“Sanap Strong na Lukim Jehova i Kisim Bek Yupela”
“Bikpela i stap wantaim mi na mi no inap pret. Ol man i no inap mekim wanpela samting long mi.”—SONG 118:6.
1. Wanem samting nogut bai painim ol man?
KLOSTU nau ol samting nogut tru bai painim ol man, winim ol samting nogut i bin kamap bipo. Jisas i tok profet long taim bilong yumi na em i tok lukaut long ol disaipel olsem: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.”—Matyu 24:21, 22.
2. Wanem samting i mekim na bikpela hevi tru i no kirap yet?
2 Ol ensel, em yumi no inap lukim, ol i no larim dispela bikpela hevi tru i kirap yet. Jisas i bin soim aposel Jon i gat wanem risen na ol ensel i no larim dispela bikpela hevi tru i kamap yet. Lapun Jon i stori olsem: “Mi lukim 4-pela ensel i sanap i stap long ol 4-pela kona bilong graun. Ol i holimpas ol 4-pela win bilong graun . . . Na mi lukim narapela ensel i lusim hap bilong sankamap na i kam. Em i holim mak bilong God, em God i save stap laip oltaim, na em i singaut strong long dispela 4-pela ensel . . . Em i tok olsem, ‘Yupela i no ken hariap long bagarapim graun na solwara na ol diwai. Mipela i laik putim mak bilong God bilong yumi long pes bilong ol wokman bilong en pastaim, na bihain yupela i ken bagarapim ol samting.’ ”—KTH 7:1-3.
3. Wanem namba wan samting bai kamap long taim bilong bikpela hevi tru?
3 Wok bilong putim laspela mak long ‘ol wokman bilong God’ em lain God i makim, em i klostu pinis. Fopela ensel i redi long lusim ol win bilong bagarap. Taim ol i mekim olsem, wanem samting bai kamap pastaim? Wanpela ensel i bekim dispela askim olsem: “Ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa.” (KTH 18:21) Bikpela amamas tru bai kamap long heven taim olgeta lotu giaman i kisim bagarap!—KTH 19:1, 2.
4. Wanem ol samting bai kamap bihain?
4 Olgeta gavman bilong graun bai wanbel long biruaim lain bilong Jehova. Yu ting ol dispela gavman bai bagarapim na pinisim ol dispela Kristen i bihainim tru Jehova? Em bai luk olsem. Tasol tingim! Ol ami bilong heven bai bihainim Krais Jisas na ol bai bagarapim ol manmeri bilong ol dispela gavman. (KTH 19:19-21) Bihain, Satan na ol ensel bilong em bai kalabus na ol i no inap mekim wanpela samting. Ol i no inap paulim ol man moa, bikos ol bai kalabus inap wan tausen yia. Bikpela lain manmeri i winim taim bilong bikpela hevi bai amamas tru long dispela!—KTH 7:9, 10, 14; 20:1-3.
5. Wanem amamas i wetim ol manmeri i stap gut long Jehova?
5 Klostu nau bai yumi lukim ol dispela bikpela samting i kamap. Dispela olgeta samting i insait long wok bilong kamapim klia olsem i stret Jehova em i nambawan bos bilong heven na graun. Na tingim dispela samting: Sapos yumi stap gut long Jehova na sanap strong long sapotim wok bos bilong em, orait yumi inap insait long wok bilong mekim holi nem bilong Jehova, na insait long ol samting Jehova i mekim bilong kamapim laik bilong em. Bai yumi amamas tru long mekim olsem!
6. Yumi tingim ol samting klostu nau i laik kamap, olsem na bai yumi skelim wanem samting?
6 Olsem wanem? Yumi redi long ol dispela bikpela samting i laik kamap? Yumi bilip long strong bilong Jehova long kisim bek yumi? Yumi bilip tru olsem em bai helpim yumi long gutpela rot na long taim stret? Taim yumi bekim ol kain askim olsem, yumi ken tingim tok aposel Pol i bin givim long ol wanbilip Kristen long Rom, em i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Stori bilong Jehova i kisim bek ol Israel long strongpela kantri Isip, em wanpela bilong ol tok bilong bipo ol i bin raitim bilong strongim bel bilong yumi na helpim yumi long bilip na wetim ol gutpela samting. Yumi laik skelim gut ol samting Jehova i bin mekim bilong kisim bek ol Israel na dispela inap strongim yumi long nau taim yumi wetim taim bilong bikpela hevi tru.
