“Kingdom Bilong Yu i Mas i Kam”

Jehova i bin tok promis: ‘Bai no gat krai, pen, sik, o dai. Mi bai mekim drai aiwara i stap long ai bilong ol. Olgeta samting nogut bilong bipo ol bai pinis olgeta.’

Jehova i putim Adam na Iv long gaden Iden na bai ol i stap bel isi na amamas. Ol bai lotuim Papa bilong ol long heven, kamapim ol pikinini na pulapim graun. Adam na Iv i sakim tok bilong Jehova, tasol samting em i tingting pinis long mekim i no inap senis. Long dispela buk, yumi lukim olsem olgeta samting God i tok promis long en i save kamap tru. Kingdom bilong em bai bringim ol gutpela blesing long graun, olsem em i bin tok promis long Abraham.

Klostu nau Satan, ol dimon bilong em, na olgeta man nogut bai pinis. Olgeta man i stap laip bai lotuim Jehova. Bai yumi no inap sik o dai. Long olgeta moning, bai yumi kirap wantaim bikpela strong na amamas long stap laip. Graun bai kamap Paradais. Olgeta man bai gat gutpela kaikai na ol haus bilong ol i seif. Ol man bai gat gutpela pasin, ol i no inap mekim nogut o pait long narapela. Ol wel animal i no inap pretim yumi, na yumi no inap pret long ol.

Bikpela amamas tru bai kamap taim Jehova i stat long kirapim bek ol manmeri i dai pinis. Yumi bai welkamim ol man bilong bipo, olsem Abel, Noa, Abraham, Sara, Moses, Rut, Esta, na Devit. Ol bai wok wantaim yumi long mekim dispela planet Graun i kamap Paradais. Long olgeta taim, bai i gat planti gutpela wok bilong mekim.

Jehova i laik bai yu stap long dispela taim. Yu bai kisim save long Jehova long ol rot we yu no bin tingim. So yumi mas wok long i go klostu moa long Jehova long olgeta de, long nau na inap oltaim oltaim!