Tingim Gut Ol Papa na Mama Wanpis

I GAT planti samting i save pulim bikpela haptaim na strong bilong ol papa na mama wanpis. Ol i gat bikpela hatwok na planti hevi. Na ol i mas mekim planti wok bilong lukautim na mekim bikpela long ol pikinini bilong ol. Ol i mas mekim wok mani, baim ol samting, kukim kaikai, klinim haus, na mekim wok olsem papa na mama. Na tu, ol i mas lukautim ol pikinini long sait bilong helt, makim taim bilong kisim amamas, strongim bel bilong ol, na sapos inap, kisim haptaim bilong ol yet.

Long nau, namba bilong ol famili i gat papa o mama tasol i wok long go antap tru, tasol planti taim ol man i no save tingim tumas ol. Olsem wanpela mama i tok: “Mi no bin tingim tumas ol kain famili olsem inap long taim mi yet i kamap wanpela mama wanpis.” Yu inap mekim wanem bilong soim olsem yu tingim ol papa o mama wanpis? Yu save wari long ol? Yumi ken skelim 3-pela as na yumi mas tingim ol long ol samting ol i mas kisim.

As na Yumi Mas Tingim Gut Ol

Planti papa na mama wanpis i gat laik long kisim helpim. Wanpela wido i gat 41 krismas husat i bin mekim bikpela long tupela pikinini, em i tok: “Sampela taim mi no save long wanem samting bai mi mekim, na mi pilim olsem mi gat planti wok tumas na dispela i daunim mi.” Poroman marit i dai, poroman marit i lusim narapela, o sampela narapela hevi i kamap, dispela i mekim na planti papa o mama i stap wanpis i pilim wankain olsem wanpela mama wanpis. Em i tok: “Mipela i gat laik tru long kisim helpim, na mipela i nidim tru helpim!”

Dispela i mekim yu yet i amamas. Olsem wanem? Yu bin helpim wanpela long karim sampela samting i hevi tumas long wanpela man tasol i karim? Sapos olsem, ating yu bin amamas olsem yu bin helpim wanpela husat i mas kisim helpim. Olsem tasol, sampela taim hevi i painim papa o mama wanpis i bikpela tumas long em wanpela i karim. Taim yu luksave long ol samting ol i mas kisim na yu helpim ol, bai yu yet i lukim truim bilong tok i stap long Song 41:​1, em i tok: “Man i save tingim ol rabisman na i helpim ol, dispela man i ken amamas.”

God i laikim dispela pasin. Jems 1:27 i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol.” Pasin bilong lukautim ol papa na mama wanpis tu i insait long dispela.a Hibru 13:16 i tok: “Yupela i mas mekim gutpela pasin long ol manmeri. Na sapos sampela i sot long ol samting, orait yupela i mas givim sampela samting bilong yupela bilong helpim ol. Yupela i no ken lusim tingting long mekim ol dispela kain pasin, long wanem, em dispela kain ofa God i save laikim tru.”

Yumi stori pinis long 3-pela as na i gutpela yumi tingim ol papa na mama wanpis, orait nau yumi laik skelim wanem samting yumi ken mekim bilong helpim ol, na olsem wanem yumi ken save olsem samting yumi mekim bai helpim tru ol.

Luksave Long Ol Samting Ol i Mas i Gat

Ating wanpela samting yumi olgeta i save mekim em long askim papa o mama wanpis olsem, “I gat sampela samting mi ken mekim bilong helpim yu?” Tasol tru tru taim yumi kamapim kain askim olsem, ol i no inap tokim yumi stret long ol samting ol i nidim. Olsem yumi stori pinis, Song 41:1 i tok, ‘tingim ol rabisman na helpim ol.’ Wanpela buk i tok, long tok Hibru dispela tok inap makim “wokim gut tingting long ol samting na mekim gutpela pasin.”

Olsem na bilong painim gutpela rot bilong helpim ol, yu mas tingim gut ol hatwok bilong ol papa o mama wanpis. Skelim gut ol samting i kamap, na no ken ting tasol olsem yu save pinis long ol samting i painim ol. Askim yu yet, ‘Sapos mi wanpela papa o mama wanpis, mi laik kisim helpim long wanem samting?’ Tru planti papa o mama wanpis bai tokim yu olsem maski yu traim bes bilong yu, yu bai kliagut tasol long hatwok bilong ol sapos yu yet i wanpela papa o mama wanpis. Tasol taim yu traim bes bilong yu long pilim hevi bilong ol, dispela bai mekim na yu inap long ‘tingim na helpim’ gut ol papa na mama wanpis.

Bihainim Gutpela Pasin Bilong God

God Jehova i save tingim tru ol papa na mama wanpis, winim pasin bilong yumi ol man long tingim ol. Planti ves long Baibel i kamapim olsem God Jehova i save tingim ol wido, ol pikinini em papa bilong ol i dai pinis, na ol papa na mama wanpis. Taim yumi skelim pasin bilong God long mekim gut long ol tarangu man olsem, yumi inap kisim gutpela skul long pasin bilong helpim gut ol long ol samting ol i nidim. I gat fopela bikpela samting yumi bai skelim.

