Sapta 64

Em i Lainim Ol Long Lusim Rong Bilong Narapela

JISAS i stap yet long wanpela haus long Kaperneam na em i tokim ol disaipel long ol samting ol i mas mekim taim hevi i kamap namel long ol brata. Olsem na Pita i askim em: “Bikpela, hamas taim brata bilong mi i ken mekim rong long mi, na mi mas lusim rong bilong en?” Ol tisa bilong lotu Juda i tok, ol i mas lusim tingting long rong bilong brata inap 3-pela taim, olsem na Pita i ting sapos em i lusim rong bilong brata inap 7-pela taim, em i mekim gutpela pasin.

Tasol i no stret sapos yumi kaunim hamas taim yumi lusim rong bilong man, a? Olsem na Jisas i stretim Pita na i tok: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.”

Jisas i laik bai ol disaipel i save ol i mas lusim tingting long rong bilong narapela, olsem na em i mekim tok piksa long wanpela king i laik stretim dinau wantaim ol wokboi bilong em. Wanpela wokboi i gat bikpela dinau tru inap 10 milion kina na em i no inap bekim. Orait king i tok ol i mas baim dispela man wantaim meri pikinini i go wok kalabus bilong bekim dinau.

Wokboi i harim dispela tok na em i brukim skru na krai long king: “Yu mas sori long mi na wetim mi. Bai mi bekim olgeta dinau.”

King i sori long dispela wokboi, na em i lusim dinau bilong em. Bihain wokboi i go ausait, na em i painim wanpela wanwok i gat dinau long em inap 10 kina tasol. Em i holim strong nek bilong wanwok na i tok: “Yu mas bekim olgeta dispela dinau.”

Wanwok i no gat 10 kina, olsem na em i brukim skru na i tok: “Yu mas sori long mi na wetim mi. Bai mi bekim dinau.” Tasol man ya i no bihainim pasin sori bilong king. Em i putim wanwok long kalabus inap long em i bekim dinau.

Jisas i stori moa, olsem: Ol narapela wokboi bilong king i lukim dispela samting i kamap na ol i go tokim king. King i bel nogut tru na em i singautim namba wan wokboi i kam long em. Em i tok: “Yu wokboi nogut. Pastaim yu krai long mi, na mi lusim olgeta dinau bilong yu. Mi bin sori long yu. Olsem na watpo yu no sori tu long wanwok bilong yu?” King i belhat, olsem na em i putim dispela man long kalabus inap long em i bekim olgeta dinau bilong em.

Jisas i tok: “Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”

Tok bilong Jisas i lainim gut yumi, na yumi save yumi mas lusim tingting long rong narapela man i mekim long yumi, a? Jehova i lusim tingting long ol rong yumi mekim long em, tasol sapos yumi skelim ol dispela rong wantaim rong ol brata i mekim long yumi, rong bilong ol i liklik. Na Jehova i bin lusim tingting long rong bilong yumi inap planti tausen taim. Olsem na sapos sampela taim brata i mekim rong long yumi, orait yumi ken lusim tingting long dispela rong bilong em, a? Yumi mas tingim dispela tok Jisas i mekim long maunten, em i tok, God bai “lusim ol rong bilong [yumi] ,” sapos yumi “lusim ol rong ol arapela i mekim long [yumi] .” Matyu 18:​21-35; 6:12; Kolosi 3:13.

▪ Wanem samting i kirapim Pita long askim Jisas long pasin bilong lusim tingting long rong brata i mekim long em? Ating wanem samting i mekim na Pita i ting, sapos em i lusim tingting long rong bilong brata inap 7-pela taim, em i mekim gutpela pasin?

▪ King i mekim wanem long taim wokboi i krai long king i mas sori long em? Wokboi i mekim wanem long taim wanwok i krai long em i mas sori long em?

▪ Dispela tok piksa bilong Jisas i lainim yumi long wanem samting?