Sapta 16

Bai Yu Mekim Wanem?

YU LAIK mekim wok bilong Jehova o nogat? Em samting yu yet yu mas tingim. Sapos yu marit na poroman bilong yu i stap gut long wok bilong God, em gutpela blesing tru. Na olsem tasol, sapos papamama bilong yu i laikim tumas Jehova, dispela inap helpim yu. Ating dispela inap helpim yu long bung wantaim ol manmeri i save lotuim Jehova “long spirit na long pasin i tru.” (Jon 4:23, 24) Tasol bihain yu yet yu mas tingim wanem rot yu laik bihainim. Olsem wanem? Yu givim bel tru long Jehova na yu laik kamap wanpela wokboi bilong em? Yu laik tru long i stap long graun taim stretpela pasin tasol i stap long en?

² Sapos yu gat pikinini, yu laik tru bai ol pikinini bilong yu i kisim laip i stap oltaim aninit long Kingdom bilong God, a? Tru yu no inap bosim ol samting ol bai mekim taim ol i bikpela pinis na ol yet inap tingim wanem rot ol i laik bihainim. Tasol ol samting yu yet yu mekim—olsem yu lotu tru long God o nogat—dispela inap helpim ol pikinini o pasim rot bilong ol. Sapos yu surik long mekim wok bilong God, ating bai yu pasim rot bilong ol pikinini na bai ol i no kirap bihainim rot i go long laip i stap oltaim oltaim. O sapos yu dediket long God na bihain yu les long mekim wok bilong God, ating dispela inap bagarapim famili olgeta long ol samting bilong spirit na bagarapim yu olgeta long taim bilong bikpela hevi tru. Tasol sapos yu stap gut long wok bilong God, na yu helpim ol pikinini bilong yu long stadi long Baibel, em Tok Bilong God, na yu lainim bel bilong yu yet na bel bilong ol long laikim tumas Jehova na bihainim tok bilong lain bilong em long graun, na yu helpim ol long save sapos ol i bihainim laik bilong God dispela bai lukautim ol, na yu lainim ol long rot bilong kisim amamas long wok bilong God, orait bai yu helpim ol tru long kirap wokabaut long rot bilong laip. Tasol Jehova i mas helpim yu na bai yu inap mekim olsem. (Lukim 2 Timoti 1:5.) Oltaim yu mas beten askim Jehova long helpim yu. Na yu yet yu mas wok strong. Tasol taim yu lukim gutpela samting i kamap long wok bilong yu, bai yu amamas tru!

³ Olsem wanem? Yu yet yu laikim tumas Jehova, tasol famili bilong yu ol i no mekim olsem? Ol i wok long pasim yu bambai yu no insait long wok bilong Jehova? O ol i birua long yu? Orait, yu ken mekim wanem bilong helpim ol na bai ol tu i ken amamas long kisim save long ol samting God i laik mekim? Planti taim, sapos yu singautim ol i go wantaim yu long Haus Kingdom na ol yet i harim tok bilong miting na lukim ol samting i kamap, dispela inap helpim ol. Taim ol i stap long Haus Kingdom ating bai ol i toktok wantaim wanpela elda long sampela askim bilong ol long bilip o pasin bilong ol Witnes Bilong Jehova. Tasol olsem wanem sapos bihain ol i birua yet long yu? Orait, nau yu mas askim skin bilong yu yet olsem: ‘Mi givim bel tru long Jehova na Pikinini bilong em Krais Jisas na mi redi long karim ol hevi bambai mi ken kamapim bel bilong mi, mi laik tenkyu long tupela long olgeta samting tupela i bin mekim bilong helpim mi? Mi laikim tumas famili bilong mi na mi redi long makim gutpela pasin na sapos inap bai ol tu i ken bilip long ol samting God i mekim bilong givim laip oltaim long ol man?’—Matyu 10:36-38; 1 Korin 7:12, 13, 16.