Putim gut yau long tok bilong ol

Long Lo Jehova i bin givim long lain Israel bilong bipo, em i tokaut stret olsem em bai “harim singaut” bilong ol tarangu lain. (Kisim Bek 22:​22, 23) Olsem wanem yu ken bihainim dispela gutpela pasin bilong em? Planti taim ol papa o mama wanpis i save pilim olsem ol i stap wanpis tru na i no gat narapela man o meri i bikpela pinis i stap wantaim ol bilong ol i ken toktok wantaim. Wanpela mama wanpis i tok: “Taim ol pikinini i go slip pinis, mi save krai planti. Sampela taim i hatwok tru long karim hevi bilong i stap wanpis.” Sapos i stret long mekim, inap yu makim haptaim bilong “harim singaut” bilong wanpela papa o mama wanpis husat i gat laik long kamapim tingting bilong em? Taim yu putim gut yau long toktok bilong ol, dispela bai helpim tru ol long mekim gut wok olsem papa o mama wanpis.

Mekim ol gutpela tok bilong strongim bel

Jehova i bin kirapim ol man long raitim ol song holi em lain Israel inap singim long taim bilong lotu. Tingim ol gutpela tok bilong strongim bel em ol wido na ol pikinini em papa bilong ol i dai pinis i bin kisim taim ol i singim ol song em holi spirit bilong Jehova i bin kirapim ol man long raitim. Ol dispela song i kirapim ol long tingim olsem Jehova em i stap olsem wanpela “papa” na “jas” long ol, na em bai helpim tru ol. (Song 68:​5, NW; 146:9) Yumi tu inap mekim ol tok bilong strongim papa o mama wanpis, em ol i ken tingim yet long ol yia i kam. Maski 20 yia i go pinis, Ruth em wanpela mama wanpis, em i tingim yet tok bilong wanpela papa olsem: “Yu mekim gutpela wok tru long mekim bikpela long tupela pikinini man bilong yu. Mekim yet dispela gutpela wok.” Ruth i tok: “Taim mi harim ol dispela tok bilong em, dispela i mekim sampela bikpela samting long mi.” Tru tumas, ‘gutpela tok i olsem diwai bilong givim laip’ na inap strongim wanpela papa o mama wanpis. (Sindaun 15:4) Yu inap tingim sampela gutpela tok yu ken givim long wanpela papa o mama wanpis?

Helpim ol long ol samting bilong skin

Lo Jehova i givim long lain Israel bilong bipo i gat tok long pasin ol Israel i mas mekim bambai ol wido na ol pikinini em papa bilong ol i dai pinis ol i ken kisim kaikai long pasin we i givim rispek long ol. Long kain rot olsem ol tarangu lain “bai i gat inap kaikai.” (Lo 24:​19-21; 26:​12, 13) Long gutpela tingting na long pasin rispek, yumi tu inap givim kaikai na klos samting long ol famili i gat papa o mama wanpis em ol i sot long ol samting. Yu inap go lusim sampela kaikai long haus bilong ol? Yu gat sampela klos we papa o mama wanpis o pikinini inap yusim? O yu inap givim sampela mani bambai papa o mama wanpis i ken baim ol samting famili i nidim?

Bung na amamas wantaim ol

Jehova i tok, ol wido na ol pikinini em papa bilong ol i dai pinis, ol tu i mas insait long ol bikpela bung bilong lotu i save kamap long olgeta yia, na bai ol i ken bung na amamas wantaim ol wanlain Israel bilong ol. Jehova i tokim ol olsem: “Yupela i mas amamas.” (Lo 16:​10-15) Olsem tasol long nau, Baibel i kirapim ol Kristen long ‘lukautim gut’ ol narapela manmeri bilong God na stretim rot bilong bung na amamas wantaim ol. (1 Pita 4:9) Olsem wanem? Yu inap singautim famili we i gat papa o mama wanpis long kam kaikai wantaim yu long haus bilong yu? Yu no mas wokim bikpela kaikai. Taim Jisas i bung na kaikai wantaim ol pren bilong em, em i tok i no gat wok long redim bikpela kaikai.​—Luk 10:42.

Ol Bai Pilim Tru Taim Yu Tingim Ol

Kathleen, wanpela mama wanpis husat i bin mekim bikpela long 3-pela pikinini, em i tok em i no inap lusim tingting long dispela savetok: “No ken ting olsem yu bai kisim wanpela samting; amamas long olgeta samting yu kisim.” Olsem Kathleen, planti papa o mama wanpis i luksave olsem em wok bilong ol wan wan yet long mekim bikpela long ol pikinini bilong ol. Olsem na ol i no gat tingting long ol narapela i mas mekim ol samting bilong helpim ol, em ol samting ol yet i mas mekim. Tasol ol i amamas long helpim em ol i kisim long ol narapela. Taim yu tingim ol papa o mama wanpis, dispela bai givim amamas long ol na long yu yet tu, na yu ken save olsem God Jehova “bai i bekim dispela dinau.”​—Sindaun 19:17.

[Futnot]

[Piksa long pes 24]

Wanem laspela taim yu bin singautim wanpela famili i gat papa o mama wanpis i kam kaikai long haus bilong yu? Yu inap mekim olsem long nau?