Ol i Abrusim Bagarap Long Taim Bilong Bikpela Hevi Tru
“Ol dispela manmeri ol i bin winim taim bilong bikpela hevi tru. Na ol i bin wasim klos bilong ol long blut bilong Pikinini Sipsip na klos i kamap waitpela.”—KTH 7:14, NW.
TAIM planti milion milion ‘stretpela man na man nogut wantaim’ i kirap bek long matmat, God i no ken putim ol long graun i no gat wanpela samting long en. (Aposel 24:15) Ol bai kirap bek long naispela graun tru, i winim bilong bipo, na bai i gat haus na laplap na planti kaikai bilong ol i redi pinis. Husat bai redim ol dispela samting? Yumi save, i gat sampela manmeri ol i stap pinis long nupela taim paslain long taim bilong kirapim bek ol lain bilong i stap long graun. Husat ol dispela manmeri ol i stap pinis? Baibel i makim olsem bai i gat sampela manmeri ol bai abrusim bagarap long taim bilong bikpela hevi tru. Wanpela bikpela tok tru bilong Baibel i kirapim moa yet tingting bilong yumi—em dispela tok long sampela manmeri i stap gut long God ol bai winim taim bilong bikpela hevi tru na i stap laip yet, na ol inap i stap oltaim oltaim na bai ol i no i dai. Baibel i mekim planti tok long dispela gutpela samting yumi inap bilip na wet long en.
Wankain Olsem Taim Bilong Noa
2 Long Matyu 24:37-39 Jisas i tok, taim bilong Noa i wankain olsem taim bilong las de, nau yumi stap long en. Em i tok: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i . . . stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.”
3 Dispela Bikpela Tait i bin pinisim olgeta man i no laik harim toksave bilong God long bagarap bai kamap. Tasol Noa wantaim lain bilong em i no bagarap. Jisas i tok, ol “i go insait long sip.” Ol i bihainim tok bilong Jehova, olsem na em i wokim rot bambai ol i ken abrusim bagarap. Namba 2 Pita 2:5, 9 i stori long dispela na i tok: “Ol manmeri bilong bipo tu, ol i bin givim baksait long God, na em i . . . mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut. . . . Sapos traim i kamap long ol man i bihainim God, orait Bikpela i save long rot bilong kisim bek ol.” Jisas i skelim taim bilong Noa wantaim taim bilong las de bambai yumi ken save, planti man i no ken putim yau long toksave bilong God long bagarap bai kamap. Tasol Jisas i tok olsem bilong strongim dispela stori long Noa wantaim lain bilong em ol i bihainim tok bilong Jehova na ol i go insait long sip na abrusim bagarap. Dispela samting i bin painim Noa wantaim lain bilong em i makim olsem lain bilong God ol i stap gut long em ol bai abrusim bagarap long las de.
Taim Bilong Ol Aposel i Olsem Piksa
4 Na Jisas i toktok tu long ol samting bai kamap long las de. Long Matyu 24:21, 22 em i tok: “Long dispela taim bai i gat bikpela hevi tru. . . . Kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.” Namba wan truim bilong dispela tok profet i kamap long taim bilong ol aposel. Long yia 66 Sestius Galus i bosim ami bilong Rom na ol i kam banisim Jerusalem. Klostu ol i brukim banis bilong haus lotu na planti Juda i redi long lusim pait na putim ol yet long han bilong ol Rom. Tasol wantu Sestius Galus i kisim ami bilong em na ol i lusim Jerusalem, na i olsem i no gat as bilong en. Orait taim ol Kristen i lukim ol Rom i go pinis, ol i bihainim tok bilong Jisas em i bin mekim planti yia bipo, em i tok: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim . . . na ol man i stap ausait long taun, ol i no ken i go insait long en.” (Luk 21:20, 21) Ol Juda Kristen em God i bin makim ol, wantu ol i ranawe lusim Jerusalem, olsem na ol i abrusim dispela bikpela bagarap i painim Jerusalem liklik taim bihain. Orait, long yia 70 Jeneral Taitus i kisim ol ami bilong Rom i kam bek. Ol i banisim Jerusalem na bagarapim tru.