Jehova i Kisim Bek Lain Bilong Em
7. Long yia 1513 B.C.E., wanem samting i bin kamap long Isip?
7 Em yia 1513 B.C.E. na Jehova i kamapim pinis 9-pela hevi long ol Isip. Bihain long namba 9 hevi, Fero i tokim Moses: “Goan, yu go. Yu klia long dispela ples. Yu no ken lukim mi gen. Sapos yu kam lukim mi, wantu bai mi kilim yu i dai.” Moses i bekim tok olsem: “Em i stret. Mi no ken lukim yu gen.”—Kisim Bek 10:28, 29.
8. Ol Israel i kisim wanem tok ol i mas bihainim na bai ol i ken abrusim bagarap? Wanem samting i kamap?
8 Jehova i kamapim long Moses olsem i gat wanpela hevi moa bai painim Fero na ol Isip, em laspela hevi. Long namba 14 de bilong mun Abip (Nisan), olgeta fesbon pikinini man bilong olgeta man Isip na olgeta namba wan pikinini bilong ol animal bai i dai. Tasol lain Israel inap abrusim dispela hevi sapos ol i bihainim ol tok God i givim long Moses. Ol i mas peintim blut bilong sipsip man long tupela pos bilong dua na hap antap long dua bilong haus bilong ol na ol i no ken i go ausait. Wanem samting i bin kamap long dispela nait? Yumi larim Moses yet i stori long yumi: “Long biknait tru Bikpela i kilim i dai olgeta namba wan pikinini man bilong ol Isip.” Fero i kirap wantu long mekim samting. Em i singautim Moses na Aron, na em i tokim tupela: “Yupela go. . . . Lusim ol manmeri bilong mi. Yupela go lotu long Bikpela olsem yupela i bin askim mi.” Na ol Israel i no westim taim, moa long 3 milion bilong ol wantaim “planti arapela lain manmeri” i kirap lusim Isip.—Kisim Bek 12:1-7, 29, 31, 37, 38.
9. God i stiaim ol Israel i go long wanem rot? Bilong wanem em i makim dispela rot?
9 Rot i sotpela moa long ol Israel i bihainim em rot i stap arere long solwara Mediterenian na i brukim graun bilong ol Filistia. Tasol ol Filistia em ol birua bilong ol. Olsem na bilong lain pipel bilong em i no gat wok long pait, Jehova i stiaim ol i go long ples drai nating long hap bilong Retsi. Maski sampela milion manmeri i wokabaut i go, ol i no paul nabaut. Baibel i tok: “Ol i karim ol samting bilong pait na ol i wokabaut i go [olsem ami i save mats].”—Kisim Bek 13:17, 18.
“Lukim Jehova i Kisim Bek Yupela”
10. Bilong wanem God i tokim ol Israel long wokim kem long ples Pihahirot?
10 Samting i kamap bihain em samting bilong kirap nogut long en. Jehova i tokim Moses olsem: “Tokim ol Israel long ol i mas i go bek na wokim kem long arere bilong solwara long ples Pihahirot. Dispela ples i stap namel long taun Mikdol na solwara Retsi klostu long ples Balsefon.” Taim ol i bihainim dispela tok, ol i kalabus i stap namel long ol maunten na hap bilong Retsi. I luk olsem ol i no gat rot long ranawe. Tasol Jehova i save long samting em i mekim. Em i tokim Moses: “Mi bai mekim king i bikhet, na em bai i ranim yupela. Tasol bai mi winim em wantaim ami bilong en na bai mi kisim biknem long dispela samting mi mekim. Na ol Isip bai i save olsem, mi yet mi Bikpela.”—Kisim Bek 14:1-4.
11. (a) Fero i kirap mekim wanem? Dispela i kirapim ol Israel long mekim wanem? (b) Taim ol Israel i komplein, Moses i mekim wanem tok?
11 Fero i pilim olsem em i popaia taim em i larim ol Israel i lusim Isip, olsem na em i hariap kisim 600 namba wan karis bilong pait na ol i kirap i go bihainim ol Israel. Taim ol Israel i lukim ami bilong Isip i kam long ol, ol i pret nogut tru na singaut long Moses olsem: “Watpo yu bringim mipela i kam nating long ples wesan hia? Yu ting ol ples matmat long Isip i sot na yu laik bai mipela i dai long dispela ples, a?” Moses i bilip tru olsem Jehova bai kisim bek ol, olsem na em i tok: “Yupela i no ken pret. Sanap strong na lukim Jehova i kisim bek yupela.” “Bikpela bai i pait bilong helpim yupela. Tasol yupela yet i no ken mekim wanpela samting. Yupela i mas i stap isi tasol.”—Kisim Bek 14:5-14; NW.