DISPELA MAK OL LAIN MAN I GO LONG EN

⁴ Nau ol manmeri bilong olgeta hap ol inap kam insait long lain bilong Jehova na mekim wok bilong Kingdom, na bai ol i kamapim bel bilong ol, ol i givim bel tru long Jehova. Long rot bilong dispela Kingdom o gavman bai Jehova i stretim bek nem bilong em. Tingting bilong yumi long Kingdom i kamapim tingting bilong yumi long Jehova yet.

⁵ Jehova i givim tingting long profet Aisaia long raitim tok olsem: “Na long dispela taim bambai wanpela man i kamap long lain bilong Jesi, na dispela man bai sanap olsem wanpela mak bilong ol lain man. Na ol lain man bai i go long em bilong kisim save, na ples em i stap long en bai kisim biknem.” (Aisaia 11:10, NW) Dispela “man i kamap long lain bilong Jesi” em Bikpela bilong yumi, Krais Jisas, taim em i kisim pinis biknem long heven. Taim em i kirap mekim wok king i olsem kru i kamap long rop bilong diwai—em i givim nupela strong long ol king i bin kamap long lain bilong Jesi long rot bilong pikinini man bilong em King Devit. (Revelesen 5:5; 22:16) Kirap long yia 1914 Krais Jisas i “sanap olsem wanpela mak bilong ol lain man.” Ol man i laik tumas bai i gat stretpela gavman bilong bosim graun, ol i go long em. Jehova yet i putim em i stap olsem Mak, em i King na Krais tru.—Aisaia 11:12.

⁶ Tasol olsem wanem ol man long graun inap i go bung long wanpela King i stap long heven? Sampela man i mas lainim ol long Baibel bambai ol i ken kisim save long em, na bai i olsem ol i lukim em tru. Spirit holi i stiaim liklik hap lain bilong ol Isrel bilong spirit ol i stap yet long graun na ol i wok strong long givim dispela save long ol man. Ol i autim gutpela tok long olgeta hap bilong graun na tokim ol man, Kingdom bilong God long han bilong Krais em i kamap pinis. Sampela manmeri bilong olgeta lain ol i harim na ol i bilip. Ol i laik save long ol samting God i tok ol i mas mekim bambai ol i ken i stap aninit long dispela Kingdom na i stap oltaim long Paradais long graun. Ol tok bilong Baibel ol i kisim save long en em i bekim gut ol askim bilong ol, na ol i bihainim ol dispela tok na givim bel long Kingdom bilong God na Krais. Yu bin mekim olsem?

‘OL BAI HARIM, TASOL OL I NO KEN BIHAINIM’

⁷ Ol Witnes Bilong Jehova i wok strong, olsem na planti taim ol manmeri i stori long ol. Tasol ol dispela manmeri i ting olsem wanem long ol tok ol Witnes Bilong Jehova i autim long ol? Ol i mekim wankain pasin olsem ol wanlain bilong profet Esikiel, em ol i bin kalabus wantaim em long Babilon. Jehova i tok long ol, olsem: “Tasol yu, O pikinini bilong man, ol wanlain bilong yu, . . . ol i toktok wantaim na ol i tok, ‘Plis, yupela i kam na harim dispela tok i kam long Jehova.’ Na bai ol i kam long yu, olsem lain bilong mi i save kam long mi, na bai ol i sindaun long pes bilong yu olsem lain bilong mi; na bai ol i harim ol tok yu mekim, tasol ol i no ken bihainim ol dispela tok, long wanem maus bilong ol i save autim laik nogut bilong ol na bel bilong ol i save mangal long mani. Na harim! Long ai bilong ol bai yu kamap olsem wanpela gutpela singsing bilong man i gat laik long wanpela meri, na bai yu kamap olsem man i gat gutpela nek bilong singsing na i save paitim gut gita. Na bai ol i harim ol tok yu mekim, tasol i no gat wanpela bai bihainim ol dispela tok. Na taim ol samting i kamap tru olsem yu tok pinis—na em i mas kamap tru—bai ol i save tu i gat wanpela profet em i bin i stap namel long ol.”—Esikiel 33:30-33, NW.