5 Josifas, em man bilong raitim stori bilong ol Juda, em i tok, ol i kilim i dai 1,100,000 Juda, na ol i kisim 97,000 i go kalabus. Tasol ol dispela Juda i go kalabus, ol i no dispela lain ‘manmeri God i makim pinis,’ em Jisas i tok long en. Jisas i bin tokim ol bikhet lain bilong Jerusalem: “Harim. Nau ples bilong yupela bai i bagarap na i stap nating. . . . Yupela bai i no lukim mi moa, inap long taim yupela bai i tok, ‘God i ken mekim gut long dispela man i kam long nem bilong Bikpela.’ ” (Matyu 23:38, 39) Baibel i no tok, taim ol Rom i banisim Jerusalem ol Juda i tanim bel na bilip olsem Jisas em i Mesaia, na ol i kamap Kristen na God i orait long ol, nogat. Tasol God i sotim taim bilong dispela bikpela hevi i kamap long yia 70 na ol Rom i no banisim Jerusalem longtaim tumas. Olsem na sampela Juda ol i stap laip, tasol ol i go kalabus nabaut long ol kantri gavman Rom i bosim.
Bikpela Lain i Abrusim Bagarap
6 Tru, dispela bagarap i painim Jerusalem long yia 70 em i kamapim “bikpela hevi tru” long dispela bikpela taun bilong lotu. Tasol bikpela truim bilong dispela hap tok profet bilong Jisas i no kamap yet. Wanpela bikpela hevi moa yet bai painim wanpela bikpela taun tru bilong lotu, em Bikpela Babilon, em i makim olgeta lotu giaman bilong graun, na em bai bagarap olgeta. Na kwiktaim bihain long en wanpela bikpela hevi tru i winim olgeta bikpela hevi i bin kamap bipo, em bai painim ol narapela hap bilong dispela graun bilong Satan. (Matyu 24:29, 30; KTH 18:21) Inap 26 yia bihain long taim Jerusalem i bagarap, aposel Jon i raitim wanpela tok long Kamapim Tok Hait 7:9-14 i toktok long dispela bikpela hevi tru bai painim olgeta hap bilong graun. Em i soim yumi olsem planti manmeri tru bai abrusim dispela bagarap.
7 Dispela lain i abrusim bagarap, em Baibel i kolim “planti manmeri tru,” yumi inap luksave long ol long sampela samting ol i mekim. Olsem Kamapim Tok Hait 7:14 i tok, wanpela bilong ol 24 hetman long heven i tokim Jon, ol dispela “planti manmeri tru” i winim “bikpela hevi,” ol “i bin wasim ol klos bilong ol long blut bilong Pikinini Sipsip, na ol klos i kamap waitpela.” Ol i tokaut olsem Jehova em i Man bilong kisim bek ol. Ol i bilip long blut bilong Jisas bilong baim bek ol man, na ol i kamap olsem stretpela manmeri long ai bilong God na King em i makim, em Krais Jisas.
8 Long nau dispela lain “planti manmeri tru” ol inap olsem 5 milion, na ol i stap aninit long King Krais Jisas na ol i wok wantaim ol brata bilong Krais ol i stap yet long graun, em God i bin makim ol long spirit holi. Jisas i toktok long pasin dispela bikpela lain i mekim long ol brata bilong em, na em i tok: “Olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.” (Matyu 25:40) Dispela bikpela lain i helpim gut ol brata bilong Krais, olsem na em i tok, i olsem ol i mekim gut long em yet. Olsem na Krais Jisas wantaim God Jehova i orait long ol. Ol i bung wantaim liklik hap lain em God i makim ol pinis, na ol i kamap Witnes bilong God na ol i holim nem bilong em.—Aisaia 43:10, 11.