12. Olsem wanem Jehova i kisim bek ol lain pipel bilong em?
12 Tru tumas, tok Moses i mekim olsem Jehova yet bai pait bilong helpim ol Israel, dispela tok i kamap tru na ol narapela kain strong i kirap helpim ol. Ensel bilong Jehova i mekim na klaut i save go pas long stiaim ol Israel i go stap baksait long ol. Klaut i mekim hap ol Isip i stap long en i kamap tudak tru, tasol long sait bilong Israel klaut i givim lait. (Kisim Bek 13:21, 22; 14:19, 20) Nau Moses i bihainim tok bilong God na em i litimapim han bilong en. Baibel i stori moa olsem: “Bikpela i mekim strongpela win i kamap long hap sankamap, na win i winim solwara i stap inap tulait. . . . Na long namel graun i drai olgeta na ol Israel i wokabaut long en i go long hap. Na wara i sanap olsem banis long hap na long hap.” Ol Isip i kirap ranim ol Israel, tasol Jehova i stap long sait bilong lain pipel bilong em. Em i paulim tingting bilong ol Isip, na em i tokim Moses: “Stretim han bilong yu na makim solwara na bai wara i kam bek na karamapim ol soldia bilong Isip wantaim ol karis na hos bilong ol.” Jehova i bagarapim tru ami bilong Fero, olsem na i no gat wanpela soldia i stap laip!—Kisim Bek 14:21-28; Song 136:15.
Kisim Save Long Samting i Bin Painim Lain Israel
13. Taim Jehova i kisim bek ol Israel dispela i kirapim ol long mekim wanem?
13 God i kisim bek ol Israel long rot bilong ol mirakel. Dispela i mekim wanem long ol? Wantu Moses na ol Israel i kirap mekim singsing bilong litimapim nem bilong Jehova! Ol i singsing olsem: “Nau bai mi singim song long Bikpela, long wanem, em i winim bikpela pait tru. . . . Na Bikpela, yu bai stap king oltaim oltaim.” (Kisim Bek 15:1, 18) Yes, namba wan tingting bilong ol em long givim biknem long God. Ol samting i bin kamap i kamapim klia olsem Jehova em i nambawan bos.
14. (a) Yumi kisim wanem save long Jehova taim yumi skelim ol samting i bin painim ol Israel? (b) Wanem yiateks bilong yia 2008?
14 Olsem wanem ol dispela samting i bin kamap i strongim bel bilong yumi na i mekim yumi sanap strong na wetim God i helpim yumi? Yumi luksave olsem Jehova i redi long helpim lain pipel bilong em maski wanem kain traim i painim ol. Maski wanem kain hevi i painim ol, Jehova inap stretim. Solwara Retsi i no pasim rot bilong ol Israel taim Jehova i kirapim dispela strongpela win i winim solwara. Na em i mekim na Retsi i kamap ples matmat bilong ol ami bilong Fero. Yumi ken tingting long dispela samting na mekim wankain tok olsem man bilong raitim song i bin mekim: “Bikpela i stap wantaim mi na mi no inap pret. Ol man i no inap mekim wanpela samting long mi.” (Song 118:6) Tok Pol i mekim long Rom 8:31 i ken mekim gut bel bilong yumi, em i tok: “Sapos God i helpim yumi, orait husat bai i birua long yumi?” Man! Ol dispela tok bilong God i save strongim tru bel bilong yumi, a? Ol i daunim pret na tupela tingting yumi gat long sampela samting, na ol i kirapim yumi long bilip strong olsem gutpela samting bai painim yumi long bihain. Olsem na yiateks bilong yumi long 2008 em i stret tru, em: “Sanap strong na lukim Jehova i kisim bek yupela”!—Kisim Bek 14:13, NW.
15. Olsem wanem pasin bilong bihainim tok em i bikpela samting long taim God i bin kisim bek ol Israel long Isip? Olsem wanem pasin bilong bihainim tok em i bikpela samting long nau?
15 Yumi kisim wanem save moa long ol samting i kamap long ol Israel taim ol i lusim Isip? Yumi lain olsem yumi mas bihainim tok bilong Jehova maski em i askim yumi long mekim wanem. Ol Israel i bihainim gut ol tok ol i kisim long ol samting ol i mas redim bilong mekim Pasova. Ol i bihainim tok na ol i stap insait long haus long nait bilong Nisan 14. Taim ol i lusim Isip ol i mas “karim ol samting bilong pait na ol i wokabaut i go,” olsem ami i save mats. (Kisim Bek 13:18) Long nau em i bikpela samting long bihainim tok yumi kisim long rot bilong “wokboi i gat gutpela tingting”! (Matyu 24:45) Yumi mas putim gut yau long tok God i givim yumi, olsem: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Kirap bilong taim bilong bikpela hevi tru i wok long kam klostu moa, olsem na yumi ken ting bai yumi kisim sampela tok yumi mas bihainim. Bilong bagarap i no ken painim yumi long dispela taim, yumi mas stap wanbel na wok wantaim ol arapela gutpela wokboi bilong Jehova.
