Baibel i Tok Wanem?
Graun Bai Bagarap Long Paia?
BAGARAP long pait nuklia, o san i solap bikpela na kukim olgeta, o wanpela god i belhat em i kukim—em narapela narapela rot, tasol maski em wanem rot planti man i ting Graun bai pinis olgeta long paia long wanpela bikpela bagarap.
Sampela man i kamapim sampela tok bilong Baibel i makim olsem God bai kamapim bikpela paia olsem pe ol man bai kisim long ol samting nogut ol i bin mekim long graun. Na sampela i gat wankain tingting olsem Paul Davies, wanpela profesa long Yunivesiti Bilong Adelet, Ostrelia. Em i raitim buk na stori olsem em i ting graun i no gat rot long abrusim bagarap, em bai paia olgeta. Long buk bilong em, em i tok: ‘Taim san i wok long solap bikpela, paia bilong en bai karamapim Graun olgeta. Graun bilong yumi bai paia na pinis olgeta.’ (The Last Three Minutes) Wanem samting tru bai painim graun? Wanem insait bilong sampela tok bilong Baibel i makim olsem graun bai paia?
God i Save Tingim Yumi?
God i save tingim tru ol samting i kamap long graun. Jeremaia 10:10-12 i tok: “Bikpela, yu God tru. . . . Bikpela i bin wokim graun na skai. Em i bin wokim olgeta samting long strong na save bilong em yet.” God i wokim graun bilong i stap oltaim. Olsem na long pasin sori, na gutpela tingting na save, God i wokim graun i gutpela moa na i redi long ol man i ken i stap long en inap oltaim oltaim olsem gutpela ples bilong ol yet.
Baibel i stori long taim God i wokim man na meri na i tok: “God i mekim ol i kamap man na meri. Na God i mekim gutpela tok bilong givim strong long ol. Em i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en.’ ” (Stat 1:27, 28) Taim God i wokim pinis olgeta samting, em i tok “i gutpela.” (Stat 1:31) Na em i laik graun i stap olsem. Olsem sampela marit i save mekim taim ol i tingting pinis long kamapim pikinini na ol i redim gut ples slip bilong pikinini i laik kamap, God i bin redim wanpela gaden i gutpela tru na em i putim Adam long en bilong lukautim.—Stat 2:15.
God i bin wokim Adam i stret olgeta, tasol em i bikhet na lusim dispela wok bilong lukautim graun. Tasol olsem wanem? Man bilong wokim olgeta samting, em i bin lusim laik bilong Em? Aisaia 45:18 i kamapim klia olsem em i no bin mekim olsem. Baibel i tok: “Em i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Lukim tu Aisaia 55:10, 11.) Maski man i lusim wok bilong em long lukautim graun, God i bin wok yet long bihainim laik bilong em long graun na ol samting i stap laip long en. Lo God i bin givim long lain Israel bilong bipo i tok, long olgeta 7-pela 7-pela yia ol “i mas larim graun i malolo.” Na Lo i kolim ol samting ol i mas mekim bilong lukautim gut ol animal. (Wok Pris 25:4; Kisim Bek 23:4, 5; Lo 22:1, 2, 6, 7, 10; 25:4; Luk 14:5) Em sampela samting tasol Baibel i stori long en bilong kamapim klia olsem God i save tingim tru ol man, na olgeta samting Em i bin tokim man long lukautim.
“Namba Wan Graun i Go Pinis”
Orait, olsem wanem long sampela tok bilong Baibel i olsem ol i pait wantaim sampela narapela tok bilong Baibel? Olsem: 2 Pita 3:7 i tok: “Skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.” Narapela em Kamapim Tok Hait 21:1, i tok: “Mi lukim nupela skai na nupela graun i stap. Namba wan skai na namba wan graun i go pinis olgeta.”
