Josep i Traim Ol Brata

JOSEP i laik save olsem ol brata bilong em i lusim pinis hatpela pasin bilong ol o nogat. Olsem na em i tok: ‘Yupela ol man bilong lukstil. Yupela i laik painimaut wanem ol hap bilong kantri bilong mipela i no stap strong.’

Ol i tok: ‘Nogat, mipela i no man bilong lukstil. Mipela i man bilong tok tru. Mipela i 12-pela brata. Wanpela brata i lus pinis, na yangpela brata tru bilong mipela i stap wantaim papa.’

Josep i mekim olsem em i no bilipim tok bilong ol. Em i kalabusim Simeon, na em i larim ol arapela i kisim sampela kaikai na i go bek long ples. Tasol em i tokim ol: ‘Taim yupela i kam bek, yupela i mas bringim yangpela brata bilong yupela i kam long mi.’

Taim ol i kamap long Kenan, ol i tokim papa bilong ol, Jekop, long olgeta samting i bin kamap. Jekop i bel hevi tru na em i tok: ‘Josep i lus pinis na nau Simeon tu i lus. Mi no inap larim yupela i kisim yangpela pikinini man bilong mi, Benjamin, i go long Isip.’ Tasol taim kaikai bilong ol i pinis, Jekop i mas larim ol i kisim Benjamin i go long Isip na bai ol inap kisim sampela kaikai moa.

Josep i lukim ol brata bilong em i kam. Em i amamas tru long lukim liklik brata bilong em Benjamin. Tasol i no gat wanpela bilong ol i save olsem dispela bikman em Josep. Orait nau Josep i mekim wanpela samting bilong traim ol 10-pela brata bilong em.

Em i tok na ol wokboi bilong em i pulimapim kaikai long olgeta bek bilong ol. Na tu, em i tok na ol i putim kap silva bilong em long bek bilong Benjamin. Bihain long ol i lusim Isip na i go liklik, Josep i salim ol wokboi bilong em i go bihainim ol. Taim ol wokboi i bungim ol, ol i tok: ‘Bilong wanem yupela i stilim kap silva bilong bikman bilong mipela?’

Ol brata i tok: ‘Mipela i no stilim kap bilong em. Sapos yupela i painim dispela kap i stap long wanpela bilong mipela, orait yupela i ken kilim dispela man i dai.’

Olsem na ol wokboi i sekim olgeta bek, na olsem yu ken lukim long piksa, ol i painim kap long bek bilong Benjamin. Ol wokboi i tok: ‘Yupela olgeta i ken i go, tasol Benjamin i mas kam wantaim mipela.’ Ol 10-pela brata bai mekim wanem?

Olgeta i go bek wantaim Benjamin long haus bilong Josep. Josep i tokim ol brata bilong em: ‘Yupela olgeta i ken i go, tasol Benjamin i mas i stap olsem wokboi nating bilong mi.’

Nau Juda i tok: ‘Sapos mi go bek long ples na dispela mangi i no kam wantaim mi, papa bilong mi bai i dai, long wanem, em i laikim tumas dispela mangi. Olsem na larim mi i stap hia olsem wokboi bilong yu, tasol larim dispela mangi i go.’

Josep inap lukim olsem ol brata bilong em i bin senisim pasin bilong ol. Ol i lusim pinis hatpela pasin bilong ol. Orait, nau yumi ken painimaut samting Josep i mekim.