Planti Milion Manmeri Nau Ol i Stap Laip Ol i No Ken i Dai
“Kirap bek em mi yet. Na laip, em mi yet. Man i bilip long mi, sapos em i dai, maski, em bai i stap laip. Na olgeta man i stap laip na i bilip long mi, bai ol i no i dai. Nogat. Bai ol i stap laip oltaim oltaim.”—JON 11:25, 26.
1. Sapos man i no i dai, olsem wanem long em?
SAPOS man i no ken i dai, orait, em i mas i stap oltaim oltaim long dispela graun! Em i stret, a? Na dispela samting i stret wantaim dispela tok bilong Jisas long Jon 11:25, 26, a? Em i stret!
2, 3. (a) Ol tok bilong Olpela Testamen i kirapim ol man long wetim wanem samting? (b) Tasol ol misin ol i kolim Kristen, olsem Krisendom, ol i gat wanem tingting?
2 Olpela Testamen (Jenesis i go inap Malakai) i no kirapim ol manmeri long ting olsem bai ol i kisim laip long heven. Nogat. Olsem na ol Juda, em ol i bihainim tru ol tok bilong Olpela Testamen, ol i no gat tingting o laik long kisim laip long heven. Tasol Olpela Testamen i tok long kisim laip i stap oltaim. (Sam 37:29; Jop 14:13-15) Ol Juda bilong skin ol i bilip na wet long kisim laip long graun aninit long Kingdom bilong dispela Mesaia (o Krais) God bai salim em i kam.
3 Tasol ol misin bilong Krisendom long nau, ol i no gat dispela tingting. Ol i bilip olsem yumi gat tewel na taim skin i dai, tewel i go i stap long wanpela ples spirit. Na ol i ting bai God i skelim tewel bilong ol man na makim bilong i go long heven, o sapos man i no bin i stap gutpela Kristen, orait, bai God i makim tewel bilong em bilong i go long ples paia na kisim pen oltaim oltaim. Em, ol i ting olsem. Na planti misin bilong Krisendom ol i ting dispela graun wantaim san na mun na ol sta bai paia na pinis olgeta.
4. Planti manmeri i tingim ol samting nau i kamap long graun, bilong wanem ol i no amamas long dispela tok olsem planti manmeri ol i no ken i dai, bai ol i stap oltaim?
4 Ol manmeri i gat dispela kain tingting, ol i no bilip olsem “planti milion manmeri nau ol i stap laip ol i no ken i dai,” bai ol i stap oltaim long graun. Na planti manmeri i save tok: Husat i laik i stap oltaim long dispela graun, em hangre na sik na guria na pait i pulap long en na olgeta lain man i stap birua birua na ol i wok long hipim planti bom nogut? Tru tumas, sapos i gat ol dispela samting nogut i stap, ating bai ol manmeri i no laik i stap oltaim long dispela graun!
Laik Bilong God Bilong Pastaim
5. Taim God i putim namba wan man long graun, graun i stap olsem wanem? God i gat wanem tingting long ol man?
5 Taim God i wokim namba wan man na meri, em i putim tupela long graun bilong i stap oltaim long en. Long dispela taim, graun em i gutpela ples. Baibel i tok, God i redim ol samting long graun na putim namba wan man na meri i stap long en, na “God i lukim olgeta samting em yet i wokim pinis i gutpela, na em i amamas tru.” (Jenesis 1:31) Sapos God i no lukim graun i gutpela ples, em i no ken putim man long en. Man bilong raitim stori long God i wokim ol samting, em i stori long dispela Man bilong wokim olgeta samting na em i tok: “Dispela Bikpela Ston, olgeta wok bilong em i gutpela olgeta, long wanem, olgeta pasin bilong em i stret. Em i no save giaman, na em i no save mekim pasin i no stret; pasin bilong em i stret tasol.” (Diuteronomi 32:4, NW) God I Gat Olgeta Strong em i no bin mekim wanpela wok i nogut na bai em i sem long en. Nogat. Em i gutpela Papa. Em i laikim tumas ol manmeri kirap long taim em i wokim ol long pastaim na i kam inap long nau.—Jon 3:16.
