Sapta 1
Olsem Wanem Long Dispela Graun Long Bihain?
LONG NAU planti bilion manmeri ol i stap long graun, na yu stap namel long ol. Orait, olsem wanem long i stap bilong yu long bihain? Yu laik bai yu gat gutpela sindaun na yu stap bel isi na yu stap wantaim ol man em narapela i save laikim tru narapela? Yu inap kisim dispela kain gutpela sindaun na planti gutpela samting moa. Tasol planti man long nau ol i no ting long kisim gutpela sindaun olsem long bihain. Bilong wanem?
2 Long wanem, ol i ting bai pait nuklia i kamap na planti planti manmeri bai ol i bagarap. Long yia 1945, long namba wan taim, ol i tromoi wanpela bom nogut bilong nuklia long taim bilong pait. Dispela bom i kilim i dai wantu tasol 70,000 man meri pikinini. Na planti tausen moa ol i karim bikpela pen na bihain bihain ol i dai. Tasol nau ol man i wokim ol bom i moa nogut na wanpela tasol i gat bikpela strong tru inap olsem olgeta bom wantaim ol i bin tromoi long taim bilong Namba Tu Pait. Ol i wokim pinis planti tausen tausen bom olsem na i redi i stap. Tasol ol i wok yet long tromoi bikpela mani (inap olsem K2,000,000,000 long olgeta de) long wokim moa moa bom olsem, na planti man i pret nogut long dispela samting.
3 Tasol olsem wanem sapos ol i kirapim pait nuklia na tromoi wan wan bom tasol? Dispela tu bai kamapim bikpela bagarap tru long graun. Wanpela saveman bilong saiens, em Carl Sagan, em i tok, sapos ol lain man i tromoi sampela tasol bilong ol bom nogut ol i hipim pinis “bai olgeta man bilong graun i bagarap.” Planti man i no laik tingim dispela samting nogut em inap kamap, tasol dispela samting inap kamap maski ol i no laik tingim. Na sampela man i tingim dispela bikpela bagarap inap kamap na ol i bung wantaim na wokim sampela ples hait longwe long ol man na ol i bungim kaikai na marasin samting insait long en, na ol i putim gan tu bilong rausim ol narapela man na ol i no ken kam insait. Ol i ting long dispela rot bai ol inap abrusim bagarap.
4 Ol saveman bilong saiens i tok, i no pait nuklia tasol inap bagarapim dispela graun; ol samting ol man i mekim long nau i wok long bagarapim graun na ol samting i stap long en. Ol dispela saveman i tingting planti long ol smok nogut i bagarapim win. Na ol man i wok long katim katim planti diwai na pinisim bus, tasol ol dispela diwai i gat bikpela wok long klinim win na pulim ren, na rop bilong diwai i holimpas graun na ren i no ken wasim gris bilong graun i go. Ol man i no gat save o ol i mangal long mani na ol i bagarapim gutpela graun bilong wokim gaden. Na ol i bagarapim wara ol man i save dring long en; planti taim ol i tromoi marasin nogut long wara, em inap kilim man i dai. Ol i bagarapim ol samting ol man i mas kisim bambai ol i ken i stap laip.
5 Tasol ating yu tingim pasin raskol i go bikpela nau long dispela taim na ol man i olsem i stap kalabus insait long haus bilong ol yet. Planti man i kros long samting bilong politik o bilong sindaun bilong ol na ol i pait wantaim gavman na bagarap inap painim yumi long dispela tu. Planti man i no gat wok na pe bilong ol samting i go antap, dispela samting i givim bikpela hevi long ol man na planti ol i stap rabis na ol i pilim olsem ol i no gat rot. Planti famili ol i no sindaun gut wantaim; no gat pasin sori i stap namel long ol. Long olgeta hap ol man i save tingim ol yet tasol.
6 Orait, i gat wanem rot na yumi inap painim tru gutpela sindaun? Sapos yumi wetim dispela gutpela sindaun i kamap long rot bilong ol man na ol gavman bilong graun, sori tumas, bai yumi lus tru. Long wanem ol yet i gat hap asua long ol dispela hevi yumi stori pinis long en. Tasol tru yumi mas wetim ol man bilong graun i givim dispela gutpela sindaun long yumi?
OL SAMTING YUMI MAS TINGIM
7 Planti taim ol man i no tingim Bikpela Man em i bin wokim dispela graun na ol man i stap long en. Tasol olsem wanem yumi inap save long ol samting Em i laik mekim? Baibel i tokim yumi. Planti taim Baibel i tok, spirit bilong God i as bilong ol tok bilong en. Sapos olsem, orait, yu mas bihainim ol tok bilong Baibel bambai yu ken i stap laip. Dispela em i bikpela samting, olsem na mipela laik kirapim yu long lainim ol tok bilong Baibel. Bai yu kirap nogut long ol tok profet bilong en i makim stret ol samting i laik kamap bihain. Ol tok bilong en i gat gutpela save na tingting long en bilong helpim yu long i stap amamas oltaim. I no gat narapela buk olsem. Mipela i save, sapos yu tingim gut ol tok bilong Baibel bai yu save, God em i as bilong ol dispela tok, em dispela God i save laikim tru ol man. Baibel i tokim yumi long ol samting yumi mas save long en bambai yumi no ken bagarap long dispela taim nogut bilong planti hevi nau yumi stap long en. Olsem na i stret dispela buk Baibel i kamap long olgeta hap bilong graun na planti man i holim, winim olgeta narapela buk.—Lukim 2 Pita 1:20, 21; 3:11-14; 2 Timoti 3:1-5, 14-17.
8 Namba wan tok bilong Baibel i kamapim wanpela bikpela as tok i tru, em i tok, God i wokim heven na graun. (Jenesis 1:1) Sampela man i ting God i no gat nem, tasol Baibel i kamapim nem bilong God. Long Jenesis 2:4 Baibel i tok: “Yawe [Jehova] God i mekim kamap heven na graun.”a (Lukim tu Jenesis 14:22; Eksodas 6:3; 20:11) Bikpela hap tok bilong Baibel ol i bin raitim pastaim long tok Hibru, na long tok Hibru ol i raitim nem bilong God planti taim, inap olsem 7,000 samting, na ol i raitim olsem יהוה. Sampela man bilong tanim tok bilong Baibel ol i raitim nem bilong God olsem Yawe, tasol long tok Inglis planti Baibel i raitim olsem Jehovah.
9 Dispela nem i no kamap nating long tingting bilong ol man i lotuim God. Nogat. Bikpela Man bilong wokim heven na graun, em yet i tingim dispela nem. (Eksodas 3:13-15; Aisaia 42:8) I no wanpela nem yumi ken senisim nabaut na sampela taim yumi kolim God olsem Buda o Brama o Ala o Jisas. Nogat. Profet Moses i tok stret olsem long lain Isrel, em i tok: “Yupela i save pinis, na bel bilong yupela i mas tingim gen olsem Jehova [tok Hibru: יהוה] em i God tru long heven antap na long graun daunbilo. I no gat narapela.” (Diuteronomi 4:39, NW) Em dispela God Krais Jisas i bin beten long em na i tok, “yu wanpela tasol yu God tru.” Long nau ol man bilong olgeta lain ol i kisim save pinis, ol i lotuim dispela God tru.—Jon 17:3; Matyu 4:8-10; 26:39; Rom 3:29.
10 Jehova em i Man bilong wokim graun, olsem na dispela graun i bilong em yet, na samting bai painim dispela graun long bihain, dispela i stap long han bilong Em. (Diuteronomi 10:14; Sam 89:11) Maski ol hevi bilong graun i bikpela tru, tasol God inap stretim. Ol man i pret nogut long pait nuklia bai kamap. Tasol i gat strong bilong nuklia bilong ol bilion bilion sta antap na husat i as bilong ol lo i bosim dispela strong? God yet, a? Olsem na God i gat save na strong inap long lukautim ol samting i gat laip long dispela graun na bai ol i no ken bagarap. Em tru, a? Olsem tasol ol hevi ol man yet i bin kamapim taim ol i bagarapim ol samting bilong dispela graun, em i no inap pasim laik bilong God I Gat Olgeta Strong. Dispela Man em i gat bikpela save na strong inap long wokim dispela graun na ol gutpela gutpela samting i gat laip i stap long graun, em inap stretim bek dispela graun sapos em i laik mekim. (Aisaia 40:26; Sam 104:24) Orait, Jehova i gat wanem laik long dispela graun bilong yumi?
GRAUN BAI STAP INAP LONG WANEM TAIM?
11 Yu ting God i gat laik long bagarapim dispela graun na olgeta samting i stap long en? Sampela man bilong skelim ol sta i ting bihain bihain bai san i kamap bikpela na karamapim dispela graun na bai graun i paia olgeta. Na sampela i ting, bihain bai san i no lait moa na ol samting i no inap i stap laip moa long graun. Tasol yu ting dispela tingting bilong ol i stret? Bikpela Man i bin wokim olgeta strong na olgeta samting na em i bin putim ol lo i bosim ol samting i helpim yumi long i stap laip, em i tok wanem?—Jop 38:1-6, 21; Sam 146:3-6.
12 Jehova i givim tingting long saveman King Solomon bilong raitim stori na skelim i stap bilong man wantaim i stap bilong dispela graun. Long Eklisiastis 1:4 (NW) Solomon i raitim tok olsem: “Narapela lain ol i pinis long graun, na narapela lain i kamap; tasol graun bai stap inap long taim bihain bihain.” Ol samting i bin painim ol man bilong graun i kamapim long ples klia olsem dispela tok i stret. Tru, narapela lain ol i pinis long graun, na narapela lain i kamap; tasol dispela graun i stap yet. Tasol em bai stap inap long wanem taim?
13 Tok Hibru ‘oh·lamʹ ol i tanim olsem “taim bihain bihain” long Eklisiastis 1:4 (NW), dispela tok i makim wanpela bikpela hap taim, em pinis bilong en i olsem i stap hait na yumi no inap save long en. Em inap makim wanpela hap taim i no gat pinis bilong en, olsem oltaim oltaim. Orait, olsem wanem long dispela tok bilong Eklisiastis 1:4? Em i makim wanpela taim i no gat pinis bilong en, olsem oltaim oltaim? o em i makim olsem long wanpela taim bihain bihain bai dispela graun i pinis, tasol nau dispela taim i olsem i stap hait na yumi no save long en? Sampela samting Baibel i tok em bai stap inap long taim bihain bihain, orait bihain dispela samting i pinis. (Lukim Nambas 25:13 na Hibru 7:12.) Tasol sampela taim long Baibel dispela tok ‘oh·lamʹ i makim samting em i save stap oltaim oltaim—olsem Bikpela Man bilong wokim olgeta samting. (Lukim Sam 90:2 na 1 Timoti 1:17.) Tasol taim Baibel i stori long dispela graun na i kolim dispela tok ‘oh·lamʹ, dispela tok i makim olsem graun bai stap oltaim. Sam 104:5 i tok: “Yu bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.”b—Lukim tu Sam 119:90.
14 Tasol yumi no ken ting olgeta samting bilong graun bai bagarap na graun nating tasol bai stap oltaim. Nogat. Jeremaia 10:10-12 (NW) i tok: “Jehova em i God tru. . . . Em i Man bilong wokim graun long strong bilong em; long bikpela save bilong em em i putim dispela graun i stap strong olgeta na i kamapim kaikai. Long save bilong em em i wokim ples antap.” Em i no wokim graun nating tasol; em i wokim graun “i kamapim kaikai.” Long planti Baibel ol i no tanim tok Hibru te·velʹ olsem “graun i kamapim kaikai”; ol i raitim olsem “graun” tasol. Tasol wanpela man bilong skelim insait bilong ol tok Hibru (William Wilson long buk Old Testament Word Studies) i tok, insait bilong dispela tok Hibru i olsem “graun i kamapim kaikai na i gat man i stap long en.” Laik bilong Jehova em olsem: Em i laik bai dispela graun i stap oltaim na i kamapim kaikai na i gat man i stap long en.—Sam 96:10; lukim tu Aisaia 45:18.
