Stap Gut Long God Em “i Save Lukim Ol Samting i Stap Hait”
“Beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim long yu.”—MATYU 6:6.
1, 2. Stori long wanpela samting i bin kamap na yumi ken save, sampela samting yumi ting ol narapela man i no save long en, tasol ol i save long en. (1 Samuel 21:7; 22:9)
SAMPELA yia bipo wanpela witnes bilong Jehova i telefon long susa bilong em long Long Ailan, Nu Yok. Susa i bilong narapela lotu, olsem na Witnes i tokim em long tok promis bilong God, olsem God i laik pinisim pasin nogut na kamapim bek paradais long graun. Tupela i toktok pinis na susa i putim telefon, nau Witnes i kirap nogut, long wanem wanpela nek i tok: “Wet pastaim, mi laik givim wanpela askim long yu.”
2 Em wanpela meri i wok long telefon. Em i bin harim ol tok Witnes i mekim. Long ol olpela telefon ol inap mekim olsem. Tru i no stret dispela meri i harim ol dispela tok na kampani bilong telefon i tambuim dispela pasin. Tasol Witnes i amamas long wanem ol tok dispela meri i harim i kirapim tingting bilong em. Witnes i stretim tok wantaim dispela meri bambai wanpela Witnes i ken i go lukim em. Taim Witnes i save wanpela meri i bin harim ol tok em i mekim long susa bilong em, em i kirap nogut, long wanem em i ting i no gat narapela man i harim. Tasol sampela taim narapela man i lukim o harim samting yumi ting em i stap hait.—Eklisiastis 10:20.
3. Olsem wanem ol Kristen i stap olsem long ai bilong olgeta man?
3 Ol Kristen tru i no save tingting planti long dispela samting, long wanem long olgeta taim ol i wok long i stap gut long God. Aposel Pol i tok, yumi stap “long ai bilong olgeta, ol ensel na ol man wantaim.” (1 Korin 4:9) Em i tingim wanpela pasin bilong ol Rom na em i tok olsem. Taim ol Rom i bung bilong lukim pait long ples bung, paslain long laspela pait ol i save rausim olgeta klos long skin bilong ol man bilong pait, em ol i bilong i dai, na ol i sanapim ol long ai bilong olgeta man. Yumi ol Kristen long nau, yumi tu yumi stap olsem long ai bilong olgeta man. Yumi stap long ai bilong ol man i no bilip—ol famili bilong yumi na ol wanwok na wanskul na ol manmeri i stap klostu. Ol dispela man i lukim pasin yumi mekim na ol i kisim gutpela tingting o tingting nogut long lotu Kristen.—1 Pita 2:12.
4. Sapos wanpela man i save ol narapela i lukim em, ating em bai mekim wanem?
4 Taim yumi save ol narapela man i lukim yumi, ating yumi strong, long bihainim gutpela pasin, olsem Pol i tok: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun.” (2 Korin 6:3) Yumi save ol narapela i lukim yumi na yumi strong long mekim pasin i stret. Tasol olsem wanem sapos ol man i no lukim yumi na wanpela traim i painim yumi? Bai yumi strong long bihainim ol lo Kristen o nogat?
God i No Save Lukim Skin Tasol
5. Ol samting ol hetman bilong ol Juda i mekim long ai bilong ol man na ol samting ol i mekim taim ol i no i stap long ai bilong ol man, olsem wanem dispela i narapela narapela kain?
5 Long taim bilong ol aposel, planti hetman bilong lotu Juda, ol i man bilong tupela maus. Long ausait, olsem long skin, ol i narapela kain man, na long insait, long bel, ol i narapela kain man. Jisas i mekim tok bilong em long maunten na em i tok: “Yupela lukaut. Yupela i no ken mekim ol gutpela gutpela pasin bilong yupela long ai bilong ol man, bai ol i lukim.” (Matyu 6:1, 2) Ol dispela hetman bilong lotu i olsem kap, em ausait bilong en i klin, tasol insait “pasin bilong stil na bihainim laik bilong bodi” i pulap. Ol i olsem “matmat ol i bin penim long waitpela pen. Ausait em i naispela bilong lukim, tasol long insait i pulap long bun bilong daiman na long olgeta samting i doti.”—Matyu 23:25-28; skelim wantaim Sam 26:4.
