Ol Senis Mi Bin Mekim Bilong Jehova
Em stori bilong Smith Bell
“ROT bilong ol stretpela man i lait olsem san i kamap long moningtaim, na lait i wok long kamap strong moa, inap long belo.”—Provep 4:18.
Dispela skripsa i makim senis i mas kamap na ol samting i mas wok i go. Mi stap laip inap 100 yia pinis na taim mi tingim ol samting i bin painim mi, mi save oltaim Jehova i save givim lait na mekim rot bilong tok i tru i kamap moa klia. Olsem na ol man i laik mekim wok bilong em ol i mas redi long senisim sampela tingting na pasin bilong ol na wok i go.
Ol i Tambuim Wanpela Buk Bilong Baibel
Namba wan bikpela senis i kamap long laip bilong mi i kamap long taim bilong Namba Wan Pait Bilong Olgeta Hap. Mi tingim yet het-tok ol i putim long nius long hap bilong Saskasewan, long Kanada, long 1918: ‘OL I TAMBUIM BUK BILONG C. T. RUSSELL.’ Mi kirap nogut long dispela tok, long wanem papa bilong mi i save kaunim ol tok bilong C. T. Russell long mipela taim mipela i stap pikinini yet long Wait Wara, long Manitoba. Papa i wanbel long ol tok bilong Mista Russell, em Russell i save kamapim ol tok bilong Baibel na soim ol man i no gat wanpela ples paia olsem hel o bikpaia.
Nau olgeta man i kirap long toktok long dispela buk bilong Russell na mi laik save: Bilong wanem ol i tambuim wanpela buk bilong Baibel? Tasol nius i tok, i gat ol tok long dispela buk bilong kirapim ol man long daunim gavman na bilong pasim ol long insait long pait. Mi laik tru long kisim dispela buk. Tasol mi painim painim, nogat. Ol i givim narapela buk bilong Russell long mi, nem bilong en long tok Inglis: The Divine Plan of the Ages. Mi kaunim dispela buk, kaunim pinis na bel bilong mi i amamas tru. Mi painim pinis tok i tru!
Paslain long dispela taim mi no save tingim tumas lotu, tasol mi bin kaunim olgeta tok bilong Baibel wanpela taim. Taim mi lusim Manitoba i go i stap long hap bilong Saskasewan, mama i putim wanpela Baibel wantaim ol samting bilong mi. Mi kisim hap graun bilong mi long Saskasewan na mi laik kamap fama. Long dispela taim mi gat 22 krismas. Long 1905 long taim bilong kol mi no gat planti buk bilong kaunim, olsem na mi kirap kaunim gut Baibel na mi tingim gut ol tok i tru i stap long en. Tingting bilong mi i kirap pinis na mi save Seten i mas kalabus pastaim olsem Revelesen 20:1-3 i tok na bihain bai gutpela taim inap kamap long graun.
Mi Save Mi Mas Autim Tok
Ol yia i kamap i go pinis kwiktaim-mi marit na kamapim ol pikinini. Tasol mi kaunim pinis ol tok bilong buk Divine Plan na mi save mi no ken sindaun nating na wetim ol dispela gutpela samting i kamap. Mi save mi mas tokim ol narapela man long ol gutpela samting Jehova i tok promis long en.
Mi tingting long autim tok long ol man i stap klostu long mi pastaim. Mi ting ol bai amamas long harim dispela gutpela tok. Mi laik kirapim Baibel-stadi long haus bilong mi na mi singautim ol fama klostu i kam bung wantaim mi na lainim tok bilong Baibel. Tasol ol i no amamas—ol i ting mi go longlong! Ol i tok, gutpela sapos mi kamap wasman bilong ol Sande-Skul long dispela hap. Ol i tok, long dispela rot bai mi inap helpim gut ol man. Mi tokim ol mi bai go long lotu long Sande long wik antap na bihain bai mi tingim wanem samting mi mas mekim.
