Ol i Givim Bel Long Wokim Nupela Haus Brens Long Nowe na Jehova i Blesim Ol

DEVIT i tok: “Ol pipel bilong yu i go wantaim yu na helpim yu.” Na tru tumas, taim ol i laik wokim nupela haus brens long Nowe, long Itre Enebak, ol brata i go wantaim ol na helpim ol. Ol i amamas long helpim dispela wok. Long Me 19, 1984 ol i dediketim dispela nupela haus brens bilong ol Witnes Bilong Jehova long Nowe. Ol i dediketim o givim long God Jehova bilong mekim wok bilong Em.—Sam 110:3.

Ol Witnes Bilong Jehova yet i wokim ol dispela haus. Ol i givim bel long wokim na ol i no kisim pe. Ol narapela Witnes long Nowe na long ol narapela hap tu i tingim bikpela wok ol dispela brata i mekim. Sampela nius i stori long dispela wok. Ol i putim het-tok olsem: “Ol i Mekim Bikpela Wok na Ol i No Kisim Pe—Kain Wok Olsem i No Bin Kamap Bipo long Nowe!” “Bikpela Wok Volantia i Kamap long Itre Enebak.” “Yumi Kirap Nogut long Dispela Wok Volantia.”

Tru tumas, ol i mekim bikpela wok! Insait long tripela yia tasol ol i sanapim ol gutpela bikpela haus (inap olsem 4,800 skwea mita). I gat ol haus ofis bilong ol brata i lukautim wok na tanim tok, na haus bilong wokim ol buk na salim ol buk, na Haus Kingdom, na haus slip inap long 54 manmeri. Olgeta man i bin lukim ol dispela haus ol i tok, ol dispela haus i gutpela samting tru bilong helpim wok bilong Jehova long Nowe.

Bilong Wanem Ol i Mas Wokim Nupela Haus?

Klostu long yia 1900 ol man long Nowe i harim gutpela tok bilong Kingdom long namba wan taim. Kwiktaim sampela man i bilip na ol i kirap autim dispela tok long ol narapela man. Long dispela taim i hatwok long ol i raun na autim tok. Ol i mas wokabaut longwe na i gat ol bikpela maunten i pasim rot na bikpela bus na ol pasis i daun tumas. Tasol ol i autim dispela gutpela tok na sampela long ples Aktik tu ol i bilip. Long yia 1904 ol i kamapim namba wan ofis bilong lukautim wok bilong autim tok. Ol i putim long haus bilong wanpela brata long Oslo. Wok i go bikpela na long 1925 ol i mas painim nupela ofis na ples bilong salim ol buk samting i go long ol man. Ol brata i givim bel long helpim dispela wok na ol i baim wanpela haus namel long Oslo em i gat tripela plua. Inap 58 yia dispela haus i stap olsem brens-ofis na haus Betel bilong Nowe. Tasol bihain dispela haus tu i liklik tumas. Bilong wanem em i liklik tumas?

Long wanem lain bilong autim tok long Nowe i go bikpela. Long 1925 i gat 165 samting ol i autim tok, tasol long 1983 i gat 7,000 samting ol i autim tok. Long 1925 i gat 20 kongrigesen tasol; long 1983 i gat klostu 200. Na ol brata i wok long tanim tok bilong planti buk bilong Sosaiti, olsem na i mas i gat sampela wokman moa long Betel. Mipela i sot long ofis na rum slip, tasol i no gat rot bilong skruim dispela olpela haus brens i go bikpela. Olsem na ol i mas painim wanpela hap graun na wokim nupela haus brens olsem ol brata i mekim long planti kantri long nau.

Ating yu ting i no hatwok long painim wanpela hap graun long Nowe bilong wokim haus, long wanem i gat bikpela hap graun na ol manmeri i no planti (34 manmeri long olgeta wanpela wanpela skwea mail). Tru, tasol i gat ol bikpela bikpela maunten i stap na bikpela bus, olsem na i hatwok long painim gutpela hap graun bilong wokim haus. Ol brata i kirap long painim wanpela hap graun long saut, long hap i no gat ol bikpela maunten. Bikpela hap lain bilong Nowe ol i stap long hap bilong saut, olsem na i gat ol gutpela rot na planti stua samting long dispela hap. Planti manmeri i go sindaun long dispela hap, olsem na i hatwok long painim wanpela hap graun i stap nating. Inap wanpela yia na 6-pela mun ol brata i painim painim, na bihain ol i painim pinis wanpela gutpela hap graun i stap klostu liklik long Oslo.

