Stap Fri

Stori: Pasin bilong i stap fri em olsem: Man i no larim ol narapela i bosim em, o em i tok i no gat man i bosim em. God i wokim yumi bambai yumi yet inap tingim ol samting yumi laik mekim, olsem na yumi gat laik long i stap fri liklik. Tasol yumi mas was gut, nogut dispela laik i mekim na yumi sakim tok na bikhet.

Ol man i sakim ol lo bilong Baibel, yu ting ol i stap fri tru?

Ro 6:​16, 23: “Sapos yupela i givim yupela yet long wanpela man na bihainim tok bilong em, orait yupela bai i stap wokboi bilong em. Olsem tasol, yupela i ken i stap wokboi bilong sin, na dispela bai i mekim yupela i dai. O yupela i ken wok long bihainim tok bilong God na bai yupela i kamap stretpela manmeri. Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim.”

Ga 6:​7-9: “Yu planim pikinini bilong wanem kain kaikai, em dispela kain kaikai tasol bai i kamap . . . Sapos wanpela man i bihainim ol laik bilong olpela bel bilong em yet, orait dispela . . . bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim. Olsem na yumi no ken les long mekim gutpela pasin.”

Pasin pamuk: “Man i mekim pasin pamuk, em i mekim nogut long bodi bilong em yet.” (1 Ko 6:18) “Sapos man i slip wantaim meri bilong narapela man, em i . . . bagarapim em yet.” (Snd 6:32) (Rom 1:​24-27 i stori long pasin bilong sodom.) (Ol dispela kain pasin, ating ol i mekim man o meri i amamas pastaim, tasol ol i kamapim kaikai nogut, olsem olkain sik nogut, kisim bel nating, rausim bel, tingting nogut, bel i gat tok, bel hevi, kros bilong God. Na sapos God i kros long yumi, bai yumi no inap i stap laip long bihain.)

Laikim tumas mani: “Ol man i laikim tumas long kisim planti mani samting, ol traim bai i kamap na holimpas ol . . . [na] ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, . . . na ol i lusim bilip pinis, na ol i karim bikpela hevi moa.” (1 Ti 6:​9, 10) “Bai mi tok long mi yet olsem, ‘Man mi win tru ya. Mi gat planti gutpela samting i stap inap long planti yia. Orait nau mi ken . . . amamas i stap.’ Tasol God i tokim em olsem, ‘Yu longlong man tru. Nau long dispela nait tasol bai yu dai. Na olgeta dispela samting . . . em husat bai i kisim?’ . . . ‘Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.’ ” (Lu 12:​19-21) (Mani samting i no inap helpim man long i stap amamas oltaim. Man i wok strong long kisim planti samting, ating bai famili bilong em i no stap amamas, o sik i painim em, o em i lusim bilip.)

Dring tumas: “Wanem ol man i gat bikpela hevi na . . . i save toktok planti na kirapim pait? Na wanem ol man i save kisim sua long skin bilong ol? Na ai bilong wanem ol man i save ret oltaim? Em ol man i save dring planti wain na bia samting . . . Nogut yu larim wain i pulim yu . . . Bihain bai yu pilim olsem wanpela snek nogut i bin kaikaim yu.” (Snd 23:​29-32) (Man i dring, ating em i lusim tingting long ol hevi bilong em. Tasol dring i no stretim ol hevi; em i kamapim sampela hevi moa. Man i dring planti tumas, bai em i no amamas moa long em yet, bai em i gat sik, bai sindaun bilong famili i bagarap, bai em i no stap gutpela moa wantaim God.)

Kisim nating ol drak: Lukim het-tok “Drak,” pes 89-95.

Ol poroman nogut: Sapos wanpela lain raskol i tokim yu ol i save long rot bilong kisim planti mani, no gat hatwok, bai yu go wantaim ol? “Sapos ol raskol i mekim dispela kain tok long yu, orait yu no ken . . . bihainim ol. Oltaim ol dispela kain man i laikim tumas long mekim ol pasin nogut.” (Snd 1:​10-19) Sapos wanpela man i no lotu long Jehova, tasol em i olsem gutpela man, yu ting i orait yu poroman wantaim em? Sekem em i pikinini man bilong wanpela hetman, na Baibel i tok, ol man i save “givim biknem tru long Sekem. Em i nambawan tru long ai bilong ol.” Tasol “em i pulim [Daina] na mekim pasin nogut long em.” (Stt 34:​1, 2, 19) Sapos ol narapela i no bilipim ol tok i tru yu bin kisim save long en, yu mas tingim dispela o nogat? “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” (1 Ko 15:33) Jehova bai ting olsem wanem sapos yu poroman wantaim ol man i no laikim em? Wanpela king bilong Juda i mekim olsem na profet bilong Jehova i tokim em: “Bikpela i belhat long yu.”​—⁠2 Sto 19:​1, 2.

