Ripot long Wok Bilong Kingdom
Em i Painim Tok i Tru
BAIBEL i tok yumi ‘mas wok long painim Jehova, na singaut long em.’ (Aisaia 55:6) Jehova i tokim Solomon: “Sapos yu lukluk strong yu inap painim [Jehova].” 1 Kronikel 28:9, NW Wanpela yangpela meri long Finlan em i wok long painim Jehova, na em i kisim blesing.
Dispela yangpela meri em i bilong lotu bilong Finlan, na em i go long wanpela skul bilong lotu, long wanem em i laik kisim save long God. Tasol em i bel hevi, long wanem em i no kisim save long God. Taim em i stap long skul, ol i no save kaunim Baibel planti. Na pris i tokim em, em i no ken kaunim Baibel, long wanem sapos em i kaunim Baibel, dispela samting bai bagarapim tingting bilong em.
Tasol taim em i pinis long skul, em i save kaunim Baibel. Na em i save go long lotu, tasol dispela samting i no bin helpim em. Bihain em i go long lotu Pentikostal, na em i insait long dispela lotu. Ol i beten bilong helpim em na ol i tok nau em i gat bilip. Tasol em i no pilim olsem nau em i go klostu moa long God.
Em i raitim pas i go long wanpela lain (Gang and Street Service Centre) na askim ol long helpim em. Tasol ol i salim pas na givim wanpela namba bilong em i ring long telefon tasol. Taim em ring i go long dispela namba, wanpela man bilong lotu Metodis toktok wantaim em na mekim wanpela beten. Na dispela man i tokim em, maski em i bilong wanem wanem lotu, em samting nating, tasol em i no ken bung wantaim ol Witnes Bilong Jehova o ol Momon!
Em i go long wanpela lotu ol i kolim People’s Mission na ol i givim sampela pepa long em bilong tilim. Dispela pepa (Jehovah’s Witnesses, the Deception of the Time of the End) i daunim ol Witnes. