Paradais Em Baibel i Stori Long En i Stap We?

Ol Man i Askim . . .

Paradais Em Baibel i Stori Long En i Stap We?

▪ Wanpela man husat i hangamap klostu long Jisas em i strongim bel na i tokaut olsem em i bilip long Jisas, na Jisas i tok promis long em olsem: “Yu bai stap wantaim mi long Paradais.” (Luk 23:43, NW) Dispela man bai i stap we? Olsem wanem? Paradais bai stap long heven, long graun, o long wanpela hap we ol manmeri i stap na wetim kot bilong God?

Tupela tumbuna bilong yumi bilong pastaim tru i bin stap long Paradais. Baibel i tok: “God, Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim. Orait God, Bikpela . . . i putim em long dispela gaden long Iden, bai man i ken i stap na lukautim dispela gaden.” (Stat 2:8, 15) Taim ol i bin tanim dispela tok long tok Grik, ol i kolim dispela tok “gaden” olsem pa·raʹdei·sos, ol i kisim Tok Pisin “paradais” long en.

Taim papamama i kamapim planti pikinini, ol i save skruim haus bilong ol i go bikpela, na olsem tasol God i laik bai tupela tumbuna bilong yumi long bipo i mas skruim Paradais i go bikpela taim famili bilong ol i kamap planti. God i bin tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.”—Stat 1:28.

Man Bilong Wokim yumi em i bin tingting long ol manmeri i mas i stap na kamapim ol pikinini long Paradais hia long graun. Ol bai stap oltaim long wanpela gaden i stap long dispela graun we i no gat ol ples matmat long en. Graun i mas i stap ples tru bilong olgeta manmeri i ken i stap long en inap oltaim oltaim. Tru tumas, ol samting i stap long graun na i wok gut wantaim i save givim bikpela amamas long yumi! God i bin wokim yumi bilong i stap long graun i naispela tru.

Yu ting God i bin senisim tingting bilong em? Nogat. Jehova i tok: “Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11) Inap 3,000 yia samting bihain long taim God i bin wokim namba wan man, Baibel i tok God “i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Laik bilong God i no bin senis. Dispela graun bai kamap wanpela paradais gen.

Tingim dispela: Planti ves bilong Baibel i toktok long Paradais, ol i stori long i stap bilong ol man long graun. Olsem: Wanpela tok profet bilong Aisaia i tok: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring.” (Aisaia 65:21) Ol i save wokim we ol haus na planim gaden wain? Long wanem hap ol i save kaikai pikinini bilong wain? Em long dispela graun. Sindaun 2:21 i tok klia olsem: “Ol gutpela stretpela man bai i stap gut oltaim long graun bilong yumi.”

Jisas tu i toktok long wanpela paradais long graun. Tru, em i tok promis long wanpela paradais long heven, tasol dispela em i bilong wanpela liklik lain em God i bin makim. (Luk 12:32) Taim ol i dai pinis, ol i kirap bek na i go antap long dispela Paradais bilong heven na wok wantaim Krais long bosim Paradais bai kamap long graun. (KTH 5:10; 14:1-3) Dispela lain i wok king wantaim Jisas long heven ol bai mekim gut wok bilong bosim graun na lukautim ol samting bilong graun bambai i stret tru inap long mak God i laikim.

Jisas i save, dispela em i laik bilong God long ol samting bai painim dispela graun. Jisas i bin stap long heven wantaim Papa bilong em taim God i wokim gaden Iden. Olgeta manmeri bilong nau i bilip long em ol inap i stap long Paradais bihain bai kamap long graun. (Jon 3:16) Jisas i tok promis long ol dispela manmeri olsem: “Yu bai stap wantaim mi long Paradais.”—Luk 23:43, NW.

[Piksa Kredit Lain long pes 25]