Husat i bin kirapim ol man long sakim tok bilong God bambai ol i ken kamap fri na ol yet i ken skelim ol samting?

Stt 3:​1-5: “Na snek [olsem maus bilong Satan; lukim KTH 12:9] i askim meri olsem, ‘Ating God i tambuim yutupela long kaikai pikinini bilong olgeta diwai bilong gaden, a?’ Na meri i bekim tok olsem, ‘Mitupela i ken kaikai pikinini bilong olgeta diwai bilong dispela gaden. Tasol wanpela diwai i sanap namel tru, em God i tambuim . . . God i bin tokim mitupela olsem, “Yutupela i no ken kaikai pikinini bilong dispela diwai, . . . nogut yutupela i dai.” ’ Orait na snek i tokim meri olsem, ‘Nogat. Yutupela i no inap i dai. . . . [Bai] yutupela i kisim save long wanem samting i gutpela, na wanem samting i nogut, . . . wankain olsem God.’ ”

Wanem kain tingting i kirapim man long sakim laik bilong God bambai em i ken bihainim laik bilong em yet?

Ef 2:​1-3: “Bipo yupela i . . . bin wokabaut long pasin nogut bilong dispela graun [Satan i bosim]. Yupela i bin bihainim pasin bilong hetman bilong ol spirit nogut . . . em dispela strongpela spirit i wok yet insait long bel bilong ol man i save sakim tok bilong God. Bipo yumi olgeta i bin i stap wantaim dispela lain, na yumi bihainim laik nogut bilong olpela bel . . . na laik bilong tingting bilong yumi yet. Na long taim yumi bin i stap olsem, yumi inap kisim pe nogut God i redim pinis bilong givim long olgeta manmeri i mekim dispela kain pasin.”

Ol man i tok ol i mekim wok bilong God ol i mas sakim wanem olkain pasin bikhet?

Snd 16:18: “Pasin bilong hambak na litimapim nem bilong yu yet bai i mekim yu i pundaun na bagarap.”

Snd 5:12: “Bai yu tok olsem, ‘Mi longlong tru. Bilong wanem mi bikhet na mi no larim ol man i stretim mi?’ ” (Ol ves klostu i kamapim klia olsem, man i bihainim kain pasin olsem, ol bikpela hevi inap painim em.)

Nam 16:3: “Dispela ol man i [bikhet] long Moses wantaim Aron [em God i makim tupela i stap hetman bilong lain bilong em] na tokim tupela olsem, ‘Harim. Yumi olgeta i bilong Bikpela. I no yutupela tasol. . . . Olsem na bilong wanem yutupela i litimapim yutupela yet na bosim mipela?’ ”

Ju 16: “Ol dispela man ol i save bel nogut long olgeta samting i kamap long ol, na ol i save toktok planti oltaim. Ol i save bihainim ol laik nogut bilong bel bilong ol yet. Ol i save bikmaus na hambak nabaut . . . Na ol i save grisim ol man, bilong mekim ol i bihainim laik bilong ol.”

3 Jo 9: “Diotrefes em i laik i stap namba wan bilong ol, na em i no save harim tok bilong mipela.”

Snd 18:1: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.”

Je 4:​13-15: “Mi gat tok long yupela ol man i save tok olsem, ‘Ating nau o tumora mi bai go long wanpela taun na mi bai mekim wok bisnis inap long wanpela yia. Na . . . mi bai kisim planti mani.’ Yupela i . . . no save wanem samting bai i kamap long tumora. . . . Mobeta yupela i tok olsem, ‘Sapos Bikpela i laik, orait mi bai stap laip na mi mekim dispela samting mi ting long mekim.’ ”

Sapos Kristen i laik i stap fri na em i kirap bihainim pasin bilong graun, em i stap aninit long strong bilong husat? God i ting olsem wanem long dispela?

1 Jo 2:15; 5:19: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa.” “Dispela graun olgeta em i stap aninit long strong bilong Satan.”

Je 4:4: “Sapos man i laikim pasin bilong graun, . . . em bai i kamap birua bilong God.”