Yu ken redi long nupela taim em klostu nau bai kamap
Paradais Long Nupela Taim i Klostu!
God i wokim graun na bai ol stretpela manmeri i ken stap long en inap oltaim oltaim. (Buk Song 37:29) Em i putim fes man na meri, Adam na Iv, long naispela gaden em Iden, na em i givim wok long tupela na ol tumbuna pikinini bilong ol long mekim wok na lukautim dispela graun.—Stat 1:28; 2:15.
Long nau, graun yumi lukim i no wankain long Paradais em God i wokim long pastaim. Tasol God i no senisim tingting bilong em. Hau bai God i mekim graun i kamap wanpela ples paradais gen? Olsem ol atikol i kamap paslain i soim, God bai i no inap bagarapim graun, nogat. Em bai larim ol stretpela manmeri i stap long en. Taim God i truim ol tok promis bilong em, i stap bilong ol man long graun bai wanem kain?
Wanpela gavman
Klostu nau, taim nupela gavman bilong God long heven i bosim ol man long olgeta hap bilong graun, graun bai kamap ples we ol manmeri bai stap amamas na ol bai i stap wanbel wantaim na mekim ol wok we ol yet bai amamas long en. God i makim Jisas Krais long bosim graun. Long nau, planti man i mekim wok bos i no tingim laik bilong ol man, tasol Jisas bai tingim laik bilong ol man i stap aninit long wok bos bilong em. Em bai mekim wok bos long pasin laikim, na em bai mekim gutpela pasin, pasin marimari, na em bai stap olsem King bilong mekim pasin fea.—Aisaia 11:4.
Olgeta manmeri bai stap wanbel
Long nupela taim, ol manmeri bai stap wanbel, kantri o lain bilong man i no inap brukim pasin wanbel namel long ol. Ol manmeri bai stap olsem wanpela lain. (Revelesen 7:9, 10) Olgeta manmeri i stap long graun bai laikim God na ol narapela, na ol bai stap bel isi na wok bung wantaim long inapim laik bilong God long lukautim dispela graun.—Buk Song 115:16.
Olgeta samting long graun bai wok gut
Taim Kingdom Bilong God i bosim graun, Krieta bai kontrolim olgeta samting long weda, na olgeta bai wok gut wantaim. (Buk Song 24:1, 2) Taim Jisas i stap long graun, em i kamapim klia olsem God i givim strong long em taim em i mekim i dai strongpela win. (Mak 4:39, 41) Aninit long wok bos bilong Krais, no gat wanpela man bai pret long ol disasta em ren na win samting i save kamapim. Kingdom Bilong God bai kamapim gen laik bilong em long ol man na ol samting long graun olsem long pastaim.—Hosea 2:18.
Gutpela helt na planti kaikai
Olgeta manmeri bai i gat gutpela helt. No gat man bai sik, go lapun, o dai. (Aisaia 35:5, 6) Ol manmeri bai stap amamas long gutpela na klinpela ples olsem i bin stap long bipo long taim bilong Adam na Iv long Iden. Long paradais, olsem long Iden, graun bai kamapim planti kaikai na olgeta manmeri bai i gat planti kaikai. (Stat 2:9) Olsem lain Israel bilong God long bipo, olgeta long Paradais bai ‘kaikai bret na bel bilong ol bai i pulap.’—Wok Pris 26:4, 5.
Bel isi na pilim seif
Long taim gavman bilong God i bosim graun, olgeta manmeri bai stap bel isi na mekim gutpela pasin na pasin fea long narapela. Bai i nogat ol woa, ol man bai i no mekim wok nogut long namba bilong ol, na olgeta bai kisim ol samting ol i nidim long wan wan de. Baibel i tok promis: “Olgeta wan wan bai sindaun aninit long rop wain na diwai fik bilong em yet, na i no gat wanpela bai mekim ol i pret.”—Maika 4:3, 4.
Ol bai i gat haus na amamas long wok bilong ol
Olgeta famili bai i gat haus na ol i no inap pret olsem ol man bai rausim ol, na olgeta wok bilong ol bai kamapim gutpela samting. Olsem Baibel i tok, ol manmeri i stap long nupela taim God bai bosim “bai no inap wok hat nating.”—Aisaia 65:21-23.
Nambawan skul
Baibel i tok promis: “Graun bai pulap long save bilong Jehova.” (Aisaia 11:9) Ol manmeri long dispela nupela taim bai kisim planti save long Krieta bilong ol, em Jehova, na ol gutpela samting em i wokim. Ol bai i no inap yusim save bilong ol long wokim ol samting bilong pait o bilong bagarapim ol narapela man, nogat. (Aisaia 2:4) Ol bai lain long stap bel isi wantaim ol narapela na kisim skul long lukautim graun.—Buk Song 37:11.
Laip oltaim
God i wokim gut dispela graun na bai yumi ken stap amamas long olgeta de. Em laik bilong God long ol man i ken stap oltaim long graun. (Buk Song 37:29; Aisaia 45:18) Bilong inapim laik bilong em long pastaim, God “bai daunim dai olgeta.” (Aisaia 25:8) Baibel i tok promis: “Bai i no gat dai moa, na ol bai i no bel hevi moa na krai moa, na ol bai i no inap pilim pen gen.” (Revelesen 21:4) God bai opim rot long olgeta man—ol man em i seivim taim em i bagarapim ol man nogut na planti manmeri husat bai kirap bek long paradais bai kamap bihain—inap kisim laip oltaim.—Jon 5:28, 29; Aposel 24:15.
Long nau, planti milion manmeri i redi long stap aninit long Kingdom Bilong God em klostu nau em bai mekim wok bos. Maski ol i gat sin, ol i stap pinis olsem ol manmeri we God bai orait long ol long stap long nupela taim. Hau? Long rot bilong kisim save long Jehova God na man em i salim i kam, Jisas Krais.—Jon 17:3.
Kisim save moa long ol samting yu inap mekim bilong abrusim bagarap long taim pinis i kamap na stap long nupela taim em klostu nau bai kamap. Mekim fri Baibel stadi kos wantaim wanpela Witnes Bilong Jehova long rot bilong buk Stap Amamas Oltaim!