Stadi 5
Wanem Laik Bilong God Long Dispela Graun?
Bilong wanem Jehova i wokim graun? (1, 2)
I gat wanem as na nau graun i no wanpela paradais? (3)
Wanem samting bai painim ol man nogut? (4)
Long bihain, Jisas bai mekim wanem bilong helpim ol sikman? ol lapun? ol man i dai pinis? (5, 6)
Bilong kisim ol blesing long bihain, yu mas mekim wanem? (7)
1. Jehova i wokim dispela graun bambai ol man i ken amamas long stap long en oltaim oltaim. Em i laik ol stretpela man i stap amamas long graun inap long olgeta taim bihain. (Song 115:16; Aisaia 45:18) Graun i no ken bagarap, em bai stap oltaim oltaim.—Song 104:5; Saveman 1:4.
2. Taim God i no wokim yet man, em i makim wanpela liklik hap bilong graun na mekim i kamap wanpela naispela paradais. Em i kolim dispela hap olsem gaden Iden. Long dispela ples em i putim namba wan man na meri, em Adam na Iv. God i laik bai tupela i mas kamapim ol pikinini na pulimapim olgeta hap bilong graun. Isi isi ol inap long mekim olgeta hap bilong graun i kamap wanpela paradais.—Stat 1:28; 2:8, 15.
3. Adam na Iv i mekim sin taim ol i bikhet na brukim lo bilong God. Olsem na Jehova i rausim ol long gaden Iden. Em nau, Paradais i lus. (Stat 3:1-6, 23) Tasol Jehova i no lusim tingting long laik bilong em long dispela graun. Em i tok promis long mekim graun i kamap wanpela paradais, we ol man bai stap oltaim long en. Em bai mekim olsem wanem?—Song 37:29.
4. Bilong dispela graun i ken kamap wanpela paradais, God i mas rausim ol man nogut. (Song 37:38) Dispela samting bai kamap long Armagedon, em pait bilong God bilong pinisim pasin nogut. Bihain long en, Satan bai kalabus inap 1,000 yia. Olsem na bai i no gat wanpela man nogut i stap bilong mekim pasin nogut long graun. Ol manmeri bilong God tasol bai abrusim dispela bagarap.—KTH 16:14, 16; 20:1-3.
5. Bihain long dispela, Jisas Krais bai stap King bilong bosim graun inap 1,000 yia. (KTH 20:6) Isi isi em bai rausim sin i stap long skin na tingting bilong yumi. Bai yumi kamap gutpela olgeta, wankain olsem Adam na Iv paslain long ol i bin mekim sin. Bai i no gat sik, o lapun, o dai moa. Ol sikman bai kamap orait, na ol lapun bai kamap yangpela gen.—Jop 33:25; Aisaia 33:24; KTH 21:3, 4.
6. Long Taim Bilong Wan Tausen Yia Bilong Krais i Stap King, ol gutpela man bai mekim wok bilong kamapim wanpela paradais long olgeta hap. (Luk 23:43, NW ) Na tu, planti milion man i dai pinis bai ol i kirap bek na i stap laip gen long graun. (Aposel 24:15) Sapos ol i mekim ol samting God i laik ol i mas mekim, orait bai ol inap i stap oltaim long graun. Sapos ol i no mekim, bai ol i bagarap olgeta.—Jon 5:28, 29; KTH 20:11-15.
7. Olsem na laik bilong God bilong pastaim bai kamap. Yu laik kisim ol dispela blesing i kamap long bihain? Sapos olsem, yu mas wok long kisim save long Jehova na bihainim ol samting em i laik yu mas mekim. Bilong helpim yu long mekim olsem, go long ol miting long Haus Kingdom bilong ol Witnes Bilong Jehova.—Aisaia 11:9; Hibru 10:24, 25.
[Piksa long pes 10]
Paradais i lus
[Ol Piksa long pes 11]
Bihain long Armagedon, graun bai kamap wanpela paradais