‘Mipela i Mas Bihainim Tok Bilong God Tasol, Bilong Ol Man, Nogat’

‘Bikpela i Save Kisim Bek Mi’

OL PIPEL bilong Jehova i mas makim wanem samting ol i laik mekim. Ol bai bihainim tok bilong king nogut bilong Isip? O ol bai bihainim tok bilong God Jehova, na lusim dispela ples ol i stap olsem wokboi nating, na go kisim Graun Bilong Promis?

Fero bilong Isip i bikhet na i no laik larim lain bilong Jehova i go fri, olsem na God i salim ol 10-pela bikpela hevi long Isip. Dispela i soim tru bikpela pawa bilong em! Ol god bilong ol Isip i no inap mekim wanpela samting bilong pasim ol dispela hevi.

Taim ol i tokim Fero long larim ol pipel bilong God i go, em i tok: “Bikpela em i husat? Bilong wanem mi mas harim tok bilong en na larim yupela Israel i go? Mi no save long Bikpela, olsem na mi no ken larim yupela i go.” (Kisim Bek 5:2) Olsem na ol dispela hevi i bin painim Isip: (1) wara i kamap blut, (2) ol rokrok, (3) ol natnat, (4) ol lang, (5) ol animal i dai, (6) ol buk i kamap long skin bilong ol man na animal, (7) bikpela ren ais, (8) ol grasopa, (9) bikpela tudak, (10) ol namba wan pikinini man i dai, na pikinini man bilong Fero tu i dai. Bihain long ol dispela hevi Fero i larim ol Hibru i go. Em i hariapim ol long go!​—Kisim Bek 12:​31, 32.

Winim 3 milion manmeri​—ol man, meri na pikinini bilong Israel na planti arapela lain manmeri—​ol i kirap lusim Isip hariap. (Kisim Bek 12:​37, 38) Tasol i no longtaim na Fero wantaim strongpela ami bilong em i ranim ol. Solwara Retsi, ples wesan nating, na ami bilong Fero i banisim ol Israel na i luk olsem ol i no gat rot long ranawe. Tasol Moses i tokim ol pipel: “Maski pret. Sanap strong na nau bai yupela i lukim olgeta samting Bikpela i laik mekim bilong helpim yupela.”​—Kisim Bek 14:​8-14.

Jehova i kamapim wanpela mirakel na em i brukim solwara Retsi i go tupela hap na bai ol Israel i ken ranawe. Tasol taim ol Isip i bihainim ol, God i mekim na wara i karamapim ol. “Em [God] i tromoi ol ami bilong Isip wantaim ol karis bilong pait i go long solwara.” (Kisim Bek 14:​26-28; 15:4) Hambakman Fero i no laik givim biknem long Jehova, olsem na bagarap i painim em.

Long hap bilong solwara Retsi, Jehova i kamapim klia olsem “em i strongpela soldia tru.” (Kisim Bek 15:3) Baibel i tok: “Ol i lukim dispela bikpela wok Bikpela i bin mekim bilong winim ol Isip. Na ol manmeri bilong Israel i pret na i stap aninit long Bikpela, na ol i bilip long em.” (Kisim Bek 14:31; Song 136:​10-15) Ol i kamapim bikpela tenkyu long God taim ol man i bungim nek wantaim Moses na singim song bilong winim pait. Na susa bilong Moses, em Miriam, i go pas long ol meri long mekim danis.a

Jehova i Wok Yet Long Kisim Bek Ol Man

Ol wokboi bilong Jehova long nau inap kisim strong long ol samting Jehova i bin mekim bilong kisim bek ol Israel long solwara Retsi. Wanpela samting yumi lainim i olsem: Jehova i gat olgeta strong na em inap helpim tru ol manmeri bilong em. Long song bilong winim pait, Moses na ol Israel i bin tok: “Bikpela, han sut bilong yu i gat bikpela strong moa, na em i krungutim ol birua na wilwilim ol tru.”​—Kisim Bek 15:6.

Narapela samting yumi lainim i olsem: God i Gat Olgeta Strong i gat laik tru long lukautim ol manmeri bilong em. Ol Israel i singim song olsem: “Bikpela yet i save mekim mi strong, na mi singim song bilong litimapim nem bilong en. Em i save kisim bek mi, na mi laik litimapim nem bilong en.” Narapela samting moa yumi lainim em i no gat wanpela man inap sakim laik bilong God Jehova. Long song bilong winim pait, ol manmeri God i bin kisim bek, ol i singsing olsem: “Bikpela, wanem arapela god i stap na i strongpela olsem yu? I no gat wanpela. Yu nambawan king na yu stap holi. Yu antap tru na gutpela olgeta. Na husat inap olsem yu? I no gat wanpela. Yu save wokim olkain mirakel na mekim ol bikpela wok, na ol manmeri i pret tumas long yu.”​—Kisim Bek 15:​2, 11.

Ol hetman bilong nau i bihainim pasin bilong Fero bilong bipo na ol i mekim nogut long ol manmeri bilong Jehova. Ol bikhet lida bai “tok nogut long God Antap Tru na daunim ol manmeri bilong en.” (Daniel 7:25; 11:36) Tasol Jehova i tok promis long ol manmeri bilong em: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.”​—Aisaia 54:17.

Ol birua bilong God i no inap win, olsem Fero na ami bilong em i no bin win. Ol samting Jehova i bin mekim bilong kisim bek lain bilong em, olsem ol samting i bin kamap taim Israel i lusim Isip, i tokaut klia olsem i stret long bihainim stiatok ol aposel bilong Jisas i kamapim, ol i bin tok: “Mipela i mas bihainim tok bilong God tasol. Mipela i no ken bihainim tok bilong ol man.”​—Aposel 5:29.

[Futnot]

[Blok/Piksa long pes 9]

YU SAVE LONG DISPELA?

• Jehova i mekim strongpela win i kamap long nait olgeta na bai ol Israel i ken brukim solwara Retsi long graun i drai.​—Kisim Bek 14:​21, 22.

• Rot namel long solwara Retsi i mas op bikpela inap olsem 1.5 kilomita na bai planti milion manmeri bilong Israel i ken brukim solwara insait long sotpela taim.

[Ol Piksa long pes 9]

Ol god giaman bilong Isip i no inap stopim ol tenpela bikpela hevi Jehova i putim long ol

[Kredit Lain]

All three figurines: Photograph taken by courtesy of the British Museum