Wanem Samting i Bikpela Samting Tru?

WANPELA taim wanpela man i kam long lukim Jisas. Em i save olsem Jisas i gat bikpela savetingting, olsem na em i tokim em: ‘Tisa, tokim brata bilong mi long givim mi sampela samting bilong em.’ Dispela man i ting i stret em i kisim sampela samting bilong brata bilong em.

Sapos yu Jisas, bai yu tok wanem?— Jisas i lukim olsem dispela man i gat wanpela hevi. I no olsem em i sot long ol samting brata bilong em i gat, nogat. Hevi bilong dispela man i olsem em i no save wanem samting i bikpela samting tru long laip bilong man.

Orait, yumi ken tingim dispela. Wanem samting i mas i stap bikpela samting tru long laip bilong yumi? Ol naispela toi, nupela klos, o ol kain samting olsem?— Nogat, i gat narapela samting em i bikpela samting moa. Na dispela em samting Jisas i laik skulim ol man long en. Olsem na em i kamapim stori bilong wanpela man i lusim tingting long God. Yu laik harim dispela stori?—

Dispela man i wanpela maniman. Em i gat ol hap graun na ol haus bilong bungim kaikai. Ol kaikai em i planim i kamap gut tru. I no gat spes long ol haus kaikai bilong bungim olgeta samting em i bin planim. Olsem na em bai mekim wanem? Orait, em i tokim em yet olsem: ‘Bai mi brukim ol haus kaikai bilong mi na wokim ol bikpela bikpela haus. Na bai mi bungim olgeta kaikai bilong mi na olgeta gutpela samting bilong mi long ol dispela nupela haus.’

Dispela maniman i ting em i bihainim gutpela tingting taim em i bungim planti samting. Em i tokim em yet olsem: ‘Mi gat planti gutpela samting i stap. Ol bai inap long mi long planti yia. Olsem na nau mi ken malolo. Bai mi kaikai na dring, na amamas i stap.’ Tasol wanpela samting i no stret long tingting bilong dispela maniman. Yu save em wanem samting?— Em i tingim em yet tasol na amamas bilong em. Em i no tingim God.

Olsem na God i toktok long dispela maniman. Em i tok: ‘Yu longlong man tru. Nau long dispela nait tasol bai yu dai. Na husat bai kisim olgeta dispela samting yu bin bungim i stap?’ Yu ting dispela maniman inap yusim olgeta dispela samting taim em i dai pinis?— Nogat, narapela man bai kisim ol dispela samting. Jisas i tok: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.”—Luk 12:​13-21.

Yu no laik bihainim wankain pasin olsem dispela maniman, a?— Bikpela samting long laip bilong em, em wok bilong kisim planti mani kago. Dispela em pasin kranki. Oltaim em i laik kisim planti samting moa. Tasol em i “stap rabis long ai bilong God.”

Planti man i kain olsem dispela maniman. Oltaim ol i laik kisim planti samting moa. Tasol dispela inap kamapim ol bikpela hevi. Olsem: Ating yu gat ol toi, a?— Yu gat wanem ol toi i stap? Tokim mi.— Olsem wanem sapos wanpela pren bilong yu i gat wanpela bal o doli o toi em yu no gat? Yu ting i stret long traim long mekim na papamama bilong yu i baim wanpela samting olsem bilong yu?—

Ating sampela taim i luk olsem wanpela toi i bikpela samting tru. Tasol bihain liklik, wanem samting i save kamap long en?— Em i kamap olpela. Ating em i bruk, na nau yu no laikim moa. Tasol yu gat wanpela samting em i gutpela moa, winim ol toi. Yu save em wanem samting?—

Em laip bilong yu. Laip bilong yu em i bikpela samting tru, long wanem, sapos yu no gat laip, yu no inap mekim wanpela samting. Tasol bilong i stap laip, yu mas mekim ol samting God i amamas long en, a?— Olsem na yumi no ken bihainim pasin bilong dispela longlong maniman i lusim tingting long God.

I no ol pikinini tasol inap mekim longlong pasin olsem dispela maniman, nogat. Planti bikpela man na meri tu i save mekim olsem. Sampela i laik kisim planti samting moa long olgeta taim, winim ol samting ol i gat pinis. Ating ol i gat kaikai inap long dispela de, klos bilong werim, na ples slip. Tasol ol i laik kisim planti moa. Ol i laik kisim planti klos. Na ol i laikim ol haus i bikpela moa. Ol dispela samting i gat bikpela pe bilong ol. Olsem na ol i save wok hat long kisim planti mani. Na taim ol i kisim planti mani, ol i laik kisim planti samting moa.

Sampela bikpela manmeri i save tingting tumas long kisim mani na ol i no gat taim bilong stap wantaim famili bilong ol. Na ol i no gat taim bilong givim long God. Yu ting mani bilong ol inap helpim ol long i stap laip?— Nogat. Ol inap yusim mani bilong ol taim ol i dai pinis?— Nogat. Ol i no inap, long wanem, ol man i dai pinis ol i no inap mekim wanpela samting.—Saveman 9:​5, 10.

Olsem wanem? Dispela i makim olsem i no stret long yumi gat mani?— Nogat. Yumi inap baim kaikai na klos long mani. Baibel i tok mani bai helpim yumi. (Saveman 7:12) Tasol sapos yumi laikim tumas mani, dispela bai givim bikpela hevi long yumi. Bai yumi olsem dispela longlong maniman em i bungim planti gutpela samting bilong em yet na em i stap rabis long ai bilong God.

Bilong i stap maniman long ai bilong God, yumi mas mekim wanem?— Yumi mas putim God i stap namba wan long laip bilong yumi. Sampela man i tok ol i bilip long God. Ol i ting sapos ol i bilip, dispela tasol em inap. Tasol yu ting ol i stap gut long ai bilong God?— Nogat, ol i olsem dispela maniman em i lusim tingting long God.

Jisas i no lusim tingting long Papa bilong em long heven. Em i no bin wok long kisim planti mani. Na em i no gat planti samting bilong skin. Jisas i save long wanem ol samting i bikpela samting tru long laip bilong man. Yu save em wanem samting?— Em pasin bilong i stap gut long ai bilong God.

Tokim mi, olsem wanem yumi inap kisim gutpela nem long ai bilong God?— Long rot bilong mekim ol samting God i amamas long en. Jisas i tok: “Oltaim mi save mekim ol samting em i laikim.” (Jon 8:29) God i amamas taim yumi mekim ol samting em i laik yumi mas mekim. Orait tokim mi, yu inap mekim wanem ol samting God i ken amamas long en?— Yes, yu inap ritim Baibel, go long ol miting Kristen, beten long God, na helpim ol arapela long kisim save long em. Ol dispela samting i bikpela samting tru long laip bilong man.

Jisas i gat gutpela nem long ai bilong God, olsem na Jehova i bin lukautim em. Em i givim Jisas dispela prais bilong i stap oltaim. Sapos yumi bihainim pasin bilong Jisas, Jehova bai laikim yumi na lukautim yumi tu. Olsem na yumi mas bihainim pasin bilong Jisas na no ken tru bihainim pasin bilong dispela longlong maniman em i lusim tingting long God.