Ol i Givim Bel Tru!

Taim ol Witnes long Nowe i harim tok olsem Sosaiti i laik wokim nupela haus brens, ol i givim bel tru long helpim dispela wok. Insait long tripela wik tasol ol i givim bikpela mani inap long baim dispela hap graun, na bihain ol i wok yet long givim mani olsem kontribusen o dinau bilong helpim dispela wok. Ol brata i no tingting planti long ol bai kisim we mani bilong wokim dispela nupela haus. Sampela pikinini tu ol i givim mani. Tripela pikinini meri i salim mani i kam wantaim pas. Ol i tok ol i harim tok long kibung olsem ol brata i laik wokim nupela brens-ofis, olsem na taim ol i go bek long haus ol i tingting long wokim sampela samting na putim tebol ausait long haus bilong salim ol dispela samting. Ol man i baim na tripela hia i kisim K13 na ol i salim long Sosaiti. Nem bilong tripela em Eva-Lill (11 krismas) na Jannicke (11 krismas) na Therese (8 krismas).

Ol brata sista i givim bel tru long helpim dispela wok na ol i mekim i go inap long taim dispela wok i pinis. Ol i sainim kontrak na baim dispela hap graun na bihain ol i redim graun bilong sanapim haus long en. Spirit bilong Jehova i kirapim ol brata long helpim dispela wok na dispela samting i strongim bilip bilong mipela. Wanpela brata i papa bilong wanpela hap graun i gat bikpela bus long en. Em i tok mipela i ken i go katim ol diwai na wokim ol plang. Sampela brata i save long dispela wok ol i kam longwe inap planti Sarere na Sande na katim 4,000 diwai. Na sampela brata i stretim wanpela olpela somil na ol i sanapim long dispela hap graun ol i bin baim na wokim ol plang. Dispela samting i helpim gut ol brata na ol i no tromoi bikpela mani bilong baim plang.

Sampela Witnes i givim nating sampela masin na tul na sampela samting bilong wokim haus, na dispela samting tu i helpim ol brata na ol i no tromoi bikpela mani tumas. Wanpela brata i gat wok long putim ol lift o elevato long ol haus i gat planti plua i go antap. Em i save long wanpela man bilong bisnis i laik rausim elevato long wanpela bikpela haus na salim long ol man. Brata i tokim dispela man em i laik kisim dispela elevato na em i tokim man long nupela haus brens na long wok volantia bilong ol brata. Man bilong bisnis i tok, sapos ol brata i rausim dispela elevato long dispela haus insait long wanpela wik tasol na ol i givim wanpela bikpela kek long em, ol i ken kisim nating dispela elevato. Dispela elevato i stap nau long nupela haus brens. Sampela brata ol i pulimapim patete na kumu na pis na mit na bret long ka na karim i kam givim nating long ol brata i wokim dispela nupela haus. Tru tumas, spirit bilong Jehova i kirapim ol wokboi bilong em na ol i givim bel tru long helpim dispela wok.

Kisim Wokman We?

Taim ol brata i harim pinis tok olsem Sosaiti i laik wokim nupela haus brens, inap 2,000 ol i tok bai ol i kam mekim wok. Sampela ol i kisim lip na ol i wok, sampela ol i lusim gutpela wok mani bilong ol na ol i kam mekim wok. Ol i mas slip long ol liklik haus nogut long taim bilong bikpela kol, tasol ol i no tingim. Bilong wanem ol i kam? Ol dispela wokman i tok: “Mipela i laikim tumas Jehova na wok bilong autim dispela gutpela tok.” Olgeta i gat dispela gutpela tingting i save kirapim ol brata long Nowe na long ol narapela kantri tu long mekim wok bilong Jehova. Ating yu bai amamas long harim stori bilong ol wok mipela bin mekim.

Brens-ofis i salim pas i go bilong singautim ol brata i kam wok. Ol brata sista i gat save long mekim kain kain wok ol i tok ol i laik i kam. Sampela lapun ol i gat save long wok kamda na ol i no wok moa, ol i kam wok. Sampela brata bilong Denmak na Swiden, ol tu i laik kam mekim wok. Ol i helpim gut mipela. Maski ren o bikpela kol, ol brata i givim bel long mekim wok na mipela pilim tru dispela samting.