Was i Stap
9 Ol dispela “planti manmeri tru” ol i mas i stap stret long ai bilong Pikinini Bilong Man, na oltaim ol i mas was i stap, i go inap long las de. Jisas i tokaut klia long dispela, em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap long olgeta manmeri i stap long olgeta hap bilong graun. Oltaim oltaim yupela i mas was i stap. Na yupela i mas beten oltaim . . . bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Luk 21:34-36.
10 Pikinini Bilong Man i mas orait long yumi bambai yumi ken sanap long ai bilong em. Tasol em i no inap orait long yumi sapos yumi larim ol tingting bilong dispela graun i stiaim yumi. Ol tingting bilong graun inap pulim man na kirapim em long laikim tumas ol amamas bilong skin, o em i larim ol hevi bilong graun i daunim em na nau em i no tingim wok bilong Kingdom i namba wan samting bilong em. (Matyu 6:33) Olsem bai em i no strong moa long spirit na em i no tingting tumas long wok bilong God em i mas mekim na wok bilong em long helpim ol man. Ating em bai lusim wok autim tok, o em i mekim bikpela rong na i no laik tanim bel. Olgeta wan wan long bikpela lain ol i mas was gut long pasin bilong ol na ol i mas klia long ol man bilong dispela graun, em ol man bilong givim baksait long God.—Jon 17:16.
11 Bilong helpim yumi long mekim olsem, Jehova i givim Baibel na spirit holi na oganaisesen bilong em long yumi. Yumi mas mekim wok long ol dispela samting. Na yumi mas beten oltaim na bihainim tok bilong God bambai em i ken orait long yumi. Yumi mas nolaik tru long pasin nogut. Man bilong raitim Song i tok: “Mi no save raun wantaim ol man nogut. Mi no save wokabaut wantaim ol man bilong giaman. . . . Mi save abrusim ol. Taim yu mekim save long ol man bilong mekim sin, yu no ken pinisim laip bilong mi.” (Song 26:4, 5, 9) Insait long lain Kristen, ol yangpela na lapun tu i mas abrusim pasin bilong bung wantaim ol man i no dediket long Jehova. Bilong God i ken orait long yumi, yumi mas i stap olsem man i no gat asua long wanpela samting na i no gat hap doti bilong dispela graun. (Song 26:1-5; Jems 1:27; 4:4) Olsem na long Armagedon Jehova i no ken bagarapim yumi wantaim ol man i givim baksait long em.
Sampela “Bai Ol i No i Dai”
12 Bel bilong yumi i kirap tru taim yumi tingting long abrusim bagarap long las de na no ken i dai. Jisas i givim dispela tok promis long yumi. Taim em i laik kirapim bek pren bilong em Lasarus, Jisas i tokim susa bilong Lasarus, em Marta: “Man i bilip long mi, maski sapos em i dai, em bai i stap laip yet. Na olgeta man i stap laip na i bilip long mi, bai ol i no i dai. . . . Yu bilipim dispela, o nogat?” Marta i bilip olsem ol man i dai pinis bai kirap bek, tasol em i no kisim gut olgeta tok Jisas i mekim.—Jon 11:25, 26.
13 Jisas i no tok, ol aposel i stap gut long em ol bai i stap oltaim long skin na i no ken i dai. Tok bilong em i makim olsem ol disaipel bilong em bai i dai. (Jon 21:16-23) Na tru tumas, taim em i kapsaitim spirit holi long ol long Pentikos bilong yia 33, dispela i makim olsem ol i mas i dai bambai ol i ken stap king na pris long heven. (KTH 20:4, 6) Olsem na olgeta Kristen i bin stap long taim bilong ol aposel, ol i dai pinis. Tasol i gat as na Jisas i bin tok olsem. Dispela tok long sampela bai i stap oltaim na i no ken i dai, truim bilong en bai kamap tru.