⁸ I gat planti manmeri ol i litimapim nem bilong ol Witnes Bilong Jehova na ol i laikim ol buk na nius bilong Baibel ol Witnes i wokim. Na taim ol Witnes i laik kirapim Baibel-stadi long ol, ating bai ol i orait long dispela. Sampela i kam wantaim ol pren bilong ol long sampela bikpela miting bilong ol Witnes. Olsem long taim bilong Memorial, taim ol Witnes i bung bilong tingim i dai bilong Jisas—long dispela taim bikpela lain tru ol i save bung wantaim ol Witnes, winim tru lain bilong ol Witnes. Na long sampela kantri bikpela lain moa yet i bung wantaim ol Witnes long dispela taim. Tasol ol dispela manmeri bai mekim wanem long tok i tru bilong Baibel ol i harim long ol dispela miting? Winim 3 milion manmeri ol i bilip na ol i bihainim ol dispela tok. Tasol ol narapela i tingim ol dispela tok i olsem wanpela gutpela singsing i bilong amamasim ol tasol. Ol i laik i stap arere. Ating ol i tok, ‘Yupela i mekim gutpela wok,’ tasol ol i no dediket long God na ol i no mekim wok bilong Em.

⁹ Tasol sapos yu gat tupela tingting na yu stap arere tasol na wet i stap, yu ting dispela bai helpim yu olsem wanem? Bai Jehova i no ken belgut long yu na lukautim yu long taim bilong bekim pe nogut. Bilong abrusim bagarap yu mas mekim ol samting i kamapim long ples klia olsem yu “kam long Jehova” na yu bilong Em.—Sekaraia 2:11, NW; Matyu 7:21.

OL I TINGTING GUT NA BIHAINIM ROT I STRET

¹⁰ Olgeta manmeri i bin kamap disaipel bilong Krais Jisas, olsem man bilong lotuim Jehova, ol yet i tingting pinis na ol i mekim olsem. Olgeta manmeri ol i bilong kisim Kingdom bilong heven, ol i bin mekim olsem. Nau rot i op bilong ol narapela tu i ken tingim wanem rot ol i laik bihainim. Sapos ol i tingting gut na bihainim rot i stret, ol inap abrusim bagarap long taim bilong bikpela hevi tru na i stap gutpela olgeta long graun. Hobap i makim gutpela pasin ol i ken bihainim.

¹¹ Hobap em i tambu bilong Moses, olsem susa bilong meri bilong Moses. Em i no bilong lain Isrel. Em i bilong wanpela lain ol i kolim Ken, em ol i stap long hap bilong ol Midian. Ol Isrel i kisim pinis Lo long han bilong Moses na ol i wokim pinis haus lotu sel bilong lotuim Jehova, na nau taim i kamap bilong ol i mas wokabaut i go long hap bilong not bilong i go kamap long Graun Bilong Promis. I gat wanpela smok i makim olsem Jehova i stap wantaim ol na dispela smok i mas i go paslain long ol bilong makim wanem rot ol i mas bihainim na bilong makim ples bilong wokim kem long en. Tasol sapos i gat wanpela man em i save gut long dispela hap na em inap soim rot long ol bilong kisim wara samting, dispela bai helpim ol. Moses i singautim Hobap bilong i go wantaim ol, tasol pastaim Hobap i no laik. Em i laik i stap wantaim ol wanlain bilong em long ples bilong em. Tasol Moses i kirapim em long tingting gut na i go wantaim ol na i stap olsem “ai” bilong ol Isrel, na bai em tu inap kisim ol blesing Jehova i laik givim long lain bilong em. Hobap i tingting gut na em i go wantaim ol, olsem Ol Hetman 1:16 i makim.—Nambas 10:29-32.

