Ol i Stap Papa o Mama Wanpis, Tasol i No Olsem Ol i No Gat Helpim

“Taim ol pikinini bilong mi i kam long haus na ol i holimpasim mi na tokim mi olsem ol i laikim mi, em nambawan gutpela samting long wok bilong stap olsem mama.”​—⁠DORIS, WANPELA MAMA WANPIS I GAT TUPELA PIKININI.

OL MAMA o papa wanpis i ken tingim dispela tok bilong Baibel bilong mekim gut bel bilong ol: “God i mekim gut long yumi na givim yumi ol pikinini olsem presen.” (Song 127:⁠3) Ol pikinini i kamap long ol famili i gat papa o mama tasol, ol i gutpela samting tru long ai bilong God wankain olsem ol pikinini i stap wantaim tupela papamama. Man bilong wokim yumi i laik bai ol famili i gat papa o mama tasol i kamap gutpela. Baibel i tok long Jehova olsem: “Em i save helpim ol meri, man bilong ol i dai pinis, na ol pikinini, papa bilong ol i dai pinis.” (Song 146:⁠9) Ol papa na mama wanpis i mas save tru olsem God i redi long helpim ol.

I stret ol pikinini i kamap bikpela insait long famili i gat pasin sori, i lukautim em gut, na i helpim em long stap belgut na amamas, dispela i helpim em long kamap strong long skin, tingting na long spirit. Em wok bilong ol papamama, na em gutpela wok ol i kisim bilong stap olsem rot God i makim bilong skulim pikinini.

Planti papa o mama wanpis i kisim save olsem wok bilong ol bai i kamap gutpela sapos ol i beten oltaim, ol i bihainim ol stiatok bilong Baibel, na ol i bilip tru long Jehova. Dispela em i stret wantaim tok bilong Song 55:22. Em i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.”

Sampela taim ol papamama i save gut long wok bilong ol, na ol bubu, na ol elda, bilong kongrigesen ol inap helpim famili i gat papa o mama tasol long karim ol bikpela hevi. Tru, ol famili na ol wanlotu i ken helpim papa o mama wanpis long wok em i mekim, tasol bikpela wok em God i givim long papamama bilong pikinini.a

Gutpela tru, planti papa o mama wanpis i bin lain pinis long karim ol hevi long sindaun bilong ol, na ol i bin mekim bikpela long ol pikinini i bihainim gutpela pasin na i daun long God. Nius Kirap! i toktok wantaim sampela bilong ol. Em hia sampela tok i kamapim ol samting ol papamama olsem i save mekim.

• Stretim gut ol wok bilong haus. Ol gutpela papa o mama wanpis i wok strong long stretim gut ol samting na ol i wok strong long stretim gut ol sediul. Pasin bilong skelim gut na stretim gut ol wok em bikpela samting. Baibel i tok: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting.”​​—⁠Sindaun 21:⁠5.

• Givim taim na strong. Ol gutpela papa o mama wanpis ol i putim ol wok bilong famili wantaim ol narapela namba wan wok ol i mas mekim. Ol i tingim ol samting ol pikinini bilong ol i mas i gat na ol i no tingim laik bilong ol yet.​​—⁠1 Timoti 5:⁠8.

• Stretpela tingting long mekim ol samting. Ol gutpela papa o mama wanpis i no tingim ol hevi i olsem samting nating o tingim ol olsem ol i bikpela tumas, ol i painim rot long stretim. Ol i orait long samting i gat hatwok bilong en, na ol i wok long mekim tasol na ol i no bel hevi o bel nogut i stap.

• Toktok gut wantaim. Ol gutpela papa o mama wanpis i strongim pasin bilong toktok gut wantaim. Ol i kirapim olgeta long famili long kamapim tingting bilong ol na ol samting ol i pilim long bel. Wanpela papa wanpis i tok long ol pikinini bilong em olsem: “Taim mi gat rot, mi save toktok wantaim ol. Taim mipela i kukim kaikai bilong apinun, mipela i save toktok gut wantaim. Long kain taim olsem, ol i save kamapim ol tingting i stap long bel bilong ol.”

• Lukautim yu yet. Maski i gat planti samting i pulim taim bilong ol, ol gutpela papa o mama wanpis i save olsem pasin bilong lukautim ol yet long samting bilong spirit, tingting na bel, na skin em bikpela samting. Ethel em wanpela mama i gat tupela pikinini na marit bilong em i bruk, em i tok: “Mi mas i gat taim bilong mi yet. Olsem: Taim wanpela pren i lainim ol pikinini long pilai musik samting, long dispela taim mi gat wanpela aua bilong mi yet. Mi sindaun na mi no lukim TV.”