16. Yumi kisim wanem save long ol samting God i bin mekim bilong kisim bek ol Israel?
16 Tingim, Jehova i bin stiaim ol Israel i go long wanpela hap we i luk olsem ol i pas namel long ol maunten long wanpela sait na solwara Retsi long narapela sait. I luk olsem ol i no bihainim gutpela rot. Tasol Jehova i kontrolim olgeta dispela samting, na ol samting em i mekim i givim biknem long em na i kisim bek lain pipel bilong em. Long nau, ating yumi no klia long as na oganaisesen i bihainim wanpela pasin bilong mekim samting, tasol yumi ken bilip tru olsem Jehova i wok long stiaim yumi long rot bilong ol gutpela mausman bilong em. Sampela taim i luk olsem ol birua i wok long winim yumi. Ating yumi man i no inap save long olgeta samting i wok long kamap. Tasol maski i olsem, Jehova inap stiaim ol samting long taim stret, olsem em i bin mekim long taim bilong ol Israel.—Sindaun 3:5.
Bilip Strong Long Jehova
17. Bilong wanem yumi ken bilip tru long pasin bilong God long stiaim yumi?
17 Ol Israel i mas bilip strong tru long Jehova taim ol i tingim dispela bikpela klaut i soim rot long ol long san na paia i givim lait long ol long nait. Dispela i makim olsem “ensel bilong God” i stiaim wokabaut bilong ol. (Kisim Bek 13:21, 22; 14:19) Long nau yumi ken bilip tru olsem Jehova i stap wantaim ol manmeri bilong em bilong stiaim, lukautim, na kisim bek ol. Yumi ken bilipim tru tok promis bilong God: “[God] i no inap larim ol manmeri bilong en i lus. Oltaim Bikpela i save lukautim ol manmeri i wokabaut stret.” (Song 37:28) Yumi no ken lusim tingting long ol strongpela ensel i wok long helpim ol wokboi bilong God long nau. Ol i helpim yumi na yumi inap “sanap strong na lukim Jehova i kisim bek [yumi].”—Kisim Bek 14:13, NW.
18. Bilong wanem yumi mas “pasim olgeta klos pait God i save givim long yumi”?
18 Wanem samting bai helpim yumi long “sanap strong” long tok i tru? Em pasin bilong werim ol klos pait em Pol i stori long en long pas em i raitim long ol Efesus. Pol i tokim yumi long “pasim olgeta klos pait God i save givim long yumi.” Olsem wanem? Yumi save werim olgeta bilong ol dispela klos pait? Insait long dispela yia i laik kamap nau, em bai gutpela sapos yumi olgeta wan wan i skelim yumi yet, yumi werim dispela olgeta klos pait na yumi pasim ol gut o nogat. Birua bilong yumi Satan, em i save long ol samting inap pulim yumi, na em i laik mekim wok long ol dispela samting taim yumi no was gut i stap. Yumi “pait” long olgeta spirit nogut. Tasol long strong bilong Jehova yumi inap winim pait!—Efesus 6:11-18; Sindaun 27:11.
19. Bai yumi inap mekim wanem sapos yumi sanap strong na karim hevi?
19 Jisas i tokim ol disaipel olsem: “Yupela i mas i stap strong, na bai yupela i kisim laip na i stap gut.” (Luk 21:19) Yumi laik i stap insait long lain manmeri i stap gut long God na karim ol kain kain hevi, na long rot bilong bikpela pasin helpim bilong God bai yumi “sanap strong na lukim Jehova i kisim bek [yumi].”
Bai Yu Bekim Olsem Wanem?
• Wanem ol bikpela samting klostu nau bai kamap?
• Olsem wanem Jehova i bin soim strong bilong em long kisim bek ol man long 1513 B.C.E.?
• Yu tingting strong long mekim wanem samting long bihain?
[Rait long pes 20]
Yiateks bilong 2008 em: Sanap strong na lukim Jehova i kisim bek yupela.—Kisim Bek 14:13.
[Piksa long pes 17]
“Olgeta tok bipo ol i bin raitim long buk bilong God, em ol i bin raitim bilong skulim yumi”
[Piksa long pes 18]
Pasin bikhet bilong Fero i mekim na lain Isip i kisim bagarap
[Piksa long pes 19]
Lain Israel i no kisim bagarap taim ol i bihainim olgeta tok bilong Jehova