¹² Hobap em i olsem piksa na em i makim sampela manmeri long nau, em ol i no bilong lain Isrel bilong spirit, tasol ol i wokabaut wantaim dispela lain i go long Nupela Taim God i laik kamapim. Bilong mekim olsem ol i mas lusim lain bilong ol i save bihainim pasin bilong dispela graun, na ol i mas lusim ol gavman bilong dispela graun. Ol i bihainim Man I Winim Moses, em Krais Jisas, na ol i amamas long wok wantaim liklik hap lain bilong ol “brata” bilong Jisas ol i stap yet long graun. Planti taim ol i go pas na skelim ol nupela ples bilong autim gutpela tok bilong Kingdom long en. Planti ol i bin i go i stap long ol ples i sot long ol man bilong autim tok bilong Kingdom. Planti ol i go olsem painia o misineri. Ol i givim bel long tokim ol manmeri long Kingdom bilong God, em dispela Kingdom tasol inap helpim ol man. Rot i op yet bilong planti moa ol i ken insait long dispela wok bilong God, olsem na sapos i gat sampela inap mekim dispela wok, i gutpela ol i ken kirap mekim, na ol bai kisim ol blesing. Yu inap mekim olsem?

¹³ Hobap i tingting pinis na em i go wantaim ol Isrel na inap olsem 180 yia samting bihain wanpela tumbuna pikinini bilong em, nem bilong em Hiba, em i stap wantaim meri bilong em, Jel, klostu long Megido. Hiba i bin lusim ol arapela lain bilong Ken, na em i pren gut wantaim Jebin, em i wanpela king long ples Kenan. Dispela king i save mekim nogut tru long ol Isrel. Taim Jehova i kirapim Barak bilong helpim ol Isrel, kepten bilong ami bilong Jebin, em Sisera, em i singaut long 900 karis bilong pait na olgeta lain ami bilong em i kam na ol i go pait wantaim ol Isrel. Tasol Jehova i helpim lain bilong em. Em i mekim ol birua i longlong nabaut, na em i salim bikpela ren i kam daun na ol karis i pas insait long graun malumalum. Sisera i lusim karis bilong em na em i ranawe i go long hap bilong haus sel bilong Jel, em meri bilong Hiba. Sisera i ting meri bai singautim em i go insait, na meri i mekim olsem.—Ol Hetman 4:4-17; 5:20, 21.

¹⁴ Nau traim i kamap. Jel bai helpim dispela birua bilong lain bilong God o olsem wanem? Em i haitim Sisera aninit long wanpela blanket na em i kisim susu na em i givim long Sisera na em i dring. Nau Jel i wet inap long taim Sisera i slip. Em i lukim Sisera i slip pinis, orait em i “kisim wanpela hama na wanpela nil diwai bilong pasim banis bilong haus sel, na em i wokabaut isi isi i go long Sisera. Na em i paitim dispela nil diwai i go insait long het bilong Sisera, na nil i kamap long hap na i go olgeta long graun. Na Sisera i dai.” Bilong mekim olsem, Jel i mas strongim bel, na em i mas laikim tumas Jehova na lain bilong Jehova. Na em i mas kirap mekim sampela samting na wok strong long mekim.—Ol Hetman 4:18-22; 5:24-27, 31.

