Yu Ting Graun Bilong Yumi Bai Bagarap?

SAMPELA taim yu save tingting, ‘Wanem samting bai painim graun bilong yumi long bihain?’ Ol man i lukim ol samting i kamap long gutpela graun bilong yumi, olsem na planti i ting graun bilong yumi bai bagarap.

Tru tumas, long nau ol man i save bagarapim wara, bus, na win. Na tu, sampela saientis i givim tok lukaut olsem graun na olgeta samting long en i gat laip inap bagarap long traipela ston bilong ples antap i pundaun i kam daun, na sta bai pairap, o strong bilong san bai pinis.

Sampela saientis i ting olsem isi isi​—insait long planti bilion yia​—graun bai lusim strong bilong givim kaikai, wara, na win long ol man. Buk Encyclopædia Britannica i tok, “ol samting i go nogut olgeta na ol man i no inap stopim.”

Yumi amamas, Baibel i tokim yumi olsem God Jehova bai i no inap larim graun bilong yumi i bagarap o i stap olsem ples we i no gat wanpela samting inap i stap laip long en. Olsem Man Bilong Wokim ol samting, em i gat “olgeta strong” na i no gat pinis bilong en, olsem na em inap lukautim ol samting bilong ples antap na bilong graun inap oltaim oltaim. (Aisaia 40:26) Yu ken bilip long ol tok olsem: “[God i] bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” “San na mun, yutupela litimapim nem bilong em! Na olgeta sta i lait tumas, litimapim nem bilong en! . . . Long wanem, em yet i tok na ol i kamap na i stap. Em i tok na ol i stap oltaim long hap bilong ol.”​—Song 104:5; 148:​3-6.

Laik Bilong God Long Graun

Em i no laik bilong God long ol man i bagarapim graun olsem ol i mekim long nau. Nogat. God i wokim namba wan man na meri, Adam na Iv, na em i putim tupela long wanpela gutpela gaden. Yumi save, Paradais bilong ol i no inap i stap gutpela sapos ol i no mekim wok. God i tokim ol long “lukautim dispela gaden.” (Stat 2:​8, 9, 15) Man! God i bin givim gutpela wok long ol tumbuna papamama bilong yumi em ol i bin stap gutpela olgeta, a?

Tasol laik bilong God long graun i no bilong lukautim tasol dispela gaden bilong bipo, nogat. God i laik graun olgeta i mas kamap wanpela paradais. Olsem na God i tokim Adam na Iv: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”​—Stat 1:28.

Tasol sori tru, wanpela hambak ensel, bihain em i kisim nem Satan, em i birua long ol samting God i laik mekim. Em i laik tru long Adam na Iv i mas lotuim em. Satan i mekim wok long wanpela snek olsem maus bilong em, na em i pulim Adam na Iv long sakim wok bos bilong God. (Stat 3:​1-6; KTH 12:9) Ol i tingim ol yet tasol na i no tenkyu, na dispela i mas mekim Man Bilong Wokim yumi i bel hevi tru! Tasol pasin nogut ol i mekim i no senisim laik bilong God Jehova long dispela graun. God i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​—Aisaia 55:11.

I gat gutpela as na Jehova i bin larim pasin birua bilong Satan i kam inap long nau. Insait long dispela haptaim, ol man i bin traim kain kain gavman, na ol samting i kamap i soim olsem ol man i no inap tru long bosim wokabaut bilong ol yet, olsem Satan i kirapim ol long mekim.a​​—Jeremaia 10:23.

Tasol maski dispela hevi i kamap, insait long ol planti tausen yia i go pinis, God i bin blesim sampela stretpela man. Na long Baibel i gat sampela stori i soim ol samting i kamap sapos ol man i bihainim tok bilong God o ol i sakim wok bos bilong em. Na tu, Jehova i bin mekim planti gutpela samting bilong helpim yumi long bihain. Long pasin sori em i salim gutpela Pikinini bilong em olsem Man Bilong Kisim Bek yumi, em Jisas Krais, na Jisas i skulim yumi long nambawan gutpela rot long bihainim na em i givim laip bilong em bilong baim bek yumi. (Jon 3:16) Jisas i no gat asua na em i dai, olsem na God i mekim wok long indai bilong em olsem as bilong baim bek ol samting Adam na Iv i bin lusim, em laip bilong i stap oltaim long wanpela paradais long olgeta hap bilong graun.b Bilong mekim olsem, God Jehova i kamapim wanpela gavman long heven bilong bosim olgeta manmeri, na em i makim Pikinini bilong em, em Jisas Krais i kirap bek pinis, olsem King bilong dispela Kingdom. Dispela gutpela samting bai mekim na laik bilong God long dispela graun bai kamap.​—Matyu 6:​9, 10.

Olsem na yu ken bilip tru long ol dispela gutpela promis i stap long Baibel, olsem: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. Ol stretpela man bai i kisim graun God i givim ol, na bai ol i stap oltaim long en.” “ ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ ”​​—Song 37:​9, 29; KTH 21:​3-5.

