Yu Ting Dispela Graun Bai Pinis?

Wanem Samting Bai i No Pinis?

OL MANMERI

Baibel i tok: God “i no wokim graun bilong i stap nating, nogat, em i wokim bilong ol samting i ken stap long en.” —AISAIA 45:18.

GRAUN

Baibel i tok: “Wanpela lain pipol i kamap na i go, na narapela lain pipol i kamap, tasol graun i save stap oltaim oltaim.” —EKLISIASTIS 1:4.

MINING BILONG EN: Baibel i tok olsem graun i no inap pinis na oltaim bai ol manmeri i stap long en. So wanem mining bilong dispela tok olsem graun bai pinis?

SKELIM: Baibel i tok olsem pinis bilong dispela graun bai wankain long taim bilong Noa. Long taim bilong Noa, “pasin bilong pait i pulap long graun.” (Stat 6:13) Tasol Noa i bihainim stretpela pasin. Olsem na God i lukautim Noa na famili bilong em, tasol Em i bagarapim ol manmeri nogut long rot bilong tait wara. Baibel i stori long dispela samting na i tok: “Bikpela tait i karamapim dispela graun, na graun i bagarap olgeta.” (2 Pita 3:6, BB) Dispela em pinis bilong graun long dispela taim bipo. Tasol wanem samting i bin bagarap? Graun tru tru i no bagarap, tasol ol manmeri nogut i bin bagarap. Olsem na taim Baibel i tok olsem graun bai pinis, dispela i no makim olsem dispela graun tru tru bai bagarap, nogat. Em i makim ol manmeri nogut i stap long graun na ol pasin na wok bilong ol tu bai pinis olgeta.

Wanem Samting Bai Pinis?

OL HEVI NA OL PASIN NOGUT

Baibel i tok: “I no longtaim na bai ol man nogut i no stap moa; yu bai painim ol long ples bilong ol, tasol bai yu no inap lukim ol. Tasol ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet.”—BUK SONG 37:10, 11.

MINING BILONG EN: Bikpela Tait long taim bilong Noa i no bin bagarapim na pinisim ol pasin nogut. Bihain long Bikpela Tait, ol manmeri nogut i kamap gen na putim hevi long laip bilong olgeta manmeri. Tasol klostu nau God bai pinisim ol pasin nogut. Man bilong raitim song i tok: “Bai ol man nogut i no stap moa.” God bai pinisim ol pasin nogut long rot bilong Kingdom bilong em—em wanpela gavman i stap long heven na em bai bosim ol stretpela manmeri i stap long olgeta hap bilong graun.

SKELIM: Yu ting ol lida bilong graun long nau bai amamas long sapotim Kingdom Bilong God? Baibel i tok ol bai i no laik mekim olsem. Ol bai mekim kranki pasin na birua long Kingdom Bilong God. (Buk Song 2:2) Wanem samting bai kamap? Kingdom Bilong God bai bagarapim ol gavman bilong ol man, na “em wanpela tasol bai stap oltaim oltaim.” (Daniel 2:44) So wai na wok bos bilong ol man i mas pinis?

SAMTING YUMI NIDIM —Wok Bos Bilong Ol Man i Mas Pinis

Baibel i tok: “Man i no gat rait long stiaim wokabaut bilong em yet.”—JEREMAIA 10:23.

MINING BILONG EN: God i no wokim ol man bilong bosim ol yet. Ol i no mekim gut wok long bosim gut ol narapela manmeri na pinisim ol hevi.

SKELIM: Buk Britannica Academic i tok, i luk olsem ol gavman i no inap long “pinisim pasin bilong stap rabis, hangre, sik, disasta, na woa na pasin bilong pait na kilim man we i kamap long olgeta hap.” Dispela buk i tok moa: “Sampela . . . i bilip olsem i mas i gat wanpela gavman tasol i bosim graun olgeta na bai em inap pinisim ol dispela hevi.” Maski ol gavman bilong graun i bung wantaim na mekim wok bos, ol i gat sin, olsem na ol i no inap long pinisim ol dispela hevi. Kingdom Bilong God tasol em wanpela gavman we i gat strong bilong pinisim tru olgeta hevi.

Olsem na Baibel i tok ol gutpela manmeri i no gat wok long pret long pinis bilong dispela graun, em ol pasin na wok bilong ol man nogut. Ol i ken wet long lukim dispela samting i kamap bikos God bai pinisim ol manmeri nogut na kamapim gutpela sindaun long graun!

Wanem taim bai olgeta dispela samting i kamap? Neks atikol bai kamapim bekim bilong Baibel long dispela askim.