Long Sande mi kamap long haus lotu na ol i tokim mi, mipela bai toktok long “Husat i Laikim Moa Lotu—Ol Man o Ol Meri?” Mi no wet long harim tok bilong pasto. Mi lusim haus lotu i go na mi no i go bek moa. Mi no laik harim ol kain tok nating olsem i no gat as bilong en! Mi save pinis long ol tok i tru na mi no kalabus moa long ol bilip giaman—mi no pret moa long kisim pen long bikpaia—mi save ol man i dai pinis i olsem ol i slip na bihain bai ol i kirap bek, na mi save mi inap kisim laip i stap oltaim. Tok bilong Baibel long kirap bek i mekim isi bel bilong mi wantaim meri bilong mi, long wanem tupela liklik pikinini meri bilong mipela i dai pinis. Taim mipela i save God i no bin kisim ol bilong kamap ensel long heven, mipela i no bel nogut moa.—Eklisiastis 9:5, 10; Aisaia 25:8; Jon 5:29; Revelesen 21:3-5.
Long dispela taim mi kirap long bung wantaim ol narapela Witnes long hap bilong Wilki, em biktaun i stap klostu, na ol i kamapim wanpela liklik kongrigesen long dispela hap. Mipela inap olsem 12-pela samting. Kwiktaim ol i makim mi bilong lukautim Stadi Wastaua long Sande. Mi no baptais yet na ol i givim dispela wok long mi!
Mi Senisim Sampela Tingting Bilong Mi
Long 1922 mi kisim baptais. Na liklik taim bihain meri bilong mi i kisim baptais. Olsem na nau mi mas senisim sampela samting mi save mekim. Mi lusim wok long kaunsil. Mi save mi no ken raun tokim ol man Kingdom bilong God bai pinisim ol pasin i no stret na mi helpim wok ol man i mekim tu wantaim. Baibel i tok, wok bilong ol man bai lus nating tasol.—Revelesen 19:11-18.
Mipela i no gat ka samting long dispela taim, olsem na mipela i save makim hap bilong wanpela skul na mipela i go long haus bilong olgeta man long dispela hap na singautim ol i kam harim wanpela tok bilong Baibel long Sande long haus skul. Mi tingim wanpela Sande mi raun wantaim wanpela brata. Mitupela i go long ol fam na singautim ol man i kam long haus skul long apinun na mipela i soim 6-pela buk bilong Baibel long ol, ol i ken kisim long $3. Mipela paitim dua long wanpela haus na wanpela meri i opim dua. Em i tok em i no inap kaunim olgeta dispela buk na brata hia i bekim tok olsem: “Meri, yu mas kaunim ol dispela buk na lainim olgeta tok i stap long en sapos yu laik kisim laip!” Nau yumi lain long mekim gutpela tok isi long ol man, olsem ol tok i no ken skirapim bel bilong man. Maski bipo mipela i no mekim gutpela tok isi, tasol ol man inap save mipela i bilip tru na mipela i mekim dispela wok.
Inap sampela yia bihain, tingting bilong kongrigesen i no i stap isi. Mipela i no save Jehova i laik givim wanem wok long mipela. Olsem na long 1935 mipela i amamas taim lait bilong tok i tru i kamap strong na mipela i save long dispela ‘bikpela lain’ em Revelesen 7:9-17 i stori long ol. Ol manmeri bilong dispela lain ol i no olsem wanpela namba tu lain bilong heven na ol i no ken kisim bret na wain long Memorial bilong tingim i dai bilong Krais. Nogat. Ol i bilong i stap oltaim long graun. Mipela i amsmas mipela inap bilip na wet long kisim laip i stap oltaim long paradais long graun olsem ol man “i no save hambak na bikhet,” em Jisas i tok, “bai God i givim olgeta graun long ol” dispela “arapela sipsip” bilong em.—Matyu 5:5; Jon 10:16; Aisaia 65:17-25.
