Jehova Em i Husat?

“BIKPELA [Jehova] em i husat?” King bilong Isip i bin mekim dispela askim long 3,500 yia bipo. Em i hambak na em i tok moa olsem: “Mi no save long [Jehova].” Tasol Moses na brata bilong em Aron i sanap long ai bilong king na ol i save Jehova i husat. Tupela i bilong wanpela lain bilong Israel, em lain Livai. Jehova i bin salim tupela i go bilong tokim dispela king long salim ol Israel i go long ples drai nating na bai ol i ken mekim bung bilong lotu.​—⁠Kisim Bek 5:​1, 2.

King i no ting ol i mas bekim askim bilong em. Em i bosim ol pris i save kirapim ol man long lotuim planti handet god. Ol man i ting king yet em i wanpela god! Ol i tok, em i pikinini bilong god Ra bilong san, na bipo em i god Horas i gat het olsem bilong pisin tarangau. Ol i kolim em “strongpela god” o “man bilong i stap oltaim.” Long pasin antap em i bekim tok olsem: “Bilong wanem mi mas harim tok bilong en na larim yupela Israel i go? Mi no save long [Jehova].”

Moses na Aron i no gat wok long bekim dispela askim. King i save pinis Jehova em i God bilong ol Israel na ol i save lotu long em, maski nau ol i stap kalabus long Isip na ol i karim hevi. Tasol klostu nau king wantaim ol Isip bai save Jehova em i trupela God. Na nau long taim bilong yumi tu, liklik taim Jehova bai mekim wanpela samting na bai ol man bilong graun i mas save, Jehova wanpela tasol i stap God tru. (Esekiel 36:23) Olsem na i gutpela yumi ken save, olsem wanem God Jehova i bin litimapim nem bilong em long Isip bilong bipo.

Winim Ol God Bilong Isip

Taim king i hambak na i tok, Jehova i husat, em i no save nau bagarap i laik painim em. Jehova i salim 10-pela bikpela hevi long ol Isip. Dispela i no bilong strafim ol Isip tasol, nogat. Em i bilong daunim ol god giaman bilong ol.

Ol dispela hevi Jehova i salim, ol i kamapim klia tru olsem Jehova i winim ol god giaman bilong Isip. (Kisim Bek 12:12; Namba 33:⁠4) Na taim Jehova i tanim Wara Nail wantaim olgeta narapela wara long Isip i kamap blut, ating ol man i kirap nogut tru! Dispela mirakel i lainim king wantaim lain bilong em olsem Jehova i winim god Hapi, em god bilong Wara Nail. Ol pis i dai, na dispela i semim lotu bilong ol Isip, long wanem, ol i save lotuim sampela kain pis tu.​—⁠Kisim Bek 7:​19-21.

Nau Jehova i mekim ol rokrok i kamap long ol Isip, na dispela mirakel i semim god giaman Heket, em god meri i bosim ol rokrok. (Kisim Bek 8:​5-14) Orait, nau Jehova i kamapim namba 3 hevi, na em i tanim das i kamap natnat. Ol glasman i no inap mekim olsem, na ol i tok: “God yet i mekim dispela samting.” (Kisim Bek 8:​16-19) God Tot em i god giaman bilong ol glasman, na em i god bilong olkain marila, tasol em i no inap helpim ol dispela glasman.

King i wok long kisim save olsem Jehova i husat. Jehova inap tokim Moses long ol samting Jehova bai mekim, na nau em inap kamapim dispela samting, olsem kamapim ol bikpela hevi long ol Isip. Em inap kirapim hevi, na em inap pinisim tu. King i lukim olsem, tasol em i bikhet yet. Em i no laik daun long Jehova.

God Su em i god bilong win, na god meri Isis em god bilong ples antap. Long win na long ples antap em ples bilong ol lang na binatang i raun, na ol Isip i save lotuim ol dispela hap. Jehova i kamapim namba 4 hevi na em i mekim ol binatang i pulap long win na ples antap na insait long ol haus na i bagarapim ples. Ol Isip i tingim sampela kain binatang i holi, tasol nau ol dispela binatang i pulap long ples na taim ol i wokabaut ol i mas krungutim. Nau king inap save Jehova i winim ol god giaman bilong Isip. Ol dispela god i no inap pasim ol binatang na bai i no inap kaikaim ol man, tasol Jehova i lukautim lain bilong em na binatang i no kaikaim ol. Dispela hevi na ol hevi i kamap bihain long en i no kisim ol Israel.​—⁠Kisim Bek 8:​20-24.

Namba 5 hevi i bagarapim ol bulmakau samting bilong ol, na dispela i semim 3-pela god giaman, em Hato, na Apis, na god meri Nat em i gat skin olsem bilong bulmakau. (Kisim Bek 9:​1-7) Namba 6 hevi em ol buk i pulap long skin bilong ol man na ol animal, na dispela i semim god Tot, na Isis, na Pata, em ol Isip i tok ol i god bilong oraitim ol sik.​—⁠Kisim Bek 9:​8-11.

Namba 7 hevi, em bikpela ren ais i kam daun wantaim paia. Tasol tupela god ol Isip i tok ol i save bosim klaut na ren i no inap pasim Jehova long mekim dispela samting. Respu em i god bilong bosim lait bilong klaut, na Tot em i god bilong bosim pairap bilong klaut na bosim ren. (Kisim Bek 9:​22-26) Ol i ting god Min em i god bilong mekim ol samting i karim pikinini na bilong lukautim ol gaden, tasol Jehova i wokim namba 8 hevi na em i kamapim ol grasopa na ol i bagarapim ol kaikai long gaden na god Min i no inap pasim ol. (Kisim Bek 10:​12-15) Namba 9 hevi em i bikpela tudak i karamapim kantri Isip inap 3-pela de, na dispela i kamapim giaman bilong god Ra na god Horas, em ol Isip i ting ol i bosim san.​—⁠Kisim Bek 10:​21-23.

