Ol i Bihainim Laik Bilong Jehova

Moses na Aron​—⁠Ol i Strongim Bel na Autim Tok Bilong God

TINGIM dispela samting: Moses, em i gat 80 krismas, wantaim brata bilong em Aron, ol i sanap long ai bilong nambawan bikpela man long graun​—⁠king bilong Isip. Long tingting bilong ol Isip, dispela man i no maus tasol bilong ol god. Nogat. Ol i bilip, king yet i wanpela god. Ol i ting em i god Horas​—⁠em dispela god i gat het olsem bilong pisin tarangau​—⁠na em i tanim i kamap man long graun. Horas na Aisis na Osairis, tripela wantaim i kamap namba wan god triwan bilong ol god na ol god meri bilong Isip.

Ol man i laik go klostu long king inap lukim piksa bilong het bilong wanpela snek kobra i sanap long namel bilong hat king bilong em. Ol i ting dispela snek giaman inap sutim paia i go na bagarapim ol birua bilong king. Nau Moses na Aron i sanap pinis long ai bilong dispela king em i olsem wanpela god, na ol i laik askim em long mekim wanpela samting i narapela kain tru, olsem: Em i mas larim ol Israel i go fri na bai ol inap mekim bikpela bung bilong lotuim God bilong ol, Jehova.​—⁠Kisim Bek 5:⁠1.

Jehova i toksave pinis olsem king bai pasim strong bel bilong em. Olsem na Moses na Aron i no kirap nogut taim em i hambak na tok olsem: “[Jehova] em i husat? Bilong wanem mi mas harim tok bilong en na larim yupela Israel i go? Mi no save long [Jehova], olsem na mi no ken larim yupela i go.” (Kisim Bek 4:21; 5:⁠2) Nau rot i op pinis bilong Jehova i pait wantaim king bilong Isip na kamapim bikpela strong bilong Em. Long narapela taim ol i kamap long king, Moses na Aron i mekim wanpela bikpela samting i kamapim klia olsem ol i maus bilong trupela God em i gat olgeta strong.

Wanpela Mirakel i Kamap

Olsem Jehova i tokim ol long mekim, Aron i wokim wanpela mirakel i kamapim klia olsem Jehova i stap nambawan tru na i winim ol god bilong Isip. Em i tromoi stik bilong em long graun long ai bilong king, na wantu stik i kamap wanpela bikpela snek! King em i tingting planti, na em i singautim ol glasman bilong em.a Long strong bilong ol spirit nogut, ol dispela man inap mekim wankain samting long stik bilong ol yet.

Sapos king na ol glasman i amamas long dispela samting, amamas i bilong liklik taim tasol. Tingim pes bilong ol taim snek bilong Aron i daunim ol snek bilong ol! Olgeta man i lukim dispela samting ol i save, strong bilong ol god bilong Isip i no inap tru long strong bilong God tru, em Jehova.​—⁠Kisim Bek 7:​8-13.

Tasol maski dispela samting i kamap, bel bilong king i strong yet. Bihain tasol long God i salim tenpela bikpela hevi bilong bagarapim Isip, nau king i tokim Moses na Aron: “Yupela go. Yutupela wantaim olgeta manmeri bilong Israel, yupela go hariap. Lusim ol manmeri bilong mi. Yupela go lotu long [Jehova] olsem yupela i bin askim mi.”​—⁠Kisim Bek 12:31.

Dispela Stori i Skulim Yumi

Wanem samting i helpim Moses na Aron long i go na sanap long ai bilong dispela strongpela king bilong Isip? Pastaim, Moses i tokim God em i no inap mekim, long wanem, “maus bilong [em] i hevi tumas, na [em i] no inap toktok gut.” Na maski Jehova i tokim Moses em bai helpim em, Moses i tok: “Yu ken salim narapela man.” (Kisim Bek 4:​10, 13) Tasol, Jehova i mekim wok long Moses, em man bilong pasin isi, na i givim gutpela tingting na strong long em bilong inapim em long mekim dispela wok.​—⁠Namba 12:⁠3.

Long nau, ol wokboi bilong God Jehova na Krais Jisas i bihainim dispela tok long “mekim olgeta lain manmeri i kamap disaipel.” (Matyu 28:​19, 20) Bilong yumi inap mekim dispela wok, yumi mas mekim gutpela wok long save yumi kisim long Baibel na long ol narapela save yumi gat. (1 Timoti 4:​13-16) Yumi no ken tingim tumas ol pasin yumi sot long en, nogat; yumi mas bilip long God na kirap mekim wanem wok em i makim yumi bilong mekim. Em inap strongim yumi na inapim yumi long mekim laik bilong em.​—⁠2 Korin 3:​5, 6; Filipai 4:13.

Ol man na ol spirit nogut i wok long birua long Moses, olsem na em i mas kisim narapela kain strong bilong helpim em, winim strong bilong ol manmeri. Jehova i tokim em: “Harim, mi bai mekim yu olsem God long ai bilong king.” (Kisim Bek 7:⁠1) Em nau, God i helpim Moses na givim namba long em. Taim spirit bilong Jehova i stap long em, i no gat as bilong Moses i pret long dispela hambak king o lain bilong em.

Yumi tu i mas mekim wok long spirit holi, o strong, bilong Jehova na bai yumi inap mekim tru wok bilong yumi. (Jon 14:26; 15:​26, 27) Jehova i save helpim yumi tu, olsem na yumi inap mekim wankain tok olsem Devit, em i tok: “Mi save bilip long God, olsem na mi no ken pret long wanpela samting. Bai ol man inap mekim wanem samting long mi? Nogat.”​—⁠Song 56:11.

Jehova i sori long Moses na em i no larim em wanpela tasol i mekim dispela wok. Nogat. God i tokim em: “Brata bilong yu Aron, bai i kamap olsem profet bilong yu na i givim tok bilong yu long king. Olgeta samting mi tokim yu, em yu mas tokim Aron.” (Kisim Bek 7:​1, 2) Jehova i tingim ol samting Moses inap mekim na em i no inap mekim. Em gutpela pasin tru Jehova i mekim, a?

God i givim ol brata Kristen long yumi, em ol i amamas long stap Witnes bilong Jehova, em God Antap Tru, maski i gat ol traim. (1 Pita 5:⁠9) Olsem na maski ol hevi i laik pasim rot bilong yumi, yumi laik bihainim pasin bilong Moses na Aron, em tupela man i bin strongim bel na autim tok bilong God.

[Ol Futnot]

[Piksa long pes 25]

Moses na Aron i sanap long ai bilong king olsem maus bilong God Jehova na ol i no pret