¹⁵ Ol narapela man bilong lotuim Jehova, em ol i no bilong lain Isrel, ol dispela man na Jel tu i olsem piksa na i makim ol “arapela sipsip” ol i mekim gut long ol “brata” spirit bilong Krais. Maski ol wanhaus o wanblut bilong ol i pas wantaim dispela graun na ol gavman bilong en, tasol ol dispela “arapela sipsip” i no orait long ol gavman i mekim nogut long lain bilong Jehova. Ol i stap gut long Man I Winim Barak, em Bikpela bilong yumi, Krais Jisas, na ol i helpim lain tru bilong em. Ol dispela manmeri, em Jel i piksa bilong ol, ol yet i no kirapim pait long ol gavman. Nogat. Tasol ol i givim bel long mekim olgeta samting bilong helpim ol wokboi bilong Jehova bambai ol man i no ken mekim nogut long ol. Ol i no pret long tokaut olsem ol i wanbel wantaim Jehova long ol samting em i laik mekim, olsem em i laik bagarapim olgeta birua bilong em.

¹⁶ Yumi no ken lusim taim. Sapos yu bilip tru long Jehova na long Kingdom bilong em i stap long han bilong Krais, na sapos yu bin stretim pasin bilong yu na bihainim ol lo bilong Baibel, orait kwiktaim yu mas kamapim dispela samting long ples klia. Yu mas bihainim pasin bilong man bilong Itiopia, em Aposel sapta 8 i stori long em. Taim Filip i autim gutnius bilong Jisas long em na em i save pinis long ol samting em i mas mekim, em i tokim Filip: “Wanem samting i pasim rot na mi no inap kisim baptais?” Na kwiktaim em i kisim baptais.

¹⁷ Sapos yu bin mekim olsem, orait, nau long olgeta de yu mas mekim ol samting bilong helpim yu long i stap gut long ai bilong Jehova, na oltaim yu mas wok long bihainim moa yet ol tok bilong God; na yu mas givim bel long mekim wok bilong autim tok bilong Kingdom inap long skel bilong yu nau long las taim.

[Askim Bilong Stadi]

1. Olgeta wan wan i mas tingim wanem samting long nau?

2. (a) Tingting bilong papa o mama long mekim wok bilong Jehova, bilong wanem dispela i bikpela samting? (b) Kolim 5-pela samting ol papamama i ken mekim bilong helpim pikinini bilong ol long kirap wokabaut long rot i go long laip.

3. (a) Sapos famili bilong yu i birua long yu, ating yu ken mekim wanem? (b) Tasol olsem wanem sapos ol i birua yet long yu?

4. Yumi ken mekim wanem bilong kamapim bel bilong yumi, yumi givim bel tru long Jehova?

5. (a) Wanem samting i mas kamap long taim bilong yumi olsem Aisaia 11:10 i tok profet long en? (b) Wanem insait bilong dispela tok?

6. (a) Olsem wanem ol man bilong graun ol inap bung long wanpela King bilong heven? (b) Ol manmeri i go long dispela Mak “bilong kisim save,” ol i kisim save long wanem samting?

7. Sampela man i harim tok bilong Baibel na ol i mekim wanem, olsem Esikiel 33:30-33 i tok?

8. Sampela man i mekim wanem na i olsem ol i harim nating?

9. Ol man i gat gutpela tingting ol i no save stap arere tasol na wet i stap; ol i mekim wanem?

10, 11. (a) Hobap em i husat? Moses i singautim em bilong mekim wanem? (b) Olsem wanem yumi save long ol samting em i tingting pinis long mekim?

12. (a) Husat long nau ol i olsem Hobap? Olsem wanem ol i olsem em? (b) I gat wanem wok long nau i kain olsem dispela wok Moses i singautim Hobap long mekim?

13. (a) Jel em i husat? Man bilong em i ting olsem wanem long ol man i biruaim ol wokboi bilong Jehova? (b) Wanem samting i kamap na traim i painim Jel?

14. Jel i tingting pinis long mekim wanem? Dispela i kamapim long ples klia wanem samting?

15. Sampela manmeri long nau i mekim wanem na ol i kain olsem Jel?

16, 17. (a) Aposel sapta 8 i stori long wanem samting i makim pasin yumi mas bihainim? (b) Taim yumi mekim pinis dispela samting, bihain yumi mas wok long mekim wanem?