Bai Yumi Go Long Heven o Olsem Wanem?

ATING mama i karim yumi bilong i stap liklik taim tasol long graun na karim hevi na bihain, sapos yumi bin mekim gutpela pasin, bai yumi go long heven na i stap amamas oltaim? O sapos yumi bin mekim pasin nogut bai yumi go long ples paia na kisim pen oltaim? Olsem wanem long dispela graun? Bihain bai graun i paia olgeta?

Planti hetman bilong ol misin bilong Krisendom i bilip olsem. Tasol yu gat wanem tingting long dispela samting? Baibel i tok wanem long graun na ol samting God i laik mekim long graun? Long Sam 115:16 Baibel i tok: “Heven em i ples bilong God tasol, na em i givim graun long yumi manmeri”.

Baibel i tok God i wokim namba wan man na meri i kamap olsem em na em i putim tupela i stap hia long graun. (Jenesis 1:26-28) No gat liklik hap tok long Baibel i tok God i laik bai ol i stap liklik taim tasol long graun na bihain bai ol i dai na i go long heven o narapela ples. Nogat. God i tok tupela i mas kamapim planti pikinini “ bai ol i go sindaun long olgeta hap bilong graun.”

God i mekim wanpela hap bilong graun i kamap gutpela ples na em i putim namba wan man na meri long en. Baibel i tok: “Orait Yawe God i kisim man na i putim em long dispela gaden long Iden, bai em i wok na i was long en.” (Jenesis 2:8, 15) Bihain ol i mas skruim dispela gaden i go na bai olgeta hap bilong graun i kamap gutpela ples Paradais i gat olgeta gutpela kaikai na wara samting.

God i no wokim man bilong i stap liklik taim tasol long graun. Nogat. God i tokim Adam: “Yu inap kaikai pikinini bilong olgeta diwai long dispela gaden. Tasol yu no ken kaikai pikinini bilong dispela diwai bilong mekim man i ken save long wanem samting i gutpela na wanem samting i nogut. I tambu tru long yu kaikai pikinini bilong dispela diwai. Sapos yu kaikai bambai yu dai.”—Jenesis 2:16, 17.

Seten i traim Adam tupela Iv na tupela i brukim lo bilong God na tupela i kisim dispela strafe God i bin kolim. Tupela i dai. Tasol yu tingting: Sapos tupela i no bin sakim tok, bai olsem wanem? Bai tupela i no i dai, a? Bai tupela i stap oltaim oltaim. Yes, bai Adam tupela Iv i stap laip yet na i stap gutpela tru na i stap amamas.

Olsem Wanem long Graun long Bihain?

Wanpela man i raitim wanpela buk na em i kolim gut tingting bilong ol misin bilong Krisendom long ol samting bai painim dispela graun long bihain. Em i stori long 2 Pita 3:10 na em i tok:

“Graun tu, wantaim olgeta samting ol i wokim i stap long en, bai paia i kukim olgeta. Olgeta samting God na ol man i bin wokim bai pinis—ol diwai sayor samting na ol animal, na olgeta taua na taun na haus bilong king, na olgeta samting ol saveman i bin wokim, na ol piksa, na ol lo, na ol buk, em ol man i bin wokim.” (Albert Barnes long buk Notes on the New Testament)

Olsem dispela man i tok, ol misin bilong Krisendom i bilip olsem bihain bai dispela graun i paia olgeta na bai ol man na ol animal samting i no inap i stap moa long en. Planti manmeri i go long lotu ol i ting bihain bai i no gat wok moa long graun, long wanem ol i ting graun em i ples bilong i stap liklik taim tasol long en na mekim gutpela pasin o pasin nogut na bihain bai ol i go long heven o long hel-paia.

Tasol olsem wanem long laik bilong God? Yu ting em i bin senisim tingting bilong em? Em i wokim Adam tupela Iv bilong i stap oltaim long graun na taim tupela i mekim sin, yu ting em i senisim laik bilong em? Nogat tru. No gat wanpela tok long Baibel i tok olsem. Planti yia bihain long taim namba wan man na meri i bin mekim rong, spirit bilong God i givim tingting long profet Aisaia na Aisaia i raitim tok olsem:

“Jehova em i Man bilong wokim heven, em i God tru, em i Man bilong wokim graun, em i Man bilong putim gut dispela graun na em i no wokim bilong i stap nating; nogat; em i wokim bilong man i ken i stap long en.” Na Aisaia i kolim tok bilong Jehova, olsem: “Tok bilong mi i no ken lus nating, na olgeta samting mi save amamas long en bai mi mekim.” (Aisaia 45:18, NW; 46:10, NW) Man bilong raitim sam i stori long God na em i tok: “Yu save bihainim tok bilong yu oltaim oltaim. Yu putim graun i stap long ples bilong en, na i stap olsem na i no save surik.”—Sam 119:90.