6, 7. Wok God i mekim bilong wokim dispela graun na putim man i stap long en, olsem wanem yumi save dispela wok i no ken lus nating?
6 Wok God i mekim bilong wokim dispela graun na putim man i stap long en, dispela wok i no ken lus nating. God i givim wok long Adam tupela Iv na dispela wok i bilong litimapim nem bilong Em. God i tok, tupela i mas karim planti pikinini, na lukautim gut graun bambai graun olgeta i kamap gutpela ples Paradais, na tupela i mas bosim ol animal. (Jenesis 1:28) Tasol sori! Ol man i stap inap 6,000 yia pinis long graun na ol i no bin mekim dispela wok God i givim long ol. Ol i mekim wok nogut na nau ol inap bagarapim ol yet long ol samting nogut ol i bin wokim. Wok bilong ol man i lus nating, tasol wok bilong God i no lus nating.
7 Laik bilong God bilong pastaim i mas kamap. God i tok promis pinis! (Aisaia 55:11) Long Eklisiastis 1:4 (NW) Baibel i tok: “Narapela lain ol i pinis, na narapela lain i kamap; tasol graun i stap inap long taim bihain bihain.” Na long Aisaia 45:18 (NW) God i kolim em yet olsem “Man bilong wokim graun,” na em i tok: “Em i no wokim bilong i stap nating; nogat; em i wokim bilong man i ken i stap long en.” Na bihain, long taim God i makim pinis, ol manmeri i gutpela olgeta bai ol i stap long dispela graun—bai ol i stap oltaim oltaim long en!
8, 9. (a) Dispela tok olsem skai na graun bai pinis, olsem wanem dispela tok i no pait wantaim ol samting God i laik mekim long graun? (b) “Nupela skai” em wanem samting? “Nupela graun” em wanem samting? Baibel i tok promis olsem wanem long dispela “nupela skai na nupela graun”?
8 Pita i tok, skai na graun i stap nau bai i pinis, tasol dispela tok i no pait wantaim tok bilong Aisaia 45:18, long wanem bihain Pita i tok: “God i promis pinis long wokim nupela skai na nupela graun, na bai stretpela pasin tasol i stap long en. Yumi wet long dispela samting tasol.” (2 Pita 3:10-13) Promis bilong God long wokim nupela skai na nupela graun, dispela tok promis i stap long Aisaia 65:17. Dispela nupela skai na nupela graun bai stap inap long wanem taim? Aisaia 66:22 (NW): tok: “Jehova i tok olsem: ‘Dispela nupela skai na nupela graun mi wokim em i stap long ai bilong mi, na olsem tasol ol pikinini bilong yupela na nem bilong yupela bai stap.’”
9 Dispela nupela skai na nupela graun bai stap long ai bilong Jehova; bai ol i stap strong; ol i no ken pinis! Dispela “nupela graun” em ol stretpela manmeri i stap long graun taim i kamap klinpela gen, em God i tok em i bin wokim dispela graun “bilong man i ken i stap long en.” (Aisaia 45:18, NW) Dispela “nupela skai” em stretpela nupela gavman bilong heven em bai bosim dispela graun na ol stretpela manmeri i stap long graun. Olsem na God i no wokim dispela graun ‘bilong i stap nating.” Bai laik bilong em i kamap!
Bilong i Stap long “Nupela Graun”
10, 11. (a) Ol manmeri i skelim ol samting long graun, taim ol i kolim ol samting ol i ting bai kamap long graun, ol i no tingim wanem samting? (b) Noa wantaim lain bilong em ol i winim taim bilong Bikpela Tait Wara na dispela i makim wanem samting?
10 Ol manmeri i skelim ol samting i kamap long graun, ol i no ting gutpela nupela taim bai kamap. ol i ting olgeta man bai bagarap. Tingting bilong ol i no olsem tingting bilong God, na pasin bilong ol i no olsem pasin bilong God. (Aisaia 55:8-11) Ol i no tingim ol samting i bin kamap long graun longtaim bipo, long taim bilong Noa. Olgeta bom nogut ol man i wokim long nau, ol dispela bom i no gat strong olsem bilong Bikpela Tait Wara i bagarapim ol manmeri long taim bilong Noa. Tasol God Jehova, Man bilong wokim olgeta samting, em i mekim pasin marimari na wokim rot bambai sampela manmeri ol inap winim taim bilong dispela Tait long bipo.