14 I olsem: Ol Kristen God i bin makim long spirit holi na ol i stap gut long em, ol i no ken i dai na pinis olgeta inap oltaim oltaim. (KTH 20:6) Na tu, taim Jisas i mekim dispela tok, em i toktok long taim Jehova bai kirap na pinisim olgeta pasin nogut long graun, olsem em i bin mekim long taim bilong Noa. Ol man i mekim yet wok bilong God long dispela taim, ol i no ken i dai taim God i givim strafe long ol man bilong dispela graun. Bai ol i gat rot long abrusim bagarap, olsem Noa wantaim lain bilong em i bin mekim. Yumi inap bilip na wet long dispela samting, long wanem, Baibel i as bilong dispela bilip; na sampela samting i bin kamap bipo na Baibel i stori long en, em tu i as bilong dispela bilip. (Skelim wantaim Hibru 6:19; 2 Pita 2:4-9.) Truim bilong ol tok profet bilong Baibel i makim olsem liklik taim nau na ol lain bilong dispela graun, em ol manmeri i save mekim pasin i no stret, ol bai bagarap. Ol lain bilong dispela graun i nogut pinis na ol i no inap senisim pasin bilong ol. Ol tok God i bin mekim long taim bilong Noa i makim stret taim bilong yumi long nau. Klostu olgeta man long graun, pasin nogut i pulap long bel bilong ol na tingting bilong ol i nogut tasol.—Stat 6:5.
15 Jehova i bin larim ol man i bosim graun inap planti handet yia na em i no bin pasim wok bilong ol. Tasol nau taim bilong ol i pinis. Klostu nau na Jehova bai pinisim olgeta man nogut i stap long graun, olsem Baibel i tok. (Song 145:20; Sindaun 2:21, 22) Tasol em i no ken pinisim ol stretpela man wantaim. Bipo God i no bin mekim kain samting olsem! (Skelim wantaim Stat 18:22, 23, 26.) Bilong wanem bai em i bagarapim ol man i wok strong long mekim wok bilong em na ol i pret long em? Em i no inap mekim olsem, a? I stret yumi ken ting, ol man i stap gut long Jehova na lotu long em na ol i stap yet taim dispela bikpela hevi tru i kamap, Jehova bai orait long ol na ol i no ken bagarap, olsem Noa wantaim lain bilong em i no bin bagarap taim Jehova i pinisim ol man nogut. (Stat 7:23) Em bai lukautim ol na bai ol i abrusim bagarap long las de na i stap laip.
16 Orait, wanem samting bai kamap bihain long dispela? Nupela taim bai kamap, na Jisas bai mekim wok long ofa bilong em bilong helpim na oraitim ol man. Baibel i tok piksa long wanpela “wara bilong givim laip, na em i lait tumas olsem glas. Dispela wara i kamap long sia king bilong God wantaim Pikinini Sipsip, na i ran i go namel tru long bikpela rot bilong taun. Long arere bilong wara, long hap i kam na long hap i go, diwai bilong givim laip i stap. Dispela diwai i save karim kaikai 12-pela taim long olgeta yia. . . . Na ol lip bilong diwai ol i bilong mekim orait ol manmeri bilong olgeta lain man.” (KTH 22:1, 2) Na yumi ken amamas tru long Jisas bai pinisim dai em sin bilong Adam i bin kamapim! “Em bai i pinisim dai tru . . . na Bikpela bai i pinisim krai bilong ol na mekim drai wara bilong ai bilong olgeta manmeri.” (Aisaia 25:8) Olsem na ol manmeri i abrusim bagarap na i go insait long nupela taim, ol inap i stap oltaim na i no ken i dai!