Ol i Tambuim Gen Ol Buk Bilong Baibel
Long 1940, long taim bilong Namba Tu Pait Bilong Olgeta Hap, ol man bilong lotu i birua long wok bilong yumi. Ol i wok long rot bilong ol lain politik na gavman i tambuim wok bilong yumi. Wantu dispela samting i kamap, mipela i no save pastaim. Taim ol i putim dispela tambu, mi wantaim meri pikinini mipela i stap long Manitoba. Taim mipela i go bek long fam na i laik givim kaikai long ol hos, mipela kirap nogut, long wanem kongrigesen i bin kisim kwik ol buk samting long ples miting bilong kongrigesen na haitim insait long kaikai bilong ol hos long fam bilong mipela! Ol i mekim olsem bambai ol lain bilong gavman i no ken kisim ol dispela buk. Ol dispela lain bilong gavman i go lokim dispela haus miting bilong mipela na ol i kisim mani bilong kongrigesen long beng. Olsem na long pasin hait mipela i stretim rot bilong mekim ol miting na long olgeta wik mipela i save mekim miting long narapela narapela haus.
Long 1941 mi wantaim meri bilong mi na pikinini meri bilong mipela, mipela i go long hap bilong Britis Kolombia. Mipela lusim pikinini man i stap lukautim fam. Mipela i tingting long i stap klostu long solwara long taim bilong kol. Gavman i tambuim yet wok, olsem na mipela i haitim planti buk long hapka bilong mipela na mipela i go. Taim mipela i kamap pinis long taun Wait Rok mi kisim wok olsem kamda. No gat kongrigesen, tasol mi laik save ol wanlotu bilong mi i stap we. Long pasin hait mi wok long kisim dispela save. Mi save givim askim long ol man, olsem: ‘Yu ting olsem wanem long tambu ol i putim long ol Witnes Bilong Jehova?” Na ating man bai bekim tok olsem: “Mi yet no save tumas long dispela samting, ating man i stap long hap hia em i wanbel wantaim ol.” Em nau, mi go lukim ol i makim na kwiktaim mipela 6-pela o 7-pela samting i kirap long bung na mekim Stadi Wastaua long olgeta wik.
Dispela taun Wait Rok i stap klostu long boda bilong Amerika na gavman bilong Amerika i no bin putim tambu long wok bilong ol Witnes. Olsem na mipela i save wokabaut brukim boda i go insait long hap bilong Amerika na kisim nupela Wastaua long hap na wokabaut i kam bek. Mipela save wokabaut long lek i go, mipela i no i go long ka. Sapos mipela i go long ka, bai polis bilong boda i wok long painim painim ol samting insait long ka. Olsem na mipela i save wokabaut long lek i go na long dispela rot oltaim mipela i gat kaikai bilong spirit. Gavman i tambuim wok bilong mipela na ol buk na nius bilong mipela, tasol ol man i as tru bilong dispela tambu, em ol bikman bilong lotu, ol i no inap tambuim Baibel. Olsem na mipela i save kisim Baibel tasol na i go long haus bilong ol man.
Wanpela taim mipela i tingting long autim gut tok long olgeta manmeri long dispela liklik taun Wait Rok—i gat 1,500 samting manmeri ol i stap long en. Olsem na mipela i kisim olgeta buklet ol brata i bin haitim insait long graun na ol buklet mi bin kisim i kam long Saskasewan na mipela pasim tripela tripela wantaim, na wanpela apinun, long biknait, mipela i go putim klostu long dua bilong olgeta haus long Wait Rok.
Long moningtaim mi go long wok na olgeta man i toktok long dispela wok mipela bin mekim long nait. Olgeta i ting olsem i gat planti Witnes tru i stap long dispela hap, long wanem olgeta i bin kisim sampela buklet maski haus bilong ol i stap we long taun.