Olsem na Baibel i tok klia, God i wokim dispela graun bilong i stap oltaim, na em i wokim bilong ol man i ken i stap long en. Dispela laik bilong God i no senis. Bai God i kamapim laik bilong em. Bai em i mekim ol samting em i bin tok long mekim. Tok bilong em i no ken lus nating

Tasol Baibel i tok sampela bai ol i long heven, a? Tru, na Baibel i kolim namba bilong ol. Ol i liklik lain tasol nau i gat as tru na ol i go long heven. God i gat wok bilong ol man long heven; na em no ken kisim ol i go long heven bambai: inap i stap amamas oltaim. Nogat. Sapos em i laik mekim olsem bai em i wokim long heven long pastaim na ol i no karim pen na hevi long graun.

Tasol taim Adam tupela Iv i bihainim laik bilong ol yet na brukim lo bilong God, long dispela taim God i tingim ol samting em i mas mekim bilong baim bek ol man. Em i mekim olsem taim em i “no wokim graun yet,” olsem taim Adam tupela Iv i no kamapim yet sampela pikinini em God inap baim bek ol, olsem Ebel. Pastaim ol dispela samting God i laik mekim i “stap hait,” tasol bihain em i kamapim ples klia.—Rom 16:25; Efesas 1:4.

Tok promis God i mekim long kamapim wanpela “lain” o ‘pikinini’ long wanpela “meri” bilong krungutim het bilong “snek” na pinisim ol hevi pasin bikhet i bin kamapim, dispela tok promis i kamapim liklik ol samting God i laik mekim. (Jenesis 3:14, 15) Olsem nupela plaua isi isi i go bikpela na i bruk na op, olsem tasol isi isi God i kamapim ol tok long dispela ‘pikinini’ na taim Jisas i kam pinis long graun, nau God i kamapim ples klia dispela tok i “stap hait.” Yes, God i tokaut long dispela ‘pikinini’em i Pikinini bilong em yet, Krais Jisas, wantaim ol 144,000 wanwok bilong em, em God i bin “baim bek ol namel long olgeta man bilong graun.” “Ol dispela manmeri wantaim Krais ol i olsem dispela Kingdom o nupela gavman em bai bosim graun.—Revelesen 14:3, 4; Galesia 3:16, 26-29.

Ol manmeri bilong dispela gavman, ol bai lusim graun na i go mekim wok bilong ol long heven, tasol God i no bin kolim nem bilong olgeta wan wan o makim ol taim mama i no karim yet ol. Nogat. God i tok tasol bai i gat wanpela lain bilong mekim dispela wok long heven. Bihain, taim Pikinini bilong em i kam pinis long graun na opim dua bilong kisim laip long heven, God i kirap makim ol manmeri bilong dispela lain.

Taim dispela laik bilong God bipo i “stap hait” em i kamap ples klia pinis, nau aposel Pol, em wanpela bilong dispela lain bilong heven, em inap raitim pas long ol narapela manmeri bilong dispela lain na stori long dispela samting. Dispela laik bilong God i kamapim marimari bilong em na Pol i tok:

“[God] i kapsaitim dispela marimari planti tumas long yumi, na em i givim olgeta kain save wantaim gutpela tingting long yumi. Bipo God i tok pinis long dispela samting em i laik mekim long wok bilong Krais. Na em i bihainim dispela tingting tasol na i soim yumi dispela laik bilong en bipo i stap hait. Dispela laik bilong em i olsem: Em i laik stiaim olgeta samting i go i go, na long dispela taim em i makim pinis, bai em i bungim olgeta samting long Krais, ol samting bilong heven na bilong graun tu. Na Krais i ken i stap het bilong olgeta samting. Em i bihainim dispela laik bilong en na i makim yumi bipo [em i no makim ol wan wan, tasol em i makim dispela lain i gat namba bilong en]. Na long Krais em i putim yumi pinis long lain bilong em yet. Yes, sapos God i ting long mekim wanpela samting, orait em i save kamapim tu.”—Efesas 1:8-11; Revelesen 14:1-4.

Graun Bai Paia o . . . ?

