi bai mekim wok bisnis inap long wanpela yia. Na long dispela pasin mi bai kisim planti mani.’ Yupela i save mekim dispela kain tok, tasol yupela i no save wanem samting bai i kamap long tumora. Laip bilong yupela i olsem smok i save kamap na i stap liklik taim tasol na i pinis olgeta. Mobeta yupela i tok olsem, ‘Sapos Bikpela i laik, orait mi bai stap laip na mi mekim dispela samting mi ting long mekim.’ ” (Jems 4:13-15) Olsem na sapos man i gat planti mani kago samting, tasol em i no stap gut long ai bilong God, ol dispela samting inap kamap olsem samting i no gat as bilong en. Orait, man i stap gut long ai bilong God em i stap olsem wanem?
Pasin Bilong Stap Gut Long Ai Bilong God
12. Yumi mas mekim wanem na dispela bai helpim yumi long stap gut long ai bilong God?
12 Jisas i tok olsem nogut yumi hipim hipim planti samting bilong skin, tasol yumi stap rabis long ai bilong God. Jisas i laik tok olsem pasin bilong bungim planti mani kago na amamas long ol dispela samting, dispela i no ken i stap nambawan tingting bilong yumi. Samting yumi mas mekim i olsem: Yumi mas mekim wok long ol dispela samting long strongim pasin bilong yumi long pas gut wantaim Jehova. Dispela bai helpim yumi long stap gut long ai bilong God. Orait nau rot bai op long yumi kisim planti blesing long em. Baibel i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.
13. Jehova i save givim wanem kain “gutpela samting”?
13 Taim Jehova i givim ol gutpela samting long ol manmeri bilong em, em i save givim ol samting i nambawan tru. (Jems 1:17) Olsem: Taim Jehova i givim ol Israel wanpela hap graun bilong sindaun long en, dispela hap em i “gutpela graun i gat planti gris.” Baibel i tok kantri Isip tu i kain olsem, tasol dispela hap graun Jehova i givim long ol Israel em i narapela kain long wanpela bikpela samting. Olsem Moses i tokim ol Israel, Jehova “i save was gut long dispela graun.” Dispela i makim olsem ol Israel bai stap gut, long wanem, Jehova bai lukautim ol. Taim ol Israel i stap gut long Jehova, em i mekim gut tru long ol na ol i kisim gutpela sindaun, winim sindaun bilong ol arapela lain i stap klostu. Tru tumas, Jehova i bin givim “planti gutpela samting” long ol!—Lo 4:5-8; 11:8-15; Namba 16:13.
14. Wanem samting i save painim ol man i stap gut long ai bilong God?
14 Ol lain i gat mani ol i save tingting planti long ol arapela i gat wanem tingting long ol. Planti taim dispela samting i kamap ples klia long sindaun bilong ol. Ol i save “hambak long mani kago” bilong ol bambai ol arapela i ken givim biknem long ol. (1 Jon 2:16, NW) Tasol ol man i stap gut long ai bilong God, ol i no save tingting planti olsem, nogat. God i marimari long ol, na em i amamas na i orait long ol, na ol i pas gut wantaim em. Dispela i mekim na ol i stap isi na amamas. Planti mani kago i no inap helpim ol long stap isi na amamas olsem. (Aisaia 40:11) Orait nau yumi laik save, Yumi mas mekim wanem na bai yumi ken stap gut long ai bilong God?
Rot Bilong Stap Gut Long Ai Bilong God
15. Yumi mas mekim wanem na bai yumi inap stap gut long ai bilong God?
15 Dispela man long tok piksa bilong Jisas em i stretim rot na wok strong bambai em i ken kisim mani bilong helpim em yet, tasol God i tok em i longlong man. Olsem na bilong stap gut long ai bilong God, yumi mas wok strong long mekim ol wok i gutpela long ai bilong God. Wanpela wok olsem, em dispela wok Jisas i tokim yumi long mekim: “Yupela i mas i go mekim olgeta lain manmeri i kamap disaipel bilong mi.” (Matyu 28:19) Taim yumi yusim strong, taim, na save bilong yumi long mekim wok bilong autim tok bilong Kingdom na kamapim ol disaipel, na yumi no yusim ol dispela samting bilong helpim yumi yet tasol, dispela i kain olsem pasin bilong putim mani long beng bilong kisim win mani. Ol man husat i bin mekim olsem ol i bin kisim planti gutpela samting bilong spirit, olsem ol ekspiriens daunbilo i kamapim.—Sindaun 19:17.