Sapos tok bilong Pita i makim olsem Graun tru bai paia na bagarap, orait tok bilong em i makim olsem skai tru—em ol sta na san na mun—ol tu i mas paia na bagarap. Tasol dispela kain tingting i no stret wantaim ol tok promis bilong Baibel olsem tok bilong Matyu 6:10: “Mipela i mas bihainim laik bilong yu long graun olsem ol i save bihainim long heven,” na Song 37:29: “Ol stretpela man bai i kisim graun God i givim ol, na bai ol i stap oltaim long en.” Na tingim: Paia inap mekim wanem long bikpela hat bilong san na ol sta em olgeta taim ol i save kamapim pairap bilong nuklia?
Tasol sampela taim Baibel i kolim dispela tok “graun” olsem tok piksa bilong makim ol manmeri bilong graun. Olsem: Long Song 97:1 Baibel i tok: “Graun, yu mas amamas.” Long dispela tok bilong Baibel “graun” i makim ol manmeri. (Lukim tu 1 Stori 16:31.) Ol tok i stap klostu long 2 Pita 3:5, 6 i kamapim klia olsem dispela tok “graun” i makim wankain samting—ol manmeri. Pita i stori long taim bilong Noa na Bikpela Tait i bagarapim ol man nogut, tasol Noa wantaim lain bilong em na graun tru i no bagarap. (Stat 9:11) Na 2 Pita 3:7 tu i tok, ol man i bagarap em “ol man i bin givim baksait long God.” Dispela tingting olsem “graun” long dispela ves i makim ol man nogut, em i stret wantaim ol narapela tok bilong Baibel. Ol man nogut Jehova bai pinisim, ol i dispela “namba wan graun” long Kamapim Tok Hait 21:1, em bipo yumi bin stori long en.
Tru tumas, olsem wanpela gutpela papa bilong graun bai wok strong long mekim ol samting na ol man i no ken bagarapim haus bilong em, God Jehova i save tingim ol samting em i bin wokim. Wanpela taim em i bin rausim long gutpela ples daun bilong Jordan ol man bilong mekim pasin pamuk na ol pasin nogut tru, na em i tokim ol nupela man bilong kisim dispela graun—em ol man em i bin wokim kontrak wantaim ol—sapos ol i bihainim ol lo bilong em, ‘graun i no ken rausim ol olsem graun i bin rausim ol haiden i stap paslain long ol.’—Wok Pris 18:24-28.
“Nupela Graun”
Long nau, planti man i bin bagarapim graun long ol pasin nogut bilong ol, olsem pasin sem, pait na bagarapim ol man nogut tru, na pasin giaman long wok politik samting. God tasol inap stretim dispela graun, na em bai mekim olsem. Long Kamapim Tok Hait 11:18, em i tok promis olsem em bai “bagarapim ol man i bin bagarapim graun.” God bai stretim bek graun, na ol man i aninit long God na ol i laikim tru ol narapela man, bai ol i pulap long en. (Hibru 2:5; skelim wantaim Luk 10:25-28.) Taim Kingdom bilong God i bosim graun ol bikpela bikpela senis bai kamap, olsem na Baibel i stori long en olsem “nupela graun”—em nupela lain man.
Taim yumi kaunim ol tok bilong Baibel olsem tok bilong Song 37:29 na yumi tingim tok bilong Krais long Matyu 6:10, yumi save, ol bikpela guria na win samting, o man yet wantaim ol samting nogut bilong pait, ol i no inap pinisim dispela graun. Ol i no inap pasim God long kamapim laik bilong em. (Song 119:90; Aisaia 40:15, 26) Ol gutpela manmeri bai sindaun long graun em olgeta samting long en i gutpela tru, na amamas bilong ol i no inap pinis. Em tok i tru long samting bai painim dispela graun, long wanem, em laik bilong gutpela Man i bin wokim yumi na em i no bin senisim laik bilong em.—Stat 2:7-9, 15; KTH 21:1-5.