Tasol olsem wanem long tok bilong Pita em i tok, “dispela tok tasol i pasim skai na graun i stap yet bilong wetim paia i kamap long en”? (2 Pita 3:7) Pita i no tok long skai tru na graun tru, long wanem Baibel i tok skai na graun i bilong i stap oltaim. (Eklisiastis 1:4) God i no ken pinisim “skai” o heven, em dispela ples em i stap long en, na em i no ken pinisim skai tru, olsem san na mun na ol sta samting. Na em i no ken pinisim graun tu. Graun yet i no gat rong maski ol man i bin mekim pasin nogut na bagarapim graun. Jehova yet i tok, taim em i wokim graun na ol pikinini bilong em long heven i lukim em i narapela kain na i gutpela tru, ol i “singaut na amamas.”—Jop 38:4-7, NW.

God i laik bungim dispela lain bilong heven bilong kamapim laik bilong em long graun na truim dispela beten ol man i bin mekim inap longtaim pinis, olsem: “Mipela i mas bihainim laik bilong yu long graun olsem ol i bihainim long heven.” (Matyu 6:10) Na taim Jisas i mekim tok antap long maunten, em i kolim tok bilong Sam 37:10, 11, na em i tok: “Ol man i no save hambak na bikhet, em ol i ken amamas. Bai God i givim olgeta graun long ol.” (Matyu 5:5) Dispela tok i soim yumi, Jisas i no ting yumi bilong i stap liklik taim tasol long graun na bihain bai yumi go long heven. Nogat. “Liklik lain sipsip” bai ol i kisim wok bilong bosim graun inap long taim God i makim, tasol dispela tok promis bilong Jisas i bilong olgeta bilion bilion manmeri tu, em ol bai kisim laip long graun. (Luk 12:32; Revelesen 7:9, 10) Ol i no ken i stap liklik taim tasol na karim hevi, olsem long nau. Nogat. Bai ol i stap oltaim oltaim na bai ol i stap amamas!

Taim Pita i tok “skai” bai paia, em i no tok long skai tru. Dispela “skai” i makim ol gavman i bosim ol man ol i olsem “graun.” Wanpela bikpela buk (Cyclopedia bilong McClintock na Strong) i tok:

‘Taim Baibel i mekim tok profet, skai i makim . . . olgeta gavman politik i bosim ol manmeri bilong graun. Ol i antap long ol dispela manmeri, olsem skai i antap long graun, na ol manmeri i mas daun long ol.’—Vol. IV, p. 122.

Ol man i stap bos long ol gavman bilong graun ol i no gutpela olgeta na planti taim ol i mekim nogut long ol narapela man. Wok bilong ol i no kamap gutpela liklik na long ‘De bilong Jehova’ bai ol i “paia na i pinis.” “Nupela skai” bai senisim dispela olpela skai. Dispela “nupela skai” em Krais Jisas na dispela lain ol bai go long heven na kamap olsem Kingdom o Gavman bilong God. Olsem na Pita.i tok: “God i promis pinis long wokim nupela skai na nupela graun, na bai stretpela pasin tasol i stap long en. Yumi wet long dispela samting tasol.”—2 Pita 3:12, 13.

Baibel i stori long ol manmeri ol bai kamap olsem “nupela skai,” em dispela nupela gavman long heven, na Baibel i tok: “Ol man i kirap bek long dispela namba wan taim, ol i ken amamas na i stap holi. Namba tu dai i no gat strong bilong daunim ol dispela man. Nogat. Bai ol i stap pris bilong God na bilong Krais. Na bai ol i stap king wantaim Krais long dispela 1,000 yia.”—Revelesen 20:6.

Bai ol i stap king na bosim husat? Ol manmeri i stap long graun. Olpela “graun,” olsem ol man nogut na ol oganaisesen samting bilong ol, bai i pinis, olsem i paia na i pinis. Na bai i gat “nupela” graun. Pasin nogut na pasin bikhet bai pinis. Bai olgeta manmeri i stap gutpela olgeta na i stap amamas. Ol bai kamap olsem nupela graun” tru!

Tasol olsem wanem yumi ken save ol samting bai kamap tru olsem God i bin tok promis long en? God i bin mekim ol dispela tok promis longtaim bipo, olsem wanem yumi ken save em bai truim ol dispela tok? Sapos yu laik save long bekim bilong dispela tupela askim, gutpela sapos yu kaunim ol tok i kirap long pes 7.

[Piksa long pes 5]

God i putim Adam tupela Iv we? Em i laik bai tupela i stap we?

[Rait long pes 6]

Krais bai i stap King na bosim ol milion milion manmeri i stap long Paradais i kamap bek long graun