11 Etpela manmeri i winim taim bilong Tait, em Noa wantaim meri bilong em, na tripela pikinini man bilong tupela wantaim meri bilong ol. Long rot bilong dispela etpela manmeri, ol manmeri i kisim laip na ol i stap gen long stretpela pasin. (2 Pita 2:5; 3:6) Ol samting i bin kamap long taim bilong Noa i olsem piksa na i makim ol samting liklik taim bai kamap. (Jenesis 9:1-7) Em i makim olsem: Noa wantaim lain bilong em ol i bin winim taim bilong bagarap long bipo, na olsem tasol yumi inap winim taim bilong pinis bilong dispela taim nau na i stap long nupela taim bihain!
12, 13. (a) Olsem wanem na planti manmeri long nau ol i no pret long olpela pasin bai pinis? (b) Yumi tingim beten Jisas i lainim ol disaipel long en na yumi save olsem wanem long graun tru?
12 Planti manmeri long graun long nau ol i save, liklik taim tasol na bai dispela “nupela skai” na “nupela graun” i kamap. Ol i save olpela pasin bilong nau bai pinis olsem paia i kukim, tasol ol i no pret. Long wanem, ol i save long tok bilong God em i tok, graun tru i no ken bagarap olsem graun tru i no bagarap long taim bilong Noa. Ol man nogut tasol i bagarap. Man bilong raitim sam em i tok long graun, olsem: “Heven em i ples bilong God tasol, na em i givim graun long yumi manmeri.”—Sam 115:16.
13 God i wokim “yumi manmeri” bilong i stap long graun, i no long heven. Taim bikpela Tisa, em “Pikinini Bilong Man,” em i stap long graun, em i lainim ol bilong em long beten long Man bilong olgeta samting na tok: “Papa bilong mipela, yu stap long heven, nem bilong yu mas i stap holi. Kingdom bilong yu i mas kam. Mipela i mas bihainim laik bilong yu long graun olsem ol i bihainim long heven.” (Matyu 24:37; 6:9, 10) O1sem na sapos Man bilong “harim beten,” i laik mekim ol samting olsem dispela beten i tok, orait, taim Kingdom bilong em i kam na pasin bilong nau i pinis, graun tru i no ken bagarap. (Sam 65:2) Ol manmeri i winim dispela taim bilong bagarap, bai ol i stap long graun. Bai ol i bihainim laik bilong God long graun olsem ol gutpela ensel i bihainim long heven.
14. Husat bai ol i kamap olsem namba wan lain bilong “nupela graun”? Bihain husat moa bai i stap wantaim ol na bai “nupela graun” i go bikpela?
14 Gutpela samting tru bai painim ol manmeri i mekim laik bilong God long graun i kamap klinpela pinis! Ol manmeri i winim dispela taim na ol i tingting long i stap mekim wok bilong God oltaim long Paradais long graun, bai ol i stap olsem “nupela graun” aninit long “nupela skai” bilong Krais. Bihain ol manmeri i dai pinis bai ol i kirap bek na bai dispela “nupela graun” i go bikpela. Ol dispela manmeri i mas lain long stretpela pasin na ol i mas bihainim stretpela pasin. (Jon 5:28, 29) Olsem na yumi ol manmeri yumi inap winim taim bilong pinis bilong dispela taim nau, yumi mas mekim wanem?
15, 16. (a) Ol manmeri i laik winim taim bilong pinis bilong dispela taim nau, ol i mas mekim wanem olsem Pita i tok? (b) Paslain long Tait Noa i mekim wanem gutpela pasin? Na dispela samting i helpim em wantaim lain bilong em olsem wanem?
