5

I Gat Gutpela As Tru na Yumi Stap

1, 2. Olsem wanem yumi ken save, God i tingim yumi? Yumi ken painim we bekim bilong ol askim long i stap bilong yumi?

¹ Dispela graun na olgeta samting i stap laip long en i kamapim klia tru olsem dispela Man i bin wokim ol dispela samting em i save tingim tru yumi. Baibel tu i kamapim klia olsem God i tingim yumi. Baibel i bekim stret ol askim olsem: I gat wanem as na yumi stap long graun? Wanem samting bai painim yumi long bihain?

² Yumi mas wok long painim ol dispela bekim insait long Baibel. Baibel i tok: “Sapos yupela i wok long painim [God], orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.” (2 Stori 15:⁠2) Yumi laik save, God i gat wanem laik long yumi. Orait, sapos yumi skelim gut ol tok bilong Baibel, bai yumi kisim wanem save long dispela samting?

Bilong Wanem God i Wokim Ol Man?

3. Bilong wanem God i bin wokim graun?

³ Baibel i kamapim klia olsem God i bin wokim graun na bai ol man i ken i stap long en. Aisaia 45:18 i tok, God “i no wokim graun bilong i stap nating. Nogat. Em i bin wokim bilong olgeta samting i ken i stap long en.” Na em i bin putim olgeta samting long graun em ol man i mas kisim na bai ol i ken amamas long i stap bilong ol.​—⁠Stat sapta 1 na 2.

4. Bilong wanem God i bin wokim namba wan man na meri?

⁴ Long Baibel God i stori long taim em i wokim namba wan man na meri, em Adam na Iv, na em i tokim yumi long em i gat wanem laik long ol man. Em i tok: “Yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.” (Stat 1:26) Em nau, ol man i mas bosim olgeta samting long graun.

5. God i putim we dispela namba wan man na meri?

⁵ God i wokim wanpela gutpela gaden, olsem bikpela pak, long hap ol i kolim Iden, em i stap long hap bilong Midel-Is. Bihain em “i kisim dispela man em i bin wokim na i putim em long dispela gaden long Iden, bai man i ken i stap na lukautim dispela gaden.” Em i wanpela ples paradais i gat olgeta kaikai em Adam na Iv i mas kisim, na i gat “ol kain kain diwai, pikinini bilong ol i gutpela long kaikai. Olgeta dispela diwai i naispela tru,” na i gat kain kain animal tu.​—⁠Stat 2:​7-9, 15.

6. God i givim wanem kain skin na tingting long man na meri?

⁶ God i wokim skin bilong namba wan man na meri i gutpela olgeta, olsem na tupela i no inap sik o go lapun o dai. Na God i wokim ol bambai ol yet i ken tingim wanem rot ol i laik bihainim. Stat 1:27 i tok: “Orait God i wokim ol manmeri na ol i kamap olsem God yet. God i mekim ol i kamap man na meri.” God i wokim yumi i kain olsem em yet, olsem na taim em i givim skin na tingting long yumi, em i putim laik long bel bilong yumi long laikim stretpela pasin na ol samting bilong spirit, na yumi mas inapim dispela laik bambai yumi ken i stap amamas tru. God i wokim rot bambai yumi ken inapim ol dispela laik wantaim laik bilong kisim kaikai na wara na pulim win. Olsem Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.”​—⁠Matyu 4:⁠4.

7. God i givim wanem wok long namba wan man na meri?

⁷ Na God i givim wanpela gutpela wok tru long Adam na Iv taim tupela i stap long Iden. Em i tok: “Yupela i mas kamap planti na i go sindaun long olgeta hap bilong graun.” (Stat 1:28) Tupela inap kamapim ol pikinini i gutpela olgeta. Na taim ol man i kamap planti, ol bai i gat gutpela wok long skruim dispela ples paradais bilong Iden i go bikpela bikpela. Bihain olgeta hap bilong graun bai kamap olsem paradais, na ol manmeri i gutpela olgeta ol inap i stap oltaim long en na i stap amamas. Baibel i tok, taim God i mekim pinis ol wok bilong kamapim dispela laik bilong em, em “i lukim olgeta dispela samting i gutpela, na em i amamas tru.”​—⁠Stat 1:31; lukim tu Song 118:⁠17.

