Insait Bilong Ol Tok i Kam Long Olgeta Hap
Pasin Pait Insait long Famili
Wanpela lain long Amerika ol i gat wok long helpim ol pikinini (National Center on Child Abuse and Neglect) ol i tok, ol manmeri i save mekim nogut long planti pikinini, inap wan milion samting long olgeta yia, o ol i no lukautim ol gut. Wanpela nius (The New York Times) bilong Amerika i stori long man i paitim meri na i tok, 2-6 milion man i save paitim meri bilong ol, na planti manmeri i save mekim nogut long lapun papamama bilong ol. Kros pait i kamap insait long famili i as bilong planti polis i dai taim ol i go stretim o ol i kisim bagarap. Planti man i harim tok long dispela samting, tasol ol i no pilim as bilong en. Tasol em i samting nogut tru, long wanem i makim olsem famili i laik bagarap. Na dispela samting i truim tok profet bilong Baibel, olsem: “Bai ol man i laikim ol yet tasol, . . . sakim tok bilong papamama. . . . Bai ol i no save pren long ol wanblut bilong ol yet. Bai ol i no lusim kros. . . . Bai ol i no save bosim laik bilong bodi bilong ol. Bai ol i bagarapim ol man nabaut.” Pasin pait i kamap insait long famili wantaim ol narapela hevi i kamap nau long graun i soim yumi, yumi stap long “las taim.” Tru tumas, yumi stap long taim bilong “planti hevi nogut tru.”—2 Timoti 3:1-3.
Amagedon—Tru o Giaman?
Sampela man bilong edukesen i bung long Yunivesiti bilong Sauten Kalifonia long dispela taim. Ol i laik sutim tok long bilip bilong planti man long nau olsem Armagedon i klostu. Amagedon i olsem dispela pait Baibel i stori long en, em bai kamap namel long God na “ol king bilong olgeta man bilong graun.” (Revelesen 16:14, 16) Wanpela lain ol i save skelim pasin bilong ol man ol i kamapim dispela bung. Wanpela man i gat save long ol tok bilong Nupela Testamen, em James M. Robinson, em i insait long dispela lain.
Wanpela nius bilong Amerika (Los Angeles Times) i stori long dispela samting. Tasol Robinson i no helpim tok bilong Baibel i toksave long dispela pait Armagedon. Nogat. Robinson i tok, ol man bilong raitim ol tok bilong Nupela Testamen, ol i bin skruim ‘sampela tok nating’ long ol tok bilong Krais bilong mekim pretim ol man. Na narapela saveman i mekim tok long dispela bung, em Randel Helms bilong Arisona Stet Yunivesiti, em i tok, ol tok bilong Danyel i go inap Revelesen long Baibel i tok giaman.
Ol Kristen i mas ting olsem wanem long kain tok olsem ol man i sutim long Tok bilong God, em Baibel? Aposel Pol i givim tok long Timoti, olsem: “Givim baksait long tok nating i no bihainim pasin bilong God, na long tok bilong dispela pasin ol i giaman na kolim ‘pasin bilong save”’ Sampela man i bin bihainim “save bilong ol saveman bilong dispela graun na “ol i bin popaia na lusim tok tru.” (1 Timoti 6:20, 21) Pita tu i raitim kain tok olsem, em i tok: “Long taim bilong las de, ol man bilong tok bilas bai ol i kamap . . . Bai ol i tok bilas olsem, ‘Em i bin tok bai em i kam bek gen, a? Orait em i stap we?”’ Tasol dispela de bilong Jehova na pait bilong Amagedon bai i kamap “olsem stilman save kam.” Olsem na Pita i tok ol Kristen i mas was gut. Ol i mas tingim gut “De bilong God i laik kamap.—2 Pita 3:3, 4, 10, 12.
‘Ol Misin i No Strong Moa long Lotu’
Wanpela nius bilong London (The Times) i kamapim tok bilong wanpela bikpela man bilong lotu, em Edward Norman bilong Pitahaus, Kembris. Em i tok, ‘Planti man long nau i pilim olsem ol misin i no strong moa long lotu.’ Em i tok, long nau ol misin i mekim ol narapela wok, olsem wok bilong stretim sampela hevi i painim ol man na ol i no strong moa long mekim wok bilong God na lainim ol man long God. Ol misin long Amerika i mekim bikpela wok bilong toktok wantaim gavman na kirapim gavman long senisim sampela samting ol i pilim i no stret. Wanpela niusman, em David E. Anderson, i tok ol misin i wok long subim ol bisnis tu long bihainim tingting bilong ol. Planti misin ol i gat sea long sampela bisnis, olsem na ol i gat strong bilong subim ol dispela bisnis long bihainim tingting bilong ol.
Ating ol dispela misin i laik helpim ol man na ol i mekim ol dispela wok, tasol Krais Jisas i wok strong long mekim wanem wok? Em i wok strong long autim tok na tokim ol man long kingdom bilong God. (Luk 8:1) Jisas i laik bai ol disaipel bilong em ol i mekim wankain wok olsem em i bin mekim, long wanem em i save, kingdom bilong God tasol inap stretim ol hevi bilong ol man.—Aisaia 32:1; Aposel 1:8.