Buk Bilong Baibel Namba 15—Esra
Man Bilong Raitim: Esra
Ples Em i Bin Raitim: Jerusalem
Raitim Pinis: 460 B.C.E. samting
Taim: 537–467 B.C.E. samting
1. Wanem ol tok profet i kamapim klia olsem bihain bai ol i stretim bek Jerusalem?
OL PROFET i makim 70 yia bilong Jerusalem i mas bagarap na i stap aninit long ol Babilon, na nau dispela 70 yia i laik pinis. Olgeta man i save, ol Babilon i no save larim ol kalabusman i go fri, tasol tok bilong Jehova i winim strong bilong Babilon. Nau bai lain bilong Jehova i lusim kalabus. Bai ol i wokim gen haus lotu bilong Jehova, na mekim gen ol ofa long alta bilong em bilong tekewe sin. Ol man bilong lotu tru long Jehova bai pulap gen long Jerusalem, na bai ol i litimapim nem bilong em. Jeremaia i bin kolim hamas yia ol bai kalabus long Babilon, na Aisaia i bin tokaut long ol bai lusim kalabus olsem wanem. Aisaia i tok, Sairus bilong Persia bai ‘mekim olgeta wok bilong God.’ Em bai daunim hambak taun Babilon, em i stap namba 3 bikpela gavman long lista bilong Baibel.—Ais 44:28; 45:1, 2; Jer 25:12.
2. Wanem taim Babilon i bagarap? Em i bagarap olsem wanem?
2 Babilon i bagarap long nait bilong Oktoba 5, 539 B.C.E. (kalenda bilong Gregori). King Belsasar bilong Babilon na ol bikman i pati i stap; ol i dring wain na litimapim nem bilong ol god i olsem spirit nogut. Ol dispela haidenman i mekim pasin nogut tru—ol i pulimapim wain long ol kap holi bilong haus lotu bilong Jehova long Jerusalem, na ol i dring spak! Gutpela tru Sairus i kam pinis na wet ausait long Babilon bilong truim dispela tok profet!
3. Sairus i mekim wanem tok na ol inap kirapim bek lotu bilong Jehova 70 yia stret bihain long taim Jerusalem i bagarap?
3 Yia 539 B.C.E. em i bikpela yia, long wanem, ol man bilong dispela graun na Baibel i wanbel long tok, Babilon i bin bagarap long dispela yia. Long namba wan yia Sairus i stap king bilong Babilon, “em i mekim wanpela tok” na em i orait long ol Juda i go bek long Jerusalem na wokim gen haus bilong Jehova. Em i bin mekim dispela tok long pinis bilong yia 538 B.C.E. o long kirap bilong yia 537 B.C.E.a Liklik lain ol i go bek na ol i wokim pinis alta na kirap gen long mekim ol ofa “taim namba 7 mun i kamap” (mun Tisri, olsem Septemba-Oktoba) long yia 537 B.C.E.—em 70 yia stret bihain long taim Nebukatnesar i bin bagarapim Juda na Jerusalem.—Esr 1:1-3; 3:1-6.
4. (a) Wanem as tok bilong Buk Esra? Husat i raitim dispela buk? (b) Em i raitim long wanem taim? Em i stori long ol samting i bin kamap insait long hamas yia?
4 Stretim bek! Em as tok bilong buk bilong Esra. Long Esra 7:27 i go inap 9:15, man bilong raitim Buk Esra i tok, “Mi Esra,” olsem na yumi save Esra i bin raitim. Esra “i save gut” long lo God i givim long ol Israel long han bilong Moses, na em i wok strong long “bihainim gut dispela lo” na “skulim gut ol Israel” long en, olsem na em inap tru long raitim dispela stori, olsem em i bin raitim Namba 1 Stori na Namba 2 Stori. (Esr 7:6, 10) Buk Esra i skruim moa stori bilong ol samting Namba 1 Stori na Namba 2 Stori i tok long en, olsem na planti man i ting Esra i bin raitim long wankain taim, olsem long yia 460 B.C.E. Buk i stori long ol samting i bin kamap insait long 70 yia, kirap long taim ol Juda i stap kalabus yet na ol i bilong “i dai,” na i go inap long taim ol i wokim gen haus lotu na Esra i go bek long Jerusalem na stretim ol pris.—Esr 1:1; 7:7; 10:17; Sng 102:20.
5. Olsem wanem long Buk Esra na Buk Nehemia long pastaim? Esra i raitim buk bilong em long wanem ol tok ples?
5 Long tok Hibru, insait bilong nem Esra i olsem “Helpim.” Pastaim Buk Esra na Buk Nehemia i wanpela buk tasol. (Neh 3:32)b Bihain ol Juda i mekim i kamap tupela buk, na ol i kolim Esra Buk 1 na Buk 2. Long nau ol Baibel Hibru na planti narapela Baibel ol i kolim dispela tupela buk olsem Buk Esra na Buk Nehemia. Hap tok bilong Buk Esra (4:8 inap 6:18 na 7:12-26) em i raitim long tok Aram, na ol narapela tok em i raitim long tok Hibru. Esra i save gut long dispela tupela tok ples wantaim.
6. Wanem samting i makim olsem tok bilong Buk Esra i stret?
6 Long nau planti saveman i bilip olsem ol tok bilong Buk Esra i stret. Wanpela man (W. F. Albright) i stori long Buk Esra em i hap tru bilong Baibel, na em i tok: “Ol samting bilong bipo ol man i painim pinis i kamapim klia olsem buk bilong Jeremaia na Esekiel, na bilong Esra na Nehemia tu, ol i wankain olsem bilong pastaim na ol i stori stret long ol samting i bin kamap long bipo na taim bilong en.”—Buk The Bible After Twenty Years of Archaeology.
7. Olsem wanem yumi ken save, Buk Esra em i hap tru bilong Baibel?
7 Tru ol man bilong raitim Ol Skripsa Grik ol i no bin kamapim tru sampela tok bilong Buk Esra, tasol yumi ken save em i hap tru bilong Baibel. Em i stori long ol samting Jehova i mekim long ol Juda i kam inap long taim ol i bungim na raitim lista bilong ol liklik buk bilong Ol Skripsa Hibru. Ol Juda bilong bipo i tok, Esra i bin mekim dispela wok. Na Buk Esra i kamapim klia truim bilong olgeta tok profet long stretim bek Jerusalem, olsem na yumi save, em i hap tru bilong Baibel. Ol tok bilong Esra i stret wantaim ol narapela tok bilong Baibel. Dispela buk i stori gut long lotu i tru, na em i litimapim nem bilong God Jehova.
HELPIM YUMI OLSEM WANEM?
14. Buk Esra i kamapim klia wanem samting long ol tok profet bilong Jehova?
14 Buk Esra i helpim yumi long save, olgeta samting i save kamap stret tru olsem Jehova i tok profet pinis long en. Jeremaia i tok, Jerusalem i mas bagarap na 70 yia bihain bai ol i wokim gen. (Jer 29:10) Stret long taim, Jehova i marimari long lain bilong em na kisim liklik hap lain i go bek long Graun Bilong Promis bilong kirapim gen lotu i tru.
15. (a) Jehova i mekim wanem wok long namba 2 haus lotu bilong kamapim laik bilong em? (b) Olsem wanem dispela haus lotu i no gutpela olsem namba wan haus lotu?
15 Ol i stretim bek haus lotu na dispela i litimapim lotu bilong Jehova long ai bilong lain bilong em, na i makim olsem em i save mekim gut tru long ol man i tanim bel i go long em na ol i laik lotu tru long em. Namba 2 haus lotu i no gutpela olsem haus lotu Solomon i bin wokim, tasol God i mekim wok long en bilong kamapim laik bilong em. Dispela haus lotu i no gat ol gutpela samting bilong skin olsem haus lotu bilong Solomon, na em i sot long planti gutpela samting bilong spirit, olsem bokis kontrak.c Na dispela haus Serubabel i wokim, taim ol i givim long God, ol i no mekim planti ofa samting olsem ol i bin mekim long taim bilong givim haus lotu long God long taim bilong Solomon. Klaut i gat bikpela lait i no pulap long namba 2 haus, na Jehova i no salim paia i kam daun na kukim ol ofa. Tasol tupela haus wantaim i mekim bikpela wok long litimapim nem bilong Jehova, em i God tru.
