Bagarap Bai Painim Ol Juda

Jisas i yusim planti rot bilong kirapim ol manmeri long tingim pasin bilong ol long pas gut wantaim God. Rot i op long em inap mekim olsem taim em i toktok wantaim ol manmeri ausait long haus bilong wanpela Farisi.

Sampela bilong ol i stori long wanpela bikpela hevi i bin kamap. Gavana Bilong Rom, Pontius “Pailat i bin kilim i dai ol man Galili em ol i wok long ofaim ol sakrifais.” (Luk 13:1) Tok bilong ol i makim wanem samting?

I luk olsem Pailat i kilim i dai ol dispela man Galili, long wanem, planti tausen Juda i bin protes long em i yusim mani bilong tempel long wokim wanpela bris we wara i ron long en i go long Jerusalem. Ating Pailat i pasim tok wantaim ol bosman bilong tempel na em i kisim dispela mani. Na ating ol man i kamapim dispela stori i pilim olsem ol dispela man Galili i kisim hevi bikos ol i mekim ol pasin nogut. Tasol Jisas i no wanbel long tingting bilong ol.

Jisas i askim ol: “Yupela i ting ol dispela man bilong Galili i kisim dispela hevi, long wanem, ol i winim ol arapela man Galili long mekim sin?” Jisas i bekim olsem, nogat. Nau rot i op long em i givim tok lukaut long ol Juda, olsem: “Sapos yupela i no tanim bel, yupela tu bai bagarap.” (Luk 13:2, 3) Orait Jisas i stori long narapela hevi i kamap i no longtaim i go pinis, ating dispela hevi i kamap long taim ol i wokim dispela bris.

Em i askim ol: “Olsem wanem long ol dispela 18 man em taua long Siloam i pundaun antap long ol na kilim ol i dai, yupela i ting ol i gat bikpela asua moa winim ol arapela man i stap long Jerusalem?” (Luk 13:4) Ating dispela bikpela lain manmeri i ting ol dispela man i dai bikos ol yet i save mekim sampela pasin nogut. Tasol Jisas i no wanbel gen long tingting bilong ol. Em i save olsem “taim nogut” i save painim yumi na dispela inap kamapim kain hevi. (Saveman 9:11) Olsem na Jisas i tok: “Sapos yupela i no tanim bel, yupela olgeta bai bagarap long wankain pasin.” (Luk 13:5) Bilong wanem Jisas i mekim dispela tok?

Long wanem, klostu nau wok autim tok bilong em bai pinis. So bilong kamapim klia dispela em i tok piksa olsem: “Wanpela man i bin planim wanpela diwai fik long gaden wain bilong en, na em i kam bilong painim prut long en, tasol em i no lukim wanpela. Orait em i tokim wokman bilong gaden wain, ‘Inap 3-pela yia mi kam painim prut long dispela diwai fik, tasol mi no lukim wanpela. Katim! Bilong wanem em i mas pinisim nating gris bilong graun?’ Na wokman i bekim tok olsem, ‘Bos, larim i stap inap long dispela yia tu, na bai mi digim graun long as bilong en na putim pekpek bilong bulmakau. Na sapos em i karim kaikai, em gutpela. Tasol sapos nogat, orait yu ken katim.’”—Luk 13:6-9.

Winim 3-pela yia nau, Jisas i wok strong long kirapim ol Juda long bilip long em. Na sampela tasol i kamap disaipel bilong em, ol i olsem gutpela kaikai i kamap long hatwok bilong em. Nau em namba 4 yia bilong Jisas long mekim wok autim tok, olsem na em i givim bel tru. Lain Juda i olsem diwai fik long tok piksa bilong Jisas. Em i wok long digim graun na putim pekpek bilong bulmakau long as bilong diwai fik. Dispela i makim olsem em i autim tok na skulim ol man long Judia na Perea. Wanem samting i kamap long dispela? Wan wan man bilong lain Juda i harim tok. Tasol planti bilong ol i no laik tanim bel, olsem na bagarap i mas painim ol.

Planti i no laik harim tok, na dispela i kamap ples klia gen bihain liklik long wanpela de Sabat. Jisas i wok long skulim ol man long sinagog. Na em i lukim wanpela meri em spirit nogut i wok long givim pen long em, na inap 18 yia baksait bilong em i krungut. Jisas i sori tru long em na i tokim em: “Meri, sik bilong yu i tekewe.” (Luk 13:12) Jisas i putim han long em na wantu em i sanap stret na i kirap long givim glori long God.

Hetman bilong sinagog i belhat, na em i tok: “I gat 6-pela de we i stret long mekim wok. Olsem na bilong kamap orait yupela i mas kam long ol dispela de na no ken kam long de Sabat.” (Luk 13:14) Dispela hetman i save olsem Jisas i gat strong long oraitim ol man, tasol em i kros long ol manmeri, long wanem, ol i kam long Jisas i ken oraitim ol long de Sabat! Tok Jisas i bekim i klia tru, em i tok: “Yupela man bilong tupela maus, long Sabat yupela olgeta i save go long haus bilong ol animal na lusim bulmakau o donki bilong yupela na kisim ol i go bilong dring wara. Olsem tasol dispela meri husat i pikinini bilong Abraham, na Satan i bin kalabusim em inap 18 yia, i stret wanpela i mekim em i kamap fri long dispela kalabus long de Sabat.”—Luk 13:15, 16.

Ol birua i sem, tasol bikpela lain manmeri i amamas long lukim ol gutpela wok Jisas i mekim. Orait hia long Judia, Jisas i kamapim gen tupela tok piksa i tok profet long Kingdom. Em i bin kamapim ol dispela tok piksa long taim em i sindaun long wanpela bot long raunwara Galili.—Matyu 13:31-33; Luk 13:18-21.