Pasin Hambak na Tingting Nogut Bilong Ol Lotu
Long 1943 gavman i pinisim dispela tambu na mipela i kamapim wanpela kongrigesen long Wait Rok. Mi wantaim meri pikinini i tingting long i stap long dispela hap. Mipela baim wanpela haus, olsem rentim, bilong mekim ol miting, tasol ol birua i kirapim bikpela pairap ausait na mipela i no inap harim tok. Mipela i harim tasol dram i pairap na ol sospen ain ol i paitim wantaim na ol hon bilong ka. Na ol i paitim tu banis bilong haus. Bikpela pairap tru! Mipela save ol i no laikim mipela.
Olsem na mipela i lusim dispela haus na mipela rentim wanpela haus i stap ausait liklik long taun na i no gat pairap. Kongrigesen i go bikpela liklik na i gat 50 pablisa. Liklik taim bihain mipela kirap wokim wanpela nupela Haus Kingdom insait long taun, tasol 7-pela yia bihain dispela haus i liklik tumas. Mipela baim dispela haus i go long ol man na mipela kisim bikpela mani liklik, olsem na mipela inap baim wanpela haus i stap namel long taun. Mipela wokim nupela Haus Kingdom, tasol mipela i no dinau mani.
Mi Senisim Pasin Bilong Mi
Namel long 1950 na 1959 narapela bikpela senis i kamap long laip bilong mi. Jehova i helpim mi na mi lusim smok. Inap planti yia mi bin kaikai smok sampela taim. Mi no larim dispela samting i pasim mi long mekim wok bilong Jehova, tasol mi no lusim tru dispela pasin. Bel bilong mi i gat tok long dispela samting mi mekim, tasol long dispela taim ol i no tokaut strong long rong bilong dispela pasin i save bagarapim skin bilong man, olsem na mi smok yet. Mi no lusim.
Tasol bihain ol buk samting bilong Wastaua i tok, ‘man i save smok em i no ken mekim tok long pletfom.’ Nau mi kirap kaunim gen ol tok bilong Baibel long 2 Korin 7:1 na Rom 12:1, 2 na Provep 3:5, na mi save mi mas lusim pasin bilong smok. Mi stretim tingting bilong mi na mi beten long Jehova na em i helpim mi. Wantu mi lusim smok na mi lusim olgeta. Bihain mi no kirap gen long smok. Mi no gat laik moa long smok.—Hibru 4:16.
Jehova i blesim wok bilong mipela ol man bilong kamapim disaipel na liklik lain bilong mipela i go bikpela. Long 1967 i gat 100 manmeri ol i save autim tok long Wait Rok. Long dispela taim ai bilong mi i go tudak liklik na mi no inap draivim ka moa, olsem na pikinini meri bilong mipela wantaim man bilong em na ol tumbuna pikinini ol i tok mipela mas i go i stap long Witbe Ailan na i stap klostu long ol. Taim mipela i lusim ol gutpela pren bilong mipela long Wait Rok, mipela i bel hevi, tasol olgeta brata sista long nupela kongrigesen bilong mipela ol i mekim gut long mipela na kwiktaim mipela i gat planti pren moa. Meri bilong mi i dai long 1973; mitupela i marit inap 67 yia na marit bilong mipela i gutpela. Nau mi wetim em i kirap bek na i stap laip gen, no gat sik.
Tasol i gat planti samting mi mas tenkyu long Jehova long en—em i larim mi i stap na mi lukim ‘man nating i kamap planti olsem wan tausen na man i liklik em i kamap olsem wanpela bikpela lain’ Mi winim pinis planti krismas, tasol mi mekim yet wok elda na helpim ol brata sista long kongrigesen. Na mi save wok yet wantaim famili bilong mi long go long ol haus na autim tok na painim ol man i laik save long gutpela taim em bai senisim dispela taim nogut bilong nau. Tru tumas, Jehova i bin hariapim wok bilong em ‘long taim bilong en’ olsem em i tok promis pinis long mekim, na em i bin mekim gut long mi, long wanem mi bihainim tok bilong em.—Aisaia 60:22.