Tok i Go Pas

Ol Skripsa Bilong Kristen Laip bai mekim na em i isi long yu painim ol ves na ol stori bilong Baibel bilong helpim yu long karim ol hevi bilong olgeta wan wan de. Em bai helpim yu tu long painim ol ves bilong Baibel we yu ken yusim bilong strongim ol narapela na helpim ol long mekim ol gutpela disisen i onarim Jehova. Painim topik yu laik save long en, na olgeta wan wan topik i gat ol askim na ol sotpela stori bilong Baibel bilong helpim yu. (Lukim blok “Hau Long Yusim Dispela Buk.”) Yu bai painim ol skripsa bilong stretim yu, stiaim yu, na mekim gut bel bilong yu long Tok Bilong God. Yu bai painim tu ol naispela tok bilong serim wantaim ol narapela—em ol ves bilong Baibel bilong mekim ol i belgut, bilong helpim ol long karim hevi bilong ol, na ol dispela tok i ken helpim na strongim ol.

Hau Long Yusim Dispela Buk

Bilong painim wanpela topik, yu ken sekim ol wan wan seksen long ol leta alfabet o yu ken sekim ol seksen. I gat 7-pela seksen long buk Ol Skripsa Bilong Kristen Laip: Ol Hatwok, Pasin Yumi Mekim, Kongrigesen, Laip Bilong Yumi, Famili, Pas Gut Wantaim Jehova, na Ol Pasin Bilong Yumi. Planti topik bai kam aninit long wanpela bilong ol dispela seksen. Yu bai painim ol seksen na ol topik bilong ol long ol dispela pes. Tasol sapos yu no save long wanem seksen yu bai painim topik em yu laikim, orait lukim lista i gat tok Olgeta Topik na bai yu ken painim dispela topik. Aninit long olgeta wan wan topik, yu bai lukim sampela het tok i stap long strongpela blakpela rait. Sampela em ol askim. Taim yu ritim ol skripsa i stap aninit long ol dispela het tok, wokim tingting na tingim tingim long bel hau ol dispela tok i sapotim het tok o bekim askim. Sampela topik em ol i brukim i go long ol liklik seksen bilong helpim yu long painim hariap infomesen yu laikim. Sampela taim ol i putim sampela moa ves na i gat dispela tok, “Lukim tu” long en. Ol dispela ves i kamapim sampela moa tingting long dispela topik. Planti taim yu bai lukim tu dispela hap “Ol eksampel long Baibel.” Bihain long en i gat ol sotpela sentens i eksplenim bikpela poin bilong dispela ves. Taim yu ritim ol dispela skripsa, yusim ol sentens i stap bilong stiaim tingting bilong yu.

Dispela buk i no kolim lista bilong olgeta skripsa bilong wanpela topik. Tasol em naispela tul bilong helpim yu long mekim wok painimaut. (Pr 2:1-6) Bilong kisim sampela save moa, yusim majinal referens na ol stadi nout long New World Translation of the Holy Scriptures. Yusim Research Guide for Jehovah’s Witnesses o Watch Tower Publications Index bilong stadi gut moa long mining bilong wanpela skripsa o long hau yu ken bihainim. Skelim ol pablikesen bilong yumi bambai yu ken kliagut long ol nupela save bilong ol tok i tru bilong Baibel em yumi kisim save long en i no longtaim i go pinis.

Buk Ol Skripsa Bilong Kristen Laip i ken helpim yu long kisim save, savetingting, na kliagut long ol tok bilong Ol Skripsa Holi. Taim yu yusim dispela buk, yu bai bilip tru olsem “tok bilong God i gat laip na i wok strong i stap.”—Hi 4:12.