15 Olsem na Krais Jisas i lainim ol disaipel long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.”—Matyu 6:9, 10.
16 Jehova i no laik bai ol bikhetman i stap long dispela graun, em ol i no tingim Papa bilong graun na narapela i no gat sori long narapela. Bipo yet em i tok promis olsem: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. Ol stretpela man bai i kisim graun God i givim ol, na bai ol i stap oltaim long en.” (Sam 37:9, 29) Baibel i stori long “narapela graun i laik kamap bihain,” bai i gat ol man i stap long en, em ol man i pret long God na i stap aninit long Em na narapela i gat sori long narapela. (Hibru 2:5; lukim tu Luk 10:25-28.) Taim Kingdom bilong God i bosim graun, ol bikpela bikpela senis bai kamap, olsem na Baibel i stori long “nupela graun”—i no nupela graun tru, tasol nupela pasin bai kamap long graun na ol man i stap long dispela taim bai ol i stap gutpela tru olsem long paradais. Dispela em laik bilong God taim em i wokim graun long pastaim.—Revelesen 21:1-5; Jenesis 2:7-9, 15.
17 Bilong kamapim dispela “nupela graun,” bikpela bagarap i mas kamap pastaim—em bikpela bagarap tru, winim olgeta bagarap i bin kamap long graun bipo. Bilong helpim graun yet, na bilong helpim olgeta man i pilim gutpela pasin bilong Man i bin wokim graun, Em bai “bagarapim ol man i bin bagarapim graun!” (Revelesen 11:17, 18) Taim bilong God i mekim dispela samting em i klostu pinis! Taim dispela samting i kamap bai yu abrusim bagarap na i stap laip yet?—1 Jon 2:17; Provep 2:21, 22.
[Ol Futnot]
a Ol tok bilong Baibel long dispela buk, ol i bin kisim sampela long Nupela Testamen na ol narapela hap bilong Baibel ol i tanim pinis long tok Pisin. Tasol sampela ol i tanim tok bilong New World Translation of the Holy Scriptures na ol i putim NW bihain long en.
b Olsem na sampela man bilong skelim as bilong tok Hibru, ol i ting dispela tok ‘oh·lamʹ long Eklisiastis 1:4 i makim “oltaim oltaim.” Olsem na long sampela Baibel ol i tanim olsem (The New English Bible, Revised Standard Version, The Jerusalem Bible, The Bible in Living English, King James Version).
[Askim Bilong Stadi]
1. Yu gat wanem tingting long i stap bilong yu long bihain? Bilong wanem yu gat dispela tingting?
2, 3. Planti man i tingim pait nuklia i laik kamap na ol i gat wanem tingting long i stap bilong ol long bihain?
4. Ol man i bagarapim graun na win na wara na bilong wanem sampela man i tingting planti long dispela samting?
5, 6. I gat wanem samting moa na ol man i ting ol i no inap kisim gutpela sindaun na i stap amamas long bihain?
7. (a) I gat wanem samting na yumi ken save Baibel em i tok bilong God? (b) Bilong wanem ol man i mas save long tok bilong Baibel?
8. Baibel i kolim wanem nem long Bikpela Man i bin wokim dispela graun?
9. (a) Husat i bin tingim na kamapim dispela nem? (b) Nem bilong God em bikpela samting long yumi o nogat? (Rom 10:13; Maika 4:5)
10. Pait nuklia inap kamap na ol man i bagarapim planti samting long graun, tasol bilong wanem dispela i no inap pasim ol samting God i laik mekim long dispela graun?
11. (a) Sampela saveman bilong saiens i ting wanem samting bai painim dispela graun long bihain? (b) Husat i gat bikpela save moa long ol dispela samting? Olsem wanem na em i gat bikpela save moa?
12. Olsem wanem tok bilong Eklisiastis 1:4 i stret?
13. (a) Dispela tok “taim bihain bihain” em inap makim wanem samting? (b) Orait, olsem wanem yumi inap save dispela graun bai stap oltaim oltaim?
14. Olsem wanem yumi save olgeta samting bilong graun i no ken bagarap na bai graun nating tasol i stap oltaim?
15. Olsem wanem dispela i stret wantaim dispela beten Jisas i bin lainim ol disaipel long en?
16. (a) Wanem kain man bai ol i stap long graun long dispela taim bihain? (b) Wanem dispela “nupela graun” Baibel i tok long en?
17. Bilong wanem nau yumi mas save long ol samting God i tok yumi mas mekim bambai yumi no ken bagarap?