Kisim Skul Long Tok Bilong God
I Gat Wanem As na God i Wokim Dispela Graun?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. I gat wanem as na God i wokim dispela graun?
Graun em ples bilong ol man. God i wokim ol ensel bilong i stap long heven, na bihain em i wokim ol man bilong i stap amamas long graun. (Jop 38:4, 7) Olsem na Jehova i putim namba wan man long wanpela naispela paradais nem bilong en Iden, na em i givim rot long em na long ol pikinini bilong em i kamap bihain long ol i ken stap laip oltaim long graun.—Stat 2:15-17; ritim Song 115:16.
Gaden Iden i stap long wanpela liklik hap tasol bilong graun. Namba wan man na meri, em Adam na Iv, i mas kamapim ol pikinini. Taim ol i kamap planti, ol i mas i go sindaun long olgeta hap bilong graun na bosim olgeta samting i stap long en na mekim i kamap olsem paradais. (Stat 1:28) Graun bai i no inap tru long bagarap.—Ritim Song 104:5.
2. Bilong wanem graun i no wanpela paradais long nau?
Adam na Iv i sakim tok bilong God, olsem na God i rausim ol long gaden Iden. Paradais i lus, na i no gat man inap kamapim gen Paradais. Baibel i tok: “God i bin larim ol man bilong mekim pasin nogut i bosim dispela graun.”—Jop 9:24; ritim Stat 3:23, 24.
Tasol Jehova i no lusim tingting long laik bilong em long pastaim tru, na tu, em i no inap popaia. (Aisaia 45:18) Em bai kamapim gen gutpela sindaun long ol manmeri olsem em i bin tingting long mekim long bipo.—Ritim Song 37:11.
3. Olsem wanem God bai kamapim bek bel isi long graun?
Bilong ol manmeri i ken stap bel isi, God i mas pinisim ol man nogut. Long pait bilong Armagedon, ol ensel bilong God bai bagarapim olgeta man husat i birua long God. Ol bai kalabusim Satan inap 1,000 yia, tasol ol manmeri i laikim God ol bai abrusim bagarap na stap long dispela nupela taim God bai kamapim long graun.—Ritim Revelesen 16:14, 16; 20:1-3; 21:3, 4.
4. Wanem taim bai pen na hevi i pinis?
Insait long 1,000 yia, Jisas bai mekim wok king long heven na bosim graun na kamapim bek Paradais. Na tu, em bai tekewe sin bilong ol manmeri i laikim tru God. Olsem na Jisas bai pinisim sik, pasin bilong i go lapun, na indai.—Ritim Aisaia 11:9; 25:8; 33:24; 35:1.
Wanem taim bai God i pinisim pasin nogut long graun? Jisas i kolim wanpela “sain” bilong makim olsem pinis i klostu. Ol samting i kamap long nau i laik bagarapim i stap bilong ol manmeri, na dispela i soim olsem nau “pinis bilong dispela taim” i laik kamap.—Ritim Matyu 24:3, 7-14, 21, 22; 2 Timoti 3:1-5.
5. Husat bai stap long Paradais i kamap bihain?
Jisas i tokim lain bilong em long kamapim disaipel na skulim ol long pasin bilong God long laikim ol man. (Matyu 28:19, 20) Long olgeta hap, Jehova i wok long redim planti milion manmeri bilong i stap long dispela nupela taim em bai kamapim long graun. (Sefanaia 2:3) Long ol Haus Kingdom bilong ol Witnes Bilong Jehova, ol manmeri i kisim skul long olsem wanem ol i ken mekim gut moa wok bilong ol olsem man marit, papa, meri marit, na mama. Ol pikinini na ol papamama wantaim i kisim skul long as na ol i ken bilip na wetim gutpela samting bai kamap bihain.—Ritim Maika 4:1-4.
Long Haus Kingdom bai yu bungim ol manmeri husat i laikim tru God na ol i laik kisim skul long amamasim em.—Ritim Hibru 10:24, 25.
Bilong kisim sampela save moa, lukim sapta 3 bilong dispela buk, em ol Witnes Bilong Jehova i wokim. Tru Tru Baibel i Tok Wanem?