16, 17. Yu ken kamapim wanem ol ekspiriens bilong soim sampela samting ol man i ken mekim bilong stap gut long ai bilong God?
16 Tingim stori bilong wanpela man Kristen long wanpela kantri long Esia. Em i save mekim wok bilong stretim kompiuta na dispela wok i gat gutpela pe. Tasol dispela wok i pulim klostu olgeta taim bilong em na em i pilim olsem em i no pas gut wantaim God. Olsem na em i no wok moa long kisim bikpela namba; em i lusim dispela wok bilong kompiuta na kirapim wanpela bisnis bilong wokim aiskrim na salim long rot na bai em i gat hap taim moa bilong mekim ol wok bilong lotu na ol narapela wok em i mas mekim. Ol man bipo ol i wanwok bilong em ol tok bilas long em, tasol bihain wanem samting i kamap? Em i tok: “Tru, taim mi mekim wok bilong stretim ol kompiuta mi gat planti mani. Tasol nau mi stap amamas, long wanem, mi no gat ol hevi na wari mi bin kisim long wok bipo mi bin mekim. Na nambawan bikpela samting, mi stap klostu moa long Jehova.” Senis dispela Kristen i mekim i bin opim rot long em i ken insait long wok autim tok fultaim, na nau em i mekim wok long brens ofis bilong ol Witnes Bilong Jehova long kantri bilong em. Tru tumas, Jehova i save givim “planti gutpela samting.”
17 Narapela ekspiriens i bilong wanpela meri i bin kamap bikpela long wanpela famili we ediukesen i bikpela samting. Em i go long sampela yunivesiti long Frans, Meksiko, na Swiselan na i luk olsem em inap kisim wanpela gutpela wok mani. Em i tok: “Mi mekim gut wok bilong mi; ol arapela i givim rispek long mi na rot i op long mi ken kisim bikpela wok i gat namba, tasol mi no stap bel gut na amamas.” Bihain em i kisim save long Jehova. Meri i tok: “Taim mi wok long kamap strong long ol samting bilong lotu, laik bilong mi long mekim ol samting Jehova i laikim na bekim bek sampela samting em i bin givim long mi, dispela i helpim mi long save gut long rot mi mas bihainim—mekim wok bilong em fultaim.” Em i lusim wok mani bilong em na bihain liklik em i kisim baptais. Insait long 20 yia i go pinis, em i bin amamas long mekim wok autim tok fultaim. Em i tok: “Sampela i ting olsem bikpela save bilong mi long mekim wok i lus nating, tasol ol i luksave olsem mi stap amamas, na ol i pilim tru ol stiatok mi save bihainim. Olgeta de mi beten askim Jehova long em i ken helpim mi long daunim mi yet na bai em i ken orait long mi.”
18. Olsem Pol, olsem wanem yumi inap stap gut long ai bilong God?
18 Sol, bihain em i kamap aposel Pol, em inap kisim gutpela wok mani. Tasol bihain em i tok: “Mi save long Krais Jisas, em i Bikpela bilong mi, na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating.” (Filipai 3:7, 8) Pol i ting olsem ol save em i bin kisim long Krais, dispela i winim tru olgeta gutpela samting bilong dispela graun. Na olsem tasol, sapos yumi lusim ol wok bilong helpim yumi yet tasol na yumi kirap mekim wok bilong God, bai yumi tu inap stap gut long ai bilong God. Baibel i tok: “Sapos yu daunim yu yet na yu stap aninit long Bikpela, bai yu gat planti . . . samting na biknem, na bai yu stap gut.”—Sindaun 22:4.
Yu Inap Stori Long Dispela?
• Man long tok piksa bilong Jisas i gat wanem hevi?
• Bilong wanem God i tok dispela man long tok piksa em i longlong man?
• Man i stap gut long ai bilong God i stap olsem wanem?
• Olsem wanem yumi inap stap gut long ai bilong God?
[Piksa long pes 26]
Bilong wanem God i tok dispela maniman i longlong man?
[Piksa long pes 27]
Taim rot i op long kisim bikpela wok moa, olsem wanem dispela inap traim tru bilip bilong yumi?
[Piksa long pes 28, 29]
Jehova i save givim “planti gutpela samting”