Samting Yumi Inap Wet Long En
17 Olsem wanem? Yumi inap bilip tru long dispela gutpela samting? Tru tumas, yumi inap bilip long en! Jisas i soim Marta, wanpela taim bai kamap na ol man i stap laip bai ol i no ken i dai. (Jon 11:26) Na long Kamapim Tok Hait sapta 7, Jisas i kamapim klia long Jon olsem i gat planti manmeri tru bai abrusim bagarap long dispela bikpela hevi tru na i stap laip yet. Olsem wanem? Yumi inap bilip tru long dispela tok bilong Jisas na ol tok bilong Baibel long Bikpela Tait long taim bilong Noa? Tru tumas, yumi inap bilip long en! Na Baibel i stori tu long ol taim Jehova i bin skelim ol man long kot, na taim ol i daunim sampela gavman, tasol Jehova i bin lukautim ol wokman bilong em na ol i no bagarap. Olsem na Jehova inap mekim olsem nau long taim bilong las de, a? I no gat wanpela samting dispela Man bilong wokim yumi i no inap mekim!—Skelim wantaim Matyu 19:26.
18 Sapos nau yumi stap gut long mekim wok bilong Jehova, yumi inap i stap oltaim long nupela taim em bai kamapim. Inap planti milion milion manmeri ol bai kirap bek long matmat na i stap long nupela taim. Tasol planti milion manmeri bilong Jehova long nau—em bikpela lain tru i no gat man inap kaunim namba bilong ol—Jehova bai lukautim ol na ol bai abrusim bagarap long dispela bikpela hevi tru na i stap laip yet, na bai ol i no i dai.
Stori Long En
◻ Olsem wanem ol samting i bin kamap long taim bilong Noa i makim olsem sampela bai abrusim bagarap long taim bilong Armagedon?
◻ Taim Jisas i kam bilong givim strafe bilong Jehova long ol man bilong dispela graun, yumi mas mekim wanem bambai yumi ken sanap long ai bilong em?
◻ Olsem wanem yumi ken tok, ol man i winim Armagedon ol i gat rot na “bai ol i no i dai”?
[Askim Bilong Stadi]
1. Husat bai sekanim ol manmeri i kirap bek long matmat na ol i bilong i stap long graun?
2, 3. (a) Olsem wanem taim bilong Noa i wankain olsem taim bilong yumi? (b) Noa wantaim lain bilong em i bin abrusim bagarap long Bikpela Tait na dispela i makim wanem samting?
4. Wanem ol samting i kamap klostu long taim Jerusalem i bagarap long yia 70 na i truim tok profet bilong Jisas?
5. Olsem wanem God i bin sotim taim bilong bikpela hevi i bin painim Jerusalem long yia 70?
6, 7. (a) Wanem bikpela taun tru bilong lotu i mas kisim bagarap? Dispela bai kamap insait long wanem bikpela hevi tru i winim olgeta hevi i bin kamap bipo? (b) Jon i mekim wanem tok profet long dispela bikpela hevi tru bai painim ol man bilong dispela graun?
8. Dispela lain “planti manmeri tru” i stap olsem wanem wantaim ol brata bilong Jisas i stap yet long graun?
9, 10. (a) Yumi mas mekim wanem na bai yumi ken i stap olsem stretpela man long ai bilong Pikinini Bilong Man? (b) Yumi mas mekim wanem na bai yumi “was i stap”?
11. Yumi mas bihainim wanem ol lo bilong Baibel bambai yumi ken abrusim bagarap long Armagedon?
12, 13. (a) Paslain long taim Jisas i kirapim bek Lasarus, em i mekim wanem tok na Marta i no kisim gut? (b) Taim Jisas i tok sampela “bai ol i no i dai,” em i no laik tok wanem?
14, 15. (a) Tok bilong Jisas long sampela “bai ol i no i dai,” truim bilong en bai kamap olsem wanem? (b) Wanem pasin nau i stap long dispela graun? Tasol ol stretpela man i bilip na wetim wanem samting?
16. Wanem ol gutpela samting tru bai kamap long nupela taim? Olsem wanem long ol manmeri i bin abrusim bagarap?
17. Olsem wanem yumi inap bilip tru olsem sampela bai winim Armagedon na “bai ol i no i dai”?
18. Olsem wanem yumi inap bilip tru olsem yumi inap i stap long nupela taim Jehova bai kamapim na stretpela pasin bai stap long en?
[Piksa long pes 15]
Ol Kristen i ranawe na abrusim dispela bagarap i bin painim Jerusalem