Wanem Samting i Laik Painim Dispela Graun?
Ol bikpela hevi na ol samting nogut tru i save kamap long olgeta hap bilong graun! Dispela i makim wanem samting?
BAGARAPIM LAIP: Ol bom i pairap long ol ples maket. Long skul ol i sutim ol tisa na sumatin long gan. Ol i stilim ol pikinini taim papamama i no lukim. Long san ol i hansapim na stilim mani samting bilong ol meri na ol lapun man.
OL LOTU: Ol misin i sapotim ol lain i pait long woa. Ol i sutim tok long ol pris pasto olsem ol i insait long pasin bilong bagarapim na pinisim wanpela lain olgeta. Ol pris i mekim pasin sem long ol yangpela; misin i haitim dispela. Namba bilong ol man i go long lotu i go daun; ol i salim ol haus lotu.
OL SAMTING BILONG GRAUN: Ol i rausim ol samting long bikbus bilong mekim wok bisnis. Ol rabisman i katim na rausim ol diwai bilong kisim paiawut samting. Wara insait long graun i doti, i no gutpela long dring. Marasin nogut bilong ol faktori na sampela nupela pasin bilong kisim pis i bagarapim wok bilong kisim pis. Ol marasin nogut long win i mekim na ol man i no inap pulim gut win.
WOK MANI: Long hap saut bilong ples wesan Sahara long Afrika, olgeta man wan wan i kisim 480 dola tasol long olgeta yia. Ol bikman bilong bisnis i mangal long mani, olsem na ol bisnis i pundaun, na planti tausen ol i no gat wok mani. Pasin giaman i mekim na mani ol man i bin bungim inap planti yia em i lus.
KAIKAI I SOT: Inap 800 milion manmeri long olgeta hap i stap hangre.
WOA: Winim 100 milion manmeri i dai long ol woa i bin kamap long yia 1901-2000. Planti bom nuklia i stap inap long bagarapim olgeta manmeri bilong graun inap planti taim. Ol pait insait long kantri. Pasin teroris i go bikpela na i senisim sindaun bilong ol man long olgeta hap.
OL BIKPELA SIK NA OL ARAPELA SIK: Kirap long 1918, bikpela sik kus bilong Spen i kilim i dai 21 milion manmeri. Sik AIDS i bin kamap “nambawan bikpela sik i bagarapim ol man.” Sik kensa na sik bilong klok i kamapim bikpela bel hevi long olgeta hap bilong graun.
No ken tingting tasol long ol wan wan samting i wok long kamap long nau. Yu ting ol dispela samting i kamap long wan wan hap tasol? O yu ting ol dispela samting i olsem hap bilong wanpela bikpela samting i wok long kamap long olgeta hap na i gat bikpela mining bilong en?
[Blok/Piksa long pes 5]
God i Save Tingim Tru Yumi o Nogat?
Planti man i bel hevi long ol samting nogut tru i wok long kamap o long wanpela bikpela hevi i painim ol, na ol i ting bilong wanem God i no mekim sampela samting na bai ol kain samting olsem i no ken kamap.
God i save tingim tru yumi. Em i givim ol gutpela tok bilong stiaim yumi na mekim gut bel bilong yumi long nau. (Matyu 11:28-30; 2 Timoti 3:16, 17) Em i bin stretim rot bilong pinisim tru pasin bilong pait na bagarapim man, ol sik, na indai. Ol samting em i givim bilong helpim yumi i soim olsem em i no tingim ol man bilong wanpela kantri tasol, nogat; em i tingim ol man bilong olgeta kantri, lain, na tok ples.—Aposel 10:34, 35.
Yumi tingim tru God o nogat? Yu save long husat em i Man Bilong Wokim heven na graun? Wanem nem bilong em? Wanem ol samting em i tingting pinis long mekim? Em i bekim ol dispela askim long Baibel. Long Baibel em i tokim yumi long ol samting em i wok long mekim bilong pinisim pasin bilong pait na bagarapim man na sik na indai. Yumi mas mekim wanem na bai dispela samting i ken helpim yumi? Yumi mas kisim save long em na ol samting em i tingting pinis long mekim. Yumi no inap ting ol samting God i bin mekim inap helpim yumi sapos yumi no bilip long em. (Jon 3:16; Hibru 11:6) Yumi mas bihainim tu ol lo bilong em. (1 Jon 5:3) Yu save tingim tru God na yu redi long bihainim ol lo bilong em?
Bilong save gut long as na God i larim ol samting nogut bilong nau i stap, yumi mas kliagut long wanpela bikpela tok. Baibel i kamapim gut dispela tok. Long pes 15 bilong dispela nius, yu inap kisim save long dispela bikpela tok.