Yu Ting Graun Bai Bagarap?
Bekim bilong Baibel
Nogat, graun bai i no inap bagarap olgeta, o paia bai i no inap kukim, na i no gat nupela graun bai senisim dispela graun bilong nau. Baibel i stori olsem God i wokim graun bai ol manmeri i ken stap oltaim long en.
“Ol stretpela man bai kisim graun olgeta, na ol bai stap oltaim long en.”—Buk Song 37:29.
“[God i] bin putim dispela graun long ples bilong en, na graun i stap strong olgeta; em i no inap surik liklik. Nogat tru. Em bai i stap inap oltaim oltaim.”—Buk Song 104:5.
“Graun i save stap oltaim oltaim.”—Eklisiastis 1:4.
“Em Man husat i bin kamapim graun, Man Bilong Wokim na putim graun i stap strong tru, em i no wokim graun bilong i stap nating, nogat, em i wokim bilong ol samting i ken stap long en.”—Aisaia 45:18.
Yu ting ol man bai bagarapim graun?
God bai i no inap larim ol manmeri i bagarapim graun olgeta long rot bilong polusen, woa, o sampela narapela rot, nogat. Em bai “bagarapim ol man i wok long bagarapim graun.” (Revelesen 11:18) Hau bai em i mekim olsem?
God bai rausim ol gavman bilong ol man bikos ol i no lukautim gut dispela graun, na God bai larim stretpela gavman bilong heven i lukautim graun. (Daniel 2:44; Matyu 6:9, 10) Jisas Krais, em Pikinini Bilong God, em bai stap King bilong dispela Kingdom. (Aisaia 9:6, 7) Taim Jisas i stap long graun, em i bin wokim ol mirakel na kontrolim win na wara samting. (Mak 4:35-41) Jisas i stap King long Kingdom Bilong God, na em bai kontrolim gut olgeta samting long dispela graun na win na wara samting. Em bai kamapim nupela sindaun long graun, na ol samting long graun bai kamap wankain olsem long gaden Iden bilong bipo.—Matyu 19:28; Luk 23:43.
Baibel i tok tu olsem paia bai kukim graun?
Nogat, Baibel i no tok olsem. Dispela tingting kranki i kamap bikos planti man i paul long tok bilong 2 Pita 3:7 we i tok: “Skai na graun bilong nau i wetim paia i kamap.” Yumi ken skelim tupela bikpela poin we i helpim yumi long kliagut long mining bilong ol dispela tok:
Taim Baibel i kolim “skai,” “graun,” na “paia,” sampela taim ol dispela tok inap makim ol narapela samting. Olsem, Buk Song 97: 1 i tok: “Jehova i kamap King pinis! Graun, yu mas amamas. Na ol ailan, yupela i mas belgut.” Long dispela ves, “graun” i makim ol manmeri.
Ol tok i stap klostu long 2 Pita 3:7 i kamapim klia mining bilong dispela tok skai, graun, na paia long dispela ves. Ves 5 na 6 i stori long ol samting i bin kamap long Bikpela Tait Wara long taim bilong Noa. Long dispela taim, graun i no bagarap na pinis, nogat. Bikpela Tait i bagarapim ol manmeri nogut, o “graun.” (Stat 6:11) Na tu, Bikpela Tait i bagarapim wanpela kain “skai,” em ol lain i bin mekim wok bos na bosim ol manmeri long dispela taim bipo. Olsem na bagarap i bin painim ol bikhet manmeri, tasol graun i no bagarap. Noa na famili bilong em i bin abrusim dispela bagarap na ol i sindaun gen long graun bihain long Bikpela Tait.—Stat 8:15-18.
Wankain olsem dispela Bikpela Tait, bagarap, o “paia” em 2 Pita 3:7 i kolim, em bai bagarapim ol manmeri nogut, tasol em i no inap bagarapim planet Graun. God i tok promis long wokim “nupela skai na nupela graun” na “stretpela pasin tasol bai i stap long en.” (2 Pita 3:13) Dispela “nupela graun,” o nupela lain manmeri, bai stap aninit long wok bos bilong “nupela skai,” o nupela gavman—Kingdom Bilong God. Taim dispela Kingdom i bosim yumi, paradais bai kamap long graun na bel isi bai stap long olgeta hap.—Revelesen 21:1-4.