15 Em gutpela askim. Winim 1,900 yia bipo Pita i stori long ol samting yumi mas mekim. Em i tok: “Orait, ol dispela samting bai i pinis olsem. Tasol yupela i mas i stap olsem wanem? Yupela i mas wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God, na yupela i mas wok strong long hariapim dispela De bai i kamap. Long dispela De tasol bai skai i paia na i pinis, na hatpela paia moa bai i kukim olgeta liklik samting bilong en na i tanim i kamap olsem wara.” (2 Pita 3:11, 12) I stret aposel i raitim dispela tok 1,900 yia bipo taim gavman bilong Rom, i stap strong yet, ol dispela tok i stret moa yet long ol Witnes Bilong Jehova ol i stap nau long taim bilong pinis bilong dispela pasin. “De bilong Bikpela” bai kam na ol samting em ‘graun na ol liklik samting bilong en’ i makim, ol dispela samting bai pinis olsem samting ol i tromoi long paia na i tanim i kamap olsem wara.—2 Pita 3:10.
16 Paslain liklik long taim bilong Tait, “Noa em i gutpela man, na wokabaut bilong em i stret long ai bilong God. Em i pren tru bilong God.” (Jenesis 6:9) Noa i wokabaut stret na dispela samting i helpim em wantaim lain bilong em na ol i no bagarap long Tait. God i lukautim ol na ol i stap laip. Taim ol i lusim sip i kam ausait, ol i stap long nupela stretpela pasin na God i blesim ol. Bihain God i wokim kontrak wantaim ol dispela manmeri i winim taim bilong Tait. Em i tok promis olsem: Tait i no ken bagarapim gen olgeta manmeri long graun.—Jenesis 9:8-17.
17. God i toksave gut long Noa? Na olsem wanem long nau?
17 Paslain tru long taim bilong Tait, God i toksave long Noa. Olsem na Noa i save bikpela wara bai kapsait i kam daun olsem ren na bikpela tait wara bai karamapim olgeta hap bilong graun. Na olsem tasol ol Witnes Bilong Jehova long nau ol i save, pasin bilong dispela graun i laik pinis. Baibel i toksave long ol. Olgeta samting i kamap olsem Baibel i tok profet long en, olsem na yumi save, pinis bilong dispela pasin nogut bilong nau em i klostu.
Sekanim Ol Man i Kirap Bek
18. Planti planti Witnes Bilong Jehova long nau ol i amamas long wanem tok bilong Revelesen?
18 Long nau planti planti witnes Bilong Jehova, em ol i ‘wokabaut wantaim Jehova,’ ol i tingim tok bilong Revelesen 20:11-14 na ol i amamas. Revelesen 20:11-14 i tok: “Na mi lukim bikpela waitpela sia king i stap, na man i sindaun long dispela sia. Na graun wantaim skai i ranawe long em, na i no gat ples moa bilong ol. Na mi lukim ol daiman i stap, ol man i gat nem na ol man nating, ol i sanap long pes bilong sia king. Na man i sindaun long sia em i opim sampela buk. Em i opim narapela buk tu, em buk bilong laip. Na em i skelim olgeta daiman. Em i lukim rait i stap long ol dispela buk, na em i skelim ol daiman, inap long olgeta pasin ol i bin mekim. Solwara i givim bek olgeta daiman i stap long en, na Dai wantaim Hel i givim bek olgeta daiman i stap long dispela. Na Jas i skelim olgeta man wan wan, inap long ol pasin ol i bin mekim. Em i tromoi Dai wantaim Hel i go daun long dispela bikpela hul i gat paia. Dispela bikpela hul i gat paia em i namba tu dai.”
19. Taim ol manmeri i kirap bek, bai ol i lukim graun i stap olsem wanem? Na ol manmeri i stap long graun, bai ol i mekim wanem long ol dispela manmeri i kirap bek na kisim laip gen?
19 Taim ol manmeri i kirap bek, bai ol i no lukim graun i stap nating. Nogat. Milion milion witnes bilong Jehova ol i dediket na baptais ol i wet long winim taim bilong pinis bilong olpela heven na graun. Bai ol i stap long graun na wok long mekim olgeta hap graun i kamap gutpela ples Paradais, na bai ol i sekanim ol manmeri i kirap bek long matmat. (Luk 23:43) Bai ol i stap longtaim liklik long nupela taim na dispela samting i kamap. Long wanem, pastaim ol i mas redim gut ol samting na bihain bai ol manmeri i dai pinis ol i kirap bek.