6. Jehova inap lukim wanem samting bilong yumi?
6 Dispela tok i mas helpim yumi long save, Jehova i no tingim tasol ol samting yumi mekim na ol narapela man inap lukim. Nogat. Jisas i tok: “Taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim long yu.” (Matyu 6:6) Tru tumas, God inap harim ol beten yumi mekim taim yumi stap longwe long ol narapela man. God inap lukim olgeta samting. Em inap lukim man taim em i stap blut yet long bel bilong mama, na em inap save long ol pasin dispela man i kisim long papamama na wanem kain pasin bihain bai em i bihainim. (Sam 139:15, 16; Jenesis 25:23) Em inap save long olgeta tingting i stap hait long bel bilong yumi. (1 Samuel 16:7; 1 King 8:39; Jeremaia 17:10; Aposel 1:24) Orait, dispela samting i mas mekim wanem long yumi?
7. Ating Kristen i mas mekim wanem na bai em i kamap gutpela Kristen moa?
7 Bilong kamap wanpela Kristen tru, yumi bin lusim kain kain pasin nogut bipo yumi mekim, wankain olsem ol Kristen bilong pastaim. (1 Korin 6:9-11; Aposel 26:20; 1 Pita 4:1-4) Tasol olsem wanem long ol pasin nogut o pasin kranki yumi mekim na ol narapela man i no save long en? Maski ol narapela man i no save long en, tasol yumi no ken ting ol dispela pasin nogut yumi mekim i samting nating. Devit i tok: “Bai mi kilim i dai man i save [hait na] tok baksait long ol arapela man. Na bai mi no larim ol bikhet man i stap.” (Sam 101:5) Maski man i mekim tok baksait long pasin hait, o em i mekim long wanpela man tasol, tasol em i gat rong. Olsem na Devit i no ken orait long dispela rong ‘i stap hait.’
8. Olsem wanem yumi save Jehova i lukim pasin nogut yumi mekim maski yumi mekim olsem long ples hait?
8 Na man i mekim rong em i no ken giamanim bel bilong em na ting God i no save. God “i save lukim ol samting i stap hait.” God i laik bai ol man i mas i stap gut long lo bilong em maski ol narapela man i lukim ol samting ol i mekim o ol i no lukim. Yu tingim Ekan? God i tok ol Isrel i mas bagarapim Jeriko na ol man bilong Jeriko, em ol i man nogut tru. Tasol olgeta mani silva na gol samting ol i kisim long Jeriko ol i mas givim long haus mani bilong Jehova. (Josua 6:17-19) Tasol Ekan i pundaun long traim. Em i kisim wanpela naispela klos na sampela mani silva na gol. Em i haitim long haus sel bilong em. Em i ting i no gat wanpela man i save. Tasol yu ting em i giamanim dispela Man “i save lukim ol samting i stap hait”? Nogat. God i lukim ol samting Ekan i mekim na em i kamapim long ples klia rong bilong Ekan, na Ekan wantaim olgeta wanhaus bilong em ol i dai.—Josua 7:1, 16-26.
9. Yumi mas mekim wanem na bai God i ken orait long yumi?
9 Ilaihu i stori gut long Jehova, olsem: “Ai bilong em i save lukim pasin bilong man, na em i lukim olgeta wokabaut bilong man. I no gat wanpela ples tudak ol man i mekim pasin nogut ol i ken hait long en.” (Jop 34:21, 22, NW) Olsem na sapos yumi laik bai God Jehova i ken orait long yumi, yumi mas bihainim ol lo bilong em long olgeta taim—taim yumi save ol narapela man i lukim yumi na taim yumi ting ol samting yumi mekim i stap hait. Long olgeta taim ‘ai bilong God i save lukim pasin bilong man.’
10. (a) Pol i mekim wanem na em i makim gutpela pasin yumi ken bihainim long ol pasin i stap hait? (b) I gat wanem ol traim inap painim yumi?
10 Sampela taim traim i painim Kristen taim ol wanlotu bilong em i no lukim em. Kain traim olsem i painim Pol taim em i stap kalabus. Ol Juda i sutim tok long em na ol i tok, em i “kirapim kros na pait namel long olgeta Juda,” na em i “traim long mekim doti long tempel tu.” (Aposel 24:1-6) Pol i kot long bikpela man bilong Rom, nem bilong em Filiks. Ol man i tok dispela man em i pamukman na man bilong hatpela pasin. Pol i tokim Filiks em i no gat asua, tasol Filiks i pasim Pol long kalabus, long wanem “em i ting bai Pol i givim sampela mani long em.” (Aposel 24:10-21, 26) Aposel Pol i save long tok bilong Baibel i tok, yumi no ken grisim man long mani bai em i giaman long kot, tasol Pol inap ting olsem sapos em i givim sampela mani long Filiks bai em inap lusim kalabus na mekim wok bilong God. Sapos em i grisim Filiks long mani, bai ol narapela man i no save, olsem na Pol i no ken tingting planti long pundaunim ol. (Eksodas 23:8; Sam 15:1, 5; Provep 17:23) Tasol Pol i no pundaun long dispela traim. Ol narapela kain traim olsem i bin painim planti manmeri bilong Jehova nau long taim bilong yumi. Traim i bin painim ol long lo bilong God long blut, na long pasin bilong pilai long skin bilong ol yet, na long pasin bilong dring planti tumas. Orait, nau yumi ken stori long olsem wanem kain traim olsem inap painim yu wantaim famili bilong yu.
Traim long Lo Bilong Blut
11. 1 gat wanem as na ol Kristen i no save kisim blut?
11 Lo bilong God long blut i no nupela lo na Baibel i kolim klia dispela lo. Long rot bilong wanpela tumbuna bilong yumi olgeta, em Noa, Jehova i givim lo long olgeta man, olsem: “Wanpela samting tasol yupela i no ken kaikai, em mit i gat planti blut yet long en, long wanem blut em i as bilong laip.” (Jenesis 9:4) Lo bilong Moses tu i tokaut klia olsem blut em i samting holi, long wanem i makim laip God i givim. Ol i ken mekim wok long blut bilong mekim ofa long alta, tasol ol i no ken mekim narapela wok long en. ‘Ol i mas kapsaitim long graun olsem wara.’ (Levitikas 17:11-14; Diuteronomi 12:23-25) Olsem wanem taim Lo bilong Moses i pinis? Dispela lo olsem yumi no ken kisim blut bilong helpim yumi long i stap laip, dispela tambu i stap yet? Em i stap yet! Taim kaunsil bilong ol Kristen i bung, em ol aposel na hetman (ol i olsem lain bilong bosim ol Kristen), ol i pasim tok olsem: Ol Kristen i mas klia ‘long pasin bilong lotuim god giaman, na long pasin pamuk, na long abus ol man i pasim nek bilong en na i dai [long wanem blut i stap yet long en], na long blut.’ Sapos ol i mekim nabaut long blut, ol i gat bikpela rong wankain olsem ol i mekim pasin pamuk.—Aposel 15:20, 21, 28, 29.
12.Ol Kristen bilong pastaim i mekim wanem long blut?
12 Ol Kristen bilong pastaim i bihainim lo bilong God long blut. Sampela man long taim bilong ol, ol i save dring blut bilong ol strongpela man bilong pait. Ol i ting dispela inap oraitim sik epilepsi. Tasol ol Kristen i no mekim olsem. Na ol Kristen i no save kisim kaikai i gat blut long en maski ol man i kilim ol i dai wantaim pikinini bilong ol. Bihain long taim bilong ol, sampela saveman bilong lotu na sampela man moa, ol i tokaut olsem ol Kristen i aninit long lo bilong God i tambuim ol long kisim blut bilong helpim ol long i stap laip.
13. (a) Wanem samting inap kamap na ating traim bai painim yu long blut? (b) I gat wanem bikpela samting na ol Kristen i no save kisim blut na yumi mas tingim dispela samting?
13 Long taim bilong yumi, ol dokta i kirap mekim bikpela wok long blut—ol i save givim long ol sikman. Traim inap painim Kristen long dispela samting. Ating bai ol dokta na nes na sampela wanblut i strong long em i mas kisim blut. Tasol ol man i gat save ol i save pinis dispela pasin bilong givim blut em inap bagarapim man. Wanpela nius (Time bilong Novemba 5, 1984) i tok, ‘long olgeta yia 100,000 manmeri long Amerika i kisim sik hepataitas long blut ol dokta i givim long ol.’ Ol dokta i glasim blut, tasol i hatwok long ol i save samting bilong kamapim dispela sik i stap long blut o nogat. Na dispela nius i ripot long 6,500 manmeri ol i gat sik AIDS na sampela ol i bin kisim blut long haus sik. Ripot i tok: ‘Planti bilong dispela lain ol i dai pinis, ating klostu olgeta bai dai.’ Tasol ol Witnes Bilong Jehova i no pret long kisim sik na ol i sakim blut. Nogat. Maski ol dokta inap glasim gut blut na ol i tok blut i no gat sik long en na i no ken bagarapim man, tasol ol Witnes i no save kisim, long wanem Baibel, em Tok Bilong God, i givim lo long yumi, olsem: ‘Yupela i mas klia long blut.’—Aposel 21:25.
14. Wanem traim long blut inap painim yu olsem long “ples hait”?
14 Tasol olsem wanem sapos yu gat sik na ol dokta i tok yu mas kisim blut, nogut yu dai? Bai yu tingim lo bilong God long blut, a? Na sapos sampela brata Kristen i stap wantaim yu, bai ol i strongim yu long bihainim dispela lo maski wanem samting inap painim yu. (Lukim Danyel 3:13-18.) Tasol olsem wanem sapos yu wanpela tasol i stap na wanpela dokta o jas i strong long tok yu mas kisim blut? Olsem wanem sapos em i tok em yet bai karim hevi bilong dispela long ai bilong God?
15. Sampela dokta na bikpela man ol i gat wanem tingting kranki long tingting bilong yumi long blut?
15 Ripot i kam long ol narapela narapela kantri i tok, sampela dokta na bikpela man bilong haus sik na jas ol i popaia na ol i ting, taim ol Witnes i stap long ai bilong ol narapela man, ol i strong long sakim blut, tasol taim ol i stap hait long ai bilong ol narapela man, na insait long bel bilong ol, ol i gat narapela kain tingting. Wanpela jas i skelim wanpela sista i no laik kisim blut na jas i popaia na tok olsem: ‘Bilip bilong dispela meri i no as bilong dispela hevi i bin kamap; nogat; as bilong en i olsem: Em i no laik sainim pepa na tok em i no ken kisim blut. Em i no gat tok long kisim blut, tasol em i no laik tokim ol dokta long givim blut long em.’ Dispela tok i no stret. Ol Witnes Bilong Jehova i strong long sainim ol pepa i tok ol i no laik kisim blut na sapos ol i dai ol dokta i no gat asua.
16. Sapos wanpela man i kam toktok wantaim yu na i no gat narapela man i stap na em i strong long yu mas kisim blut, yu mas tingim wanem samting?
16 Ating ol dokta na jas bai wok long kirapim yu long kisim blut, long wanem ol i lukim sampela man bilong ol narapela lotu ol i sakim wanpela kain marasin o pasin ol dokta i save mekim, tasol taim ol i stap hait long ai bilong ol narapela man, ol i orait long en. Sampela dokta o bikpela man bilong haus sik ol i tok, ol i save long wanpela Witnes em i orait long ol dokta i givim blut long em long pasin hait. Tasol sapos tru dispela samting i bin kamap, ating dispela man o meri i nupela man, nau tasol em i kirap long bung wantaim ol Witnes. Ol man i givim bel long God ol i save, maski ol i hait na kalapim lo bilong God, tasol God i save. Devit i mekim bikpela rong long samting bilong Batsiba na Uria, tasol Jehova i lukim olgeta samting em i mekim na Jehova i salim Netan i go givim tok long Devit, olsem: “Yu [Devit] bin mekim pasin nogut bilong yu long ples hait. Tasol mi bai bekim dispela pasin bilong yu long ples klia na olgeta Isrel bai lukim.” Bihain Devit i kisim hevi long dispela pasin nogut em i bin mekim long “ples hait,” olsem God i tok.—2 Samuel 11:27-12:12; 16:21.
17. (a) Sapos long pasin hait yu kisim blut, dispela inap nogutim ol narapela olsem wanem? (b) Stori long wanpela sista em i holimpas lo bilong God long blut taim em i stap long ai bilong ol man na taim ol narapela man i no lukim em. Na wanem samting i bin kamap?
17 Na sapos yu sori long ol brata Kristen bilong yu, taim ol man i laik subim yu long kalapim lo bilong God long blut, bai yu no pundaun na mekim long ples hait. Olsem wanem long dispela samting? Olsem: Sapos wanpela dokta o jas i laik subim yu long kisim blut long pasin hait, yu mas tingim bikpela hevi dispela samting inap givim long narapela Witnes bihain. Lukim dispela samting i bin kamap:
Sista Rodriges i gat sik. Bihain sik bilong em i go bikpela na dokta i tok, blut i lus insait long bel bilong em na em i mas i go kwiktaim long bikpela haus sik. Taim Sista Rodriges i kamap long haus sik, em i tokim ol nes samting: ‘Maski mi dai, mi no ken tru kisim blut.’ Taim ol nes i laik subim em long kisim blut na ol i tok sampela Witnes ol i bin kisim blut, Sista Rodriges i strong yet long tok, ‘Mi no ken kisim blut.’ Bikpela blut bilong dispela sista i lus na skin bilong em i no gat strong moa, olsem na sampela de bihain ol i putim em long Intensif-Ke. Nau haus sik i singautim wanpela jas bilong Sprim-Kot bilong dispela provins.
Sampela mun bihain dispela jas i mekim wanpela tok long 150 dokta ol i bung long dispela haus sik. Nem bilong tok bilong em i olsem: “Em Laip Bilong Husat?” Em tu i tok em i save long sampela man pastaim ol i sakim blut, tasol taim wanpela jas i kam, ol i kisim blut. Tasol olsem wanem long Sista Rodriges? Em i tok, em i bin toktok wantaim Sista Rodriges taim i no gat narapela man i stap na em i wok long kirapim em long kisim blut. Em i tok em bai raitim pepa bilong kot na tok Sista Rodriges i mas kisim blut na long dispela rot bai Sista Rodriges i no ken karim hevi, jas yet bai karim hevi bilong dispela. Orait, Sista Rodriges i mekim wanem? Jas i tokim ol dispela dokta i kam bung, olsem: ‘Skin bilong Misis Rodriges i no gat strong moa, tasol em i kirap strong na tokim mi, em i no ken tru kisim blut na mi mas lusim em.’ Olsem na jas i tok i no gat as bilong sakim laik bilong em na raitim pepa bilong kot na tok em i mas kisim blut.
18. Yumi mas tokaut klia olsem wanem long tingting bilong yumi long blut? Na ating wanem samting bai kamap?
18 Olsem na yumi mas tokaut klia olsem yumi no laik kisim blut na yumi no ken senisim tingting. Ol aposel i strong long bihainim lo bilong God, ol i tok: “Mipela i mas bihainim tok bilong God tasol. Mipela no ken bihainim tok bilong ol man.” (Aposel 5:29) Samting i painim Sista Rodriges i kamapim long ples klia olsem sapos wanpela Witnes i pundaun na lusim lo bilong God, dispela inap nogutim ol narapela. Sista Rodriges i gat sik na strong bilong skin bilong em i laik pinis, olsem na taim ol i tokim em sampela Witnes ol i bin kisim blut, dispela samting ating narapela Witnes i bin mekim hait em inap pundaunim dispela sista na bai em tu i kalapim lo bilong God na kisim blut. Tasol sapos em i mekim olsem, dispela samting i no hait long ai bilong “Jas bilong olgeta graun.” (Jenesis 18:25) Tasol gutpela tru, Sista Rodriges i sanap strong. Maski em i stap long ai bilong ol man o em i stap olsem hait, tasol em i strong long bihainim lo bilong God. Bihain, taim sik bilong em i pinis, em i tokim ol dispela dokta i bung olsem em bai wok strong yet long i stap gut long God na bihainim ol lo bilong em.
19. Oltaim yumi mas tingim wanem samting?
19 Yumi tu yumi mas i stap gut long God maski ol narapela man inap lukim yumi o nogat. Jehova i save amamas long ol man i stap gut long em na bihainim ol lo bilong em; em i save givim gutpela pe long ol. Na em bai bekim pe i stret long ol man i mekim pasin nogut—long ples klia o long ples hait—em ol i no holimpas ol lo bilong em. (Sam 51:6; Jop 34:24) Long pasin sori em i givim gutpela tok long yumi bilong helpim yumi long lusim ol pasin nogut yumi save mekim hait. Nau yumi ken skelim dispela samting.
Bai Yu Bekim Wanem Tok?
◻ God inap mekim wanem na dispela samting i mas bosim ol samting yumi mekim?
◻ Ol samting i painim Ekan i mas lainim yumi long wanem bikpela samting?
◻ Sapos long pasin hait wanpela Kristen i kalapim lo bilong God long blut, dispela inap nogutim husat?
◻ Yu mas tingim gut tingting bilong Jehova long blut na mekim wanem?
Piksa long pes 16]
Pasin wanpela Witnes i mekim inap helpim narapela Witnes bihain long i stap gut long God