8. Ol man i mas mekim wanem long lukautim graun?

⁸ God i laik bai ol man i kisim ol samting bilong graun bilong helpim ol. Tasol ol i mas bihainim gutpela tingting na lukautim gut graun​—⁠ol i no ken bagarapim ol samting long graun. Long nau ol man i wok long bagarapim graun, tasol dispela i no laik bilong God. Ol man i mekim olsem ol i sakim laik bilong God. Ol i mas kisim strafe long dispela, long wanem, Baibel i tok God bai i “bagarapim ol man i bin bagarapim graun.”​—⁠Kamapim Tok Hait 11:⁠18.

Laik Bilong God i Stap Yet

9. Olsem wanem yumi ken bilip tru olsem God bai kamapim tru laik bilong em?

⁹ Olsem na laik bilong God long pastaim tru, em i laik bai ol manmeri i gutpela olgeta ol i ken stap oltaim long paradais long graun, olsem wanpela bikpela famili. Na dispela laik bilong God i stap yet! Em bai kamapim tru, long wanem, em yet i tok: “Samting mi tingting pinis long mekim, em bai mi mekim.” “Ol samting mi makim pinis bilong mekim, em bai mi mekim.”​—⁠Aisaia 14:24; 46:⁠11.

10, 11. Jisas na Pita na Devit ol i tok wanem long Paradais?

¹⁰ Jisas i bin toktok long laik bilong God long kamapim bek paradais long graun taim em i tokim wanpela man, “Bai yu stap wantaim mi long Paradais.” (Luk 23:​43, Nupela Testamen bilong 1978) Aposel Pita tu i tok profet long nupela taim bai kamap, em i tok: “God i promis pinis long em bai i wokim nupela skai [em wanpela nupela gavman bai stap long heven na bosim graun] na nupela graun, [em lain bilong i stap long nupela taim] na stretpela pasin tasol bai i stap long en.”​—⁠2 Pita 3:⁠13.

¹¹ Devit tu i bin raitim sampela tok long dispela nupela taim i laik kamap na em bai stap inap hamas yia. Em i tok profet olsem: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Olsem na Jisas i tok promis olsem: “Ol man i save daunim nem bilong ol yet, em ol i ken amamas. Bai God i givim olgeta graun long ol.”​—⁠Matyu 5:⁠5.

12, 13. Stori long ol gutpela samting God i laik mekim bilong helpim ol man.

¹² Em gutpela samting tru, a? Yumi inap i stap oltaim long paradais long graun, na i no gat pasin nogut o pasin raskol na bagarapim man, o sik o hevi o pen! Laspela hap bilong Baibel i tokaut long gutpela samting tru God i laik mekim, olsem: “[God] bai i mekim drai wara i stap long ai bilong olgeta . . . na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Na em i tok: “Dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, . . . ‘Dispela tok em i tru olgeta, inap olgeta man i ken bilip tru long en.’ ”​—⁠Kamapim Tok Hait 21:​4, 5.

¹³ Em nau, God i tingting long kamapim nupela taim i gat stretpela pasin bai stap long en, em wanpela paradais bai stap oltaim. Em bai truim dispela tok promis bilong em, long wanem, “tok [bilong em] i tru olgeta, inap olgeta man i ken bilip tru long en.”

[Ol Piksa long pes 20, 21]

Em laik bilong God long ol man i ken stap oltaim long paradais long graun. Dispela laik bilong em i stap yet

[Piksa long pes 22]

Papa bilong haus inap bekim nogut long ol man i sindaun long haus bilong em na ol i bagarapim