20. Taim Jisas i kirapim bek Lasaras, em i tokim ol man long mekim wanem? Taim em i kirapim bek pikinini meri bilong Jairas, em i tokim ol long mekim wanem? Olsem na ating ol manmeri i winim taim bilong Amagedon, ol i mas mekim wanem bilong helpim bikpela lain manmeri ol i kirap bek?
20 Ol dispela milion milion manmeri i winim taim bilong pinis, bai ol i tingim ol samting Jisas i tokim ol man long mekim taim em i kirapim bek Lasaras. Ol manmeri i lukim dispela mirakel i kamap, em i tokim ol long lusim laplap ol i bin. Karamapim long Lasaras. Na taim Jisas i kirapim pikinini meri bilong Jairas, Jisas i tok, “Yupela givim sampela kaikai long em.” (Luk 8:55; Jon 11:44) Olsem tasol tok bai kam long heven na tokim ol manmeri i winim taim bilong pinis long redim ol samting bilong bikpela lain manmeri ol bai kirap bek.
21, 22. (a) Long rot bilong wanem wok bai i dai bilong Krais inap helpim tru ol manmeri i kirap bek? (b) Olsem wanem na long pastaim tru bai stretpela pasin i stap long “nupela graun”?
21 Na bai i gat bikpela wok bilong lainim ol. God i laik bai ol dispela manmeri i kirap bek ol i ken save long ol samting ol i mas mekim bambai ofa bilong Krais i ken helpim tru ol. Long dispela rot tasol bai ol inap i stap long Paradais long graun na i stap gutpela olgeta. ‘Bikpela lain manmeri’ ol bai winim taim bilong “bikpela hevi tru,” nau ol i redi bambai ol inap mekim dispela gutpela wok bilong lainim ol manmeri i kirap bek. Ol yet i bin kisim save long ol samting ol i mas mekim bambai ofa bilong Krais, em “Pikinini Sipsip Bilong God,” em i ken helpim ol. (Jon 1:29) Revelesen 7:9-14 i kamapim dispela samting, em i tok ol dispela manmeri i winim taim bilong “bikpela hevi,” “ol i bin wasim klos bilong ol long blut bilong Pikinini Sipsip, na klos i kamap waitpela.” Ofa bilong Krais i helpim ol na i olsem ol i putim “waitpela klos.”
22 Na Baibel i tok piksa long dispela ‘bikpela lain manmeri,’ olsem: “Long san na long nait ol i save lotu long em long haus holi bilong en.” (Revelesen 7:15) Long taim bilong “bikpela hevi tru,” em liklik taim bai kamap, waitpela klos bilong ol i no ken tekewe. Long wanem ol bai stap mekim wok bilong God Jehova na em bai lukautim ol. (Revelesen 7:17) Ol dispela manmeri i pasim dispela “waitpela klos,” bai ol i kamap namba wan lain bilong “nupela graun.” Olsem na taim dispela “nupela graun” i kamap, long pastaim tru bai “stretpela pasin tasol i stap long en.”—2 Pita 3:13
Sampela Askim Bilong Rivyu
□ Ol manmeri bilong bipo na long nau tu, ol i ting olsem wanem long i stap laip long bihain?
□ God i laik mekim wanem long graun? Baibel i tok wanem long dispela samting?
□ Ol samting i bin painim Noa wantaim lain bilong em, olsem wanem dispela i givim tingting long yumi na yumi save planti milion manmeri nau ol i stap laip ol i no ken i dai?
□ Husat ol bai stap long graun na sekanim ol manmeri i kirap bek? Ol bai mekim wanem bilong helpim ol dispela manmeri i kirap bek?
[Piksa long pes 10]
Noa wantaim lain bilong em ol i winim taim bilong Tait. Milion milion manmeri bai ol i winim taim bilong pinis bilong dispela taim nau
[Piksa long pes 12]
Ol i amamas long lukim Lasaras i kirap bek, na olsem tasol ol manmeri i winim taim bilong Amagedon bai ol i amamas long lukim ol manmeri i dai pinis ol i kirap bek