Tok Bilong Baibel i No Pait Wantaim

Tasol ating sampela bai tingting, ‘Olsem wanem ol dispela skripsa bilong Baibel nau yumi kamapim i stret wantaim sampela skripsa i luk olsem ol i stori long graun bai pinis?’ Orait, nau yumi ken skelim sampela skripsa olsem. Taim yumi skelim dispela samting, dispela bai soim olsem ol tok bilong Baibel i no pait wantaim.

Paslain tru long ol saientis i luksave olsem ol samting bilong dispela graun “i go nogut olgeta,” wanpela man bilong raitim song long Baibel i tok: “Bipo tru yu [God] bin wokim dispela graun na em i stap strong. Na long han bilong yu yet yu bin wokim skai na olgeta samting i stap antap. Skai wantaim graun bai i bagarap olgeta, tasol yu save stap oltaim. Tupela bai i bagarap olsem laplap i olpela pinis na i bagarap. Na bai yu senisim tupela olsem man i senisim klos, na bai tupela i pinis olgeta na i no moa i stap. Tasol yu save stap olsem tasol. Yu no save senis. Na taim bilong yu i no inap pinis.”​​—Song 102:​25-​27.

Taim man bilong raitim song i mekim dispela tok, tok bilong em i no pait wantaim laik bilong God long dispela graun, olsem graun bai i stap oltaim. Nogat. Em i kamapim olsem God i save stap oltaim, tasol ol samting God i bin wokim em inap bagarap. Sapos God i no givim nupela strong long ples antap na graun​—olsem ol lain sta em ol i mekim na graun i stap long ples stret bilong en, na i gat lait, na strong​—ol samting bai stap nogut olgeta na bihain bai bagarap. Olsem na sapos God i no mekim wanpela samting, graun bilong yumi bai kamap olsem “olpela pinis na i bagarap,” o em bai pinis olgeta.

I gat sampela narapela ves long Baibel em ating pastaim bai yumi ting ol i pait wantaim samting God i tingting pinis long mekim long dispela graun. Olsem: Baibel i tok skai na graun bai “pinis olgeta.” (KTH 21:1) Tasol dispela tok i no pait wantaim tok promis bilong Jisas, olsem: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Orait, wanem insait bilong tok bilong Baibel olsem skai na graun bai ‘i no stap moa’?

Planti taim Baibel i mekim wok long tok “graun” bilong makim ol manmeri. Olsem, tingim dispela ves: “Graun na skai, yupela i mas amamas na tokim ol lain manmeri olsem, ‘Bikpela i stap king.’ ” (1 Stori 16:31) Yumi ken save, “graun” hia i makim ol manmeri em ol i stap long graun. Narapela ves em Song 96:​1, long Baibel King James Version i tok: “Graun olgeta, mekim singsing long BIKPELA.” Yumi ken save tru olsem, long dispela ves na long planti narapela ves, dispela tok “graun” i makim ol manmeri.​​—Song 96:​12, 13.

Sampela taim Baibel i tok olsem ol gavman bilong graun i olsem skai o ol sta samting. Olsem: Baibel i kolim ol king nogut bilong Babilon olsem sta, long wanem, ol i litimapim ol yet antap long ol narapela man. (Aisaia 14:​12-​14) Olsem Baibel i bin tok profet long en, dispela “skai” bilong Babilon, olsem ol king, na “graun,” em ol man i sapotim dispela gavman, ol i bin pinis long 539 B.C.E. (Aisaia 51:6) Dispela i mekim na ol Juda i tanim bel, ol inap i go bek long Jerusalem, we “nupela skai,” olsem nupela gavman, i bosim “nupela graun,” em ol stretpela manmeri.​​—Aisaia 65:17.

Tok bilong Baibel olsem skai na graun bai “pinis olgeta” i makim olsem ol gavman nogut bilong nau na ol manmeri i sapotim ol dispela gavman, ol bai pinis. (2 Pita 3:7) Dispela bai opim rot long nupela gavman bilong God long heven bai mekim gut long wanpela nupela stretpela lain manmeri, long wanem, “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”​​—2 Pita 3:13.

Olsem na yu ken bilip tru long tok promis bilong God olsem graun bilong yumi bai i stap oltaim. Na tu, Baibel i kamapim ol samting yu mas mekim bilong helpim dispela gutpela wok long mekim graun olgeta i kamap wanpela paradais. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Gutpela yu putim mak long skelim ol tok bilong Baibel long ol samting bai kamap bihain long graun na long ol manmeri. Ol Witnes Bilong Jehova long ples bilong yu bai amamas long helpim yu long mekim olsem.

[Ol Futnot]

[Rait long pes 12]

Baibel i tok promis olsem graun bilong yumi bai i stap oltaim

[Ol Piksa Kredit Lain long pes 10]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography