Stretpela Pasin Bilong Ol Tu i Makim Ol i Narapela Kain
WANPELA Witnes bilong Jehova i lukim kotpepa i stap long ka bilong em na em i bel hevi. Pepa i tok em i bin putim ka long ples i tambu long putim ka na em i mas baim kot inap 25 dola. Tasol em i pilim olsem dispela i no stret, long wanem long hap em i putim ka long en i no gat wanpela notis samting i tok i tambu long putim ka. Em i bilong narapela taun longwe, olsem na em i no inap i kam bek na apil long dispela kot. Olsem na em i kisim sampela piksa, olsem poto, bilong dispela hap em i bin putim ka long en bambai kot i ken save i no gat sampela notis samting bilong toksave long ol man olsem i tambu long putim ka long dispela hap. Na em i tokim wanpela pren bilong em, em tu i wanpela Witnes, long i go helpim em long kot.
Narapela Witnes hia i stori long ol samting i kamap taim em i go long dispela kot. Em i tok:
“Taim kot i singautim man i kam sanap long ai bilong jas, pastaim ol i tokim em long kolim nem na atres bilong em, na bihain em i mas mekim tok tru antap long mekim tok i tru tasol long kot. Kuskus bilong kot i tokim mi long kolim nem na atres bilong mi. Kuskus em i lapun man. Mi kolim pinis na nau kuskus i tokim mi long kolim gen atres. Mi tok: ‘124 Kolambia Haits.’ Em i save dispela em i atres bilong hetkota bilong Sosaiti Wastaua na ol Witnes Bilong Jehova. Olsem na em i tokim Jas: ‘Nau bai yu no gat hatwok. Dispela man em i wanpela Witnes Bilong Jehova. Ol Witnes i gutpela man. Ol i no save giaman! Ol i no inap giaman! Nogat tru! Lotu bilong ol i tambuim pasin giaman na ol i save bihainim tru dispela tambu. Mi no save long wanpela Witnes man o Witnes meri i bin mekim tok giaman. Ol i stretpela man. Planti taim mi lukim ol inap mekim liklik tok giaman na bai ol i no baim kot long putim ka long ples i tambu long putim, tasol ol i no mekim.’
“Bihain em i lukluk long mi na em i tok, ‘Mi save yu no ken mekim wanpela tok giaman, long wanem sapos yu mekim wanpela tok giaman, husat bai kirap nogut? Yu save?’ Mi tok: ‘Mi no save.’ Em i tok: ‘Sapos Jas Ratafot [bipo em i presiden bilong Sosaiti Wastaua] i stap laip yet, bai em i kirap nogut! Inap 47 yia bipo mi wok long pos ofis na mi save kisim ol pas i go givim long em. Mi save long ol Witnes Bilong Jehova taim lain bilong ol i no i go bikpela yet. Jas Ratafot em i man tru!’
“Em i mekim ol dispela tok, olsem na jas bilong kot em i no tokim mi long mekim tok tru antap. Em i tok tasol mi mas kamapim ol tok. Em i harim pinis na em i tok: ‘Dispela man i no gat asua.’”
Ol Witnes Bilong Jehova i laik “wokabaut stret long olgeta taim.” (Hibru 13:l8) Ol i save bihainim stretpela pasin na long dispela samting tu ol i stap narapela kain long ol manmeri bilong dispela graun.