Inap 9-pela hevi i bagarapim ol Isip, tasol king i strong yet long pasim ol Israel. Bikhet bilong king i as na ol Isip i kisim bikpela belhevi tru taim Jehova i salim namba 10 hevi. Jehova i kilim i dai namba wan pikinini man insait long ol wan wan famili na ol bulmakau bilong ol Isip. Namba wan pikinini man bilong king tu i dai, maski ol i ting king em i wanpela god. Olsem na Jehova i truim tok bipo em i bin mekim, olsem: “Mi yet mi Bikpela [Jehova] na bai mi mekim save long olgeta giaman god bilong ol Isip.”​—⁠Kisim Bek 12:12, 29.

King i pilim pinis, olsem na em i singautim Moses tupela Aron na i tokim ol: “Yupela go. Yutupela wantaim olgeta manmeri bilong Israel, yupela go hariap. Lusim ol manmeri bilong mi. Yupela go lotu long [Jehova] olsem yupela i bin askim mi. Kisim ol sipsip na meme na ol bulmakau tu na lusim Isip olgeta. Na yu mas [beten] bai God i mekim gut long mi.”​—⁠Kisim Bek 12:​31, 32.

Em i Lukautim Lain Bilong Em

Ol Israel i go, na king i ting ol i paul nabaut long rot, na em wantaim lain bilong em i tok: “Olsem wanem na yumi larim ol Israel i go? Nau bai ol i no inap mekim wok bilong yumi. Yumi mekim kranki pasin tru.” (Kisim Bek 14:​3-5) Sapos i no gat dispela lain i wok kalabus long ol, ol Isip bai hatwok long kamapim ol samting bilong skin.

King wantaim ami bilong em ol i kirap raunim ol Israel na bungim ol long Pihahirot. (Kisim Bek 14:​6-9) Ol Israel i stap namel long solwara na ol maunten, na i olsem rot bilong ol i pas na ol i no inap ranawe i go moa, tasol Jehova i putim wanpela klaut i stap namel long ol Israel na ol Isip, na bikpela tudak i karamapim ol Isip na ol i no inap lukim rot na i go pait long ol Israel. Tasol long dispela nait ples i lait long hap bilong ol Israel.​—⁠Kisim Bek 14:​10-20.

Ol Isip i strong long bagarapim ol Israel na kisim ol samting bilong ol, tasol dispela klaut i pasim rot bilong ol. (Kisim Bek 15:⁠9) Orait, Jehova i tekewe klaut, na ol Isip i kirap nogut long samting ol i lukim! Solwara Retsi i bruk, na rot i kamap namel, na ol Israel i wokabaut i go long graun i no gat wara long en! King wantaim ami i bihainim dispela lain em bipo ol i bin stap wokboi bilong ol. Tasol king i no tingim strong bilong God bilong ol Israel. Nau Jehova i kirap longlongim ol Isip na rausim ol wil long wilka bilong ol na ol i paul nabaut.​—⁠Kisim Bek 14:​21-25a.

Ol bikman bilong ol i pret na i singaut olsem: “[Jehova] i helpim ol Israel na i pait long yumi. Hariap, yumi ranawe i go. Yumi lusim ol kwik.” Tasol i no inap. Ol Isip i lus. Ol Israel i kamkamap pinis long narapela hapsait bilong solwara, na Moses i putim han i go long solwara, na solwara i pas bek na karamapim king wantaim ami bilong em na ol i bagarap.​—⁠Kisim Bek 14:25b-28.

Ol i Kisim Save

Orait, Jehova em i husat? King i pilim pinis Jehova i husat. Ol dispela samting i bin kamap long Isip i kamapim long ples klia olsem Jehova tasol i trupela God, na “olgeta god bilong ol arapela manmeri em ol giaman god tasol.” (Song 96:​4, 5) Jehova i gat bikpela strong tru na em “i bin wokim skai na graun.” Na tu, Jehova i Man bilong kisim bek ol man. Jeremaia i tok long em olsem: “Yu bin wokim ol mirakel na . . . mekim ol Isip i pret nogut tru. Na . . . yu bin kisim mipela Israel, ol lain bilong yu, long Isip na bringim mipela i kam.” (Jeremaia 32:​17-21) Tru tumas, Jehova inap lukautim gut lain bilong em!

Long rot bilong bikpela hevi na pen, king i kisim save, na laspela hevi i kilim em i dai. (Song 136:​1, 15) Taim em i bin askim olsem, “[Jehova] em i husat?” sapos em i bin bihainim pasin daun na harim tok bilong Moses, em gutpela. Olsem bai em inap mekim ol samting i stret long tok bilong Jehova. Long nau planti man i bihainim pasin daun na mekim olsem. Yumi laik save long sampela pasin moa bilong Jehova na ol samting em i laik bai yumi mas mekim. Narapela stori i kam bihain em bai lainim yumi long ol dispela samting bilong dispela Bikpela Man, nem bilong em Jehova.​—⁠Song 83:⁠18.

[Piksa Kredit Lain long pes 3]

Pictorial Archive (Near Eastern History) Est.