• Holim stretpela tingting. Ol gutpela papa o mama wanpis i holim stretpela tingting long wok bilong papamama na sindaun bilong man. Ol i tingim ol gutpela samting bilong ol hevi. Wanpela mama wanpis i tok: “Mi luksave olsem i no nogut olgeta long i stap olsem mama wanpis.”

Stori Bilong Sampela

Yu ting ol dispela stiatok i gat strong? Yes, olsem nau yumi ken lukim long sampela stori bilong ol papa na mama wanpis. Gloria em yumi stori long em pastaim em wanpela mama em marit bilong em i bruk na em i wok long Inglan na em i mekim bikpela long tupela pikinini man na wanpela pikinini meri. Tripela pikinini wantaim ol i mekim wok Kristen na autim tok bilong God fultaim, ol i givim laip bilong ol yet long skulim ol man long Baibel. Taim ol i askim Gloria olsem wanem wok bilong em i kamap gutpela, em i tok: “Namba wan samting mi wok strong long en em pasin bilong mekim famili Baibel-stadi long olgeta taim na i gat amamas long en. Mi laik bai ol pikinini i mas amamas, ol i no ken tingting planti, ol i mas stap bel isi na ol i mas was gut long ol samting bilong pundaunim ol. Mi painim wanpela wok mani bilong mekim long nait. Tingting bilong mi em mi laik bai ol pikinini i mas stap wantaim mi long ol hap mi stap long en. Paslain long mi go wok, mipela i beten na ol i go slip. Anti bilong mi i stap long haus taim mi go wok.”

Olsem wanem Gloria i bin helpim ol pikinini bilong em long makim ol gutpela wok ol bai mekim? Gloria i tok moa olsem: “Bikpela tingting bilong mi em long putim ol samting bilong spirit i stap namba wan. Mipela i no gat planti mani, na mi save tokaut stret long dispela samting. Ol samting mi askim ol long mekim, mi yet i save mekim, na olgeta i wok gut wantaim mi.” Gloria i tingim bek pasin bilong ol long pas gut wantaim na em i tok: “Bikpela samting em mipela i mekim ol samting wantaim. I no gat wanpela bilong mipela i save go long rum bilong em na i stap wanpis, nogat. Mipela olgeta i kukim kaikai wantaim, klinim ples, na bilasim haus wantaim. Mipela i skelim gut ol wok bilong mipela. Na mipela i save gat amamas tu.”

Carolyn em i wanpela mama wanpis i gat wanpela pikinini man, em i amamas long pasin bilong pikinini bilong em. Wanem samting i helpim Carolyn? Em i tok: “Mitupela i save ritim Baibel long olgeta de paslain long mipela i slip, na bihain mi askim em long ol samting em i lainim. Na tu, mipela i makim sampela tok long ol nius i kamapim ol tok bilong Baibel na mipela i bihainim. Dispela i helpim Joseph taim em i bungim ol hevi, olsem pasin bilong mekim nogut long ol pikinini long skul.” Carolyn i tokaut olsem em i gat hatwok, tasol em i no pilim olsem em i stap wanpis na no gat helpim. Em i tok: “Olgeta taim mi save wok hat, tasol mi pilim olsem Jehova i save helpim mi tru. Long rot bilong kongrigesen Kristen, mi kisim ol tok bilong strongim mi.”

Ol gutpela stori bilong planti tausen papa na mama wanpis, olsem Gloria na Carolyn, i soim olsem ol papa o mama wanpis long nau i ken bilip long ol stiatok bilong Baibel bilong helpim ol long kamapim ol gutpela pikinini i strong long ol samting bilong spirit. (Sindaun 22:⁠6) Gutpela samting inap kamap! Planti samting i givim hatwok long papa o mama wanpis i lukautim pikinini, tasol em rot ol i ken wok long kisim pasin bilong sanap strong na tingim ol narapela. Pasin bilong bilip tru long God na bilip olsem em bai helpim yu em nambawan rot bilong helpim ol papa o mama wanpis long mekim ol wok bilong ol.​​—⁠Song 121:​1-3.

[Futnot]

[Ol Piksa long pes 23]

Famili Baibel-stadi i bin helpim 3-pela pikinini bilong Gloria long kamap ol wokman Kristen i autim tok bilong God fultaim. Long hia ol i lukluk long pas na poto bilong namba wan pikinini em i mekim wok misineri

[Ol Piksa long pes 24]

Carolyn na pikinini man bilong em, Joseph