Sampela yangpela, taim ol i pinis wok long apinun ol i go helpim ol brata long konstraksen long mekim wanpela wok ol i laik mekim hariap. Olsem na ol i putim kwik rup bilong ol haus paslain long taim bilong kol long Nowe. Taim ol i putim rup pinis, ol brata inap wok insait na ren na kol i no pasim wok bilong ol. Ol i mekim wok hariap, olsem na ol brata sista bilong Betel inap i go slip long ol nupela rum slip bilong ol 6-pela mun paslain long taim ol i bin makim. Em gutpela, long wanem man i laik baim olpela haus brens em i tok, sapos ol i lusim kwik dispela haus, bai em i givim gutpela pe bilong baim haus.

Olsem na ol brata sista bilong Betel i go long nupela haus slip na ples wok bilong ol long Oktoba 21, 1983. Em tripela yia bihain long taim ol i painim pinis dispela hap graun.

Ol i Dediketim Ol Haus

Ol i makim Me 19, 1984 bilong dediketim dispela nupela haus brens. Ol brata i wokim haus na ol brata sista bilong Betel ol i wok strong bambai olgeta samting i redi pinis long Me. Wanpela wik paslain long taim bilong dediketim, ol i mekim bikpela wok tru. Ol brata i stretim graun na wokim rot na ol i klinim wanpela paip ain i save sutim wara i kam antap. Na wanpela de paslain long taim bilong dediketim haus, ol i planim planti purpur na liklik diwai. Ol i wokim pinis na banis bilong haus i kamap olsem wanpela gutpela gaden bilas na ol man i kam long taim bilong dediketim haus ol i amamas long lukim. Tru tumas, lain bilong Jehova ol i save givim bel long helpim wok bilong Em.

Sampela brata ol i bin wok longtaim (winim 7-pela mun) long wokim dispela nupela haus, na sampela brata ol i bin autim tok kirap long 1920 samting, na olgeta wasman sekit na wasman distrik na kongrigesen i stap long dispela hap, ol i singautim ol dispela brata sista i kam long taim bilong dediketim haus.

Ol i singautim tu sampela brata bilong brens-ofis long Austria na Denmak na Finlan na Jemani na Netelan na Swiden. Olgeta ol inap stori long wok ol yet i mekim bilong sanapim nupela brens-ofis long hap bilong ol. Wok bilong Jehova i go bikpela long olgeta hap, olsem na i gat nupela brens-ofis long Nowe tu.

Wanpela brata i kam long wanpela longwe ples, em i kam long Amerika. Em Brata Milton G. Henschel bilong Lain Bilong Bosim Ol Witnes. Em wantaim meri bilong em tupela i kam wanpela wik paslain na ol i lukim bikpela wok ol brata sista i mekim bilong redim ol haus na banis bilong haus. Taim Brata Henschel i mekim tok bilong dediketim haus, em i stori long gutpela pasin bilong ol brata sista long Nowe, em ol i bin givim bel long helpim dispela wok. Em i tok: “Yupela i bin givim olgeta samting bilong wokim dispela haus, na yupela i bin wok gut wantaim bilong sanapim ol dispela haus na em i gutpela.” Em i tok, nau ol brata sista bilong Nowe ol i gat wok. Em i tok: “Sapos yupela mekim wok long ol dispela haus bilong mekim laik bilong God, bai em i blesim wok long Nowe. Olsem na ol brata sista long Nowe i bin givim bel long helpim wok bilong sanapim ol dispela haus.”

Yes, Jehova i save blesim ol man i givim bel long bihainim laik bilong em. Ol Witnes Bilong Jehova long Nowe ol i tingting strong long mekim ol wok bilong ol long ol dispela nupela haus na wok bilong autim gutpela tok bilong Kingdom bilong God. Ol i tok: “Bikpela, mi laik tumas long givim ofa long yu. Yu gutpela tumas, olsem na mi tenkyu tru long yu.”—Sam 54:6; Matyu 24:14.

[Piksa long pes 30]

Long somil ol i wokim plang long ol diwai brata i bin givim nating long ol

[Piksa long pes 31]

Taim yu go insait long nupela brens-ofis, dispela em i namba wan rum yu lukim