16. Tasol wanem narapela haus lotu i winim tru olgeta haus lotu ol man i wokim?
16 Haus lotu Serubabel i wokim, na haus lotu sel Moses i sanapim, na haus lotu em Solomon na Herot i wokim, na ol samting bilong en, olgeta i olsem piksa. Ol i makim “haus tru bilong God. Dispela haus ol man i no bin sanapim. Nogat. Bikpela yet i bin sanapim.” (Hi 8:2) Dispela haus lotu spirit em pasin God i kamapim bilong lotu long em long rot bilong ofa bilong Krais. (Hi 9:2-10, 23) Dispela bikpela haus lotu spirit bilong Jehova i lait moa moa yet na i naispela tru na i gutpela moa yet na i no inap bagarap; em i winim tru ol haus lotu ol man i wokim.
17. Buk Esra i skulim yumi long wanem ol gutpela pasin?
17 Buk Esra i skulim ol Kristen long planti samting. Em i stori long lain bilong Jehova i amamas na givim ol samting long laik bilong ol yet bilong helpim wok bilong Jehova. (Esr 2:68; 2 Ko 9:7) Jehova i makim taim bilong bung na litimapim nem bilong em, na em i blesim ol dispela bung; dispela i strongim yumi long nau. (Esr 6:16, 22) Ol wokman bilong haus bilong God na ol narapela bilipman i no bilong lain Israel, ol i makim gutpela pasin yumi ken bihainim—ol i go wantaim liklik lain Israel na givim bel olgeta long helpim lotu bilong Jehova. (2:43, 55) Yumi ken tingim tu gutpela pasin daun ol man i mekim taim Esra i tokim ol, ol i gat rong long maritim ol meri haiden; ol i hevi long rong bilong ol na ol i wok long stretim. (10:2-4) Taim ol i poromanim ol man nogut, God i belhat long ol. (9:14, 15) Taim ol i amamas na wok strong long mekim wok bilong em, em i orait long ol na mekim gut long ol.—6:14, 21, 22.
18. Lain bilong Jehova i go bek long ples na stretim bek pasin bilong ol, na olsem wanem dispela i bikpela samting i mas kamap pastaim na bihain dispela Bikman, em King, em bai kam?
18 No gat king moa i sindaun long sia king bilong Jehova long Jerusalem, tasol taim ol Israel i go bek long ples, dispela i strongim ol long wetim King bilong lain bilong Devit, em Jehova i tok promis long kamapim. Ol i stretim bek pasin bilong ol, na nau ol inap lukautim ol tok na lotu bilong God i go inap long taim dispela Mesaia i kam, em dispela Bikman God i bin makim. Sapos dispela liklik lain i no bin bilip na go bek long ples, dispela Bikman bai kam long husat? Tru tumas, ol samting Buk Esra i stori long en em ol bikpela samting i mas kamap pastaim na bihain dispela Bikman, em King, em bai kam! Taim yumi stadi long ol dispela tok long nau, dispela i helpim yumi.
[Ol Futnot]
a Buk Insight on the Scriptures, Vol. 1, pes 452-454, 458.
b Long New World Translation of the Holy Scriptures—With References, sta daunbilo long dispela ves i tok: “Long arere bilong Baibel Hibru em ol Masoret i bin wokim, long dispela ves ol i raitim wanpela tok Hibru, insait bilong en i olsem ‘wanpela hap bilong buk,’ na dispela i makim olsem dispela ves i stap namel long 685 ves Hibru bilong Buk Esra na Buk Nehemia em ol i bungim wantaim, na long dispela Baibel Hibru, Esra na Nehemia i wanpela buk tasol.”
c Buk Insight on the Scriptures, Vol. 2, pes 1079.