STORI 32

Tenpela Hevi

LUKIM ol dispela piksa. Wan wan piksa i soim wanpela hevi Jehova i bin kamapim long ol Isip. Long namba wan piksa yu inap lukim Aron i paitim wara Nail long stik bilong em. Taim em i mekim olsem, wara i tanim i kamap blut. Ol pis i dai, na wara i smel nogut.

Pharaoh waves his hands to get the frogs off his bed during the second plague

Bihain, Jehova i mekim ol rokrok i kamap long wara Nail na i go nabaut. Ol i go long olgeta hap, insait long ol stov, ol dis bilong kukim bret, na long bet bilong ol man. Taim ol rokrok i dai, ol Isip i hipim ol na smel nogut tru i kamap.

Bihain Aron i paitim graun long stik bilong em na das i tanim i kamap natnat. Ol natnat i kaikaim ol man. Em namba tri hevi i kamap long ol Isip.

A woman is bitten by gnats during the third plague

Ol arapela hevi i kamap bihain, ol i bagarapim ol Isip tasol; ol Israel, nogat. Namba foa hevi em olsem: Ol bikpela lang i pulap long haus bilong olgeta Isip. Namba faiv hevi i bagarapim ol animal. Planti bulmakau na sipsip na meme bilong ol Isip i dai.

Bihain, Moses na Aron i kisim sampela sit bilong paia na tromoi i go antap. Dispela i mekim na ol sua nogut i kamap long ol man na animal. Em namba siks hevi.

Bihain Moses i apim han bilong em i go antap, na Jehova i mekim klaut i pairap na ren ais i pundaun. Dispela i bikpela hevi tru na kain samting olsem i no bin kamap bipo long Isip.

Egyptians try to escape flies during the fourth plague

Animals of the Egyptians die during the fifth plague

Namba et hevi em ol bikpela bikpela lain grasopa. I no gat wanpela taim bipo i bin i gat planti grasopa olsem, na bihain tu i nogat. Ol i kaikai olgeta samting em ren ais i no bin bagarapim.

Namba nain hevi em tudak. Inap tripela de bikpela tudak i karamapim Isip. Tasol ol Israel i gat lait long hap ol i stap long en.

Bihain tru, God i tokim lain bilong em long putim blut bilong meme o sipsip long pos bilong dua bilong haus. Orait taim ensel bilong God i kam na em i lukim blut i stap long dua, em i no kilim wanpela long dispela haus. Tasol long olgeta haus i no gat blut long dua, em i kilim i dai namba wan pikinini bilong ol man na animal. Dispela em namba ten hevi.

Taim dispela laspela hevi i kamap pinis, Fero i tokim ol Israel long i go. Lain bilong God i bin redi pinis long i go, na long dispela nait stret ol i lusim Isip na i go.

Kisim Bek sapta 7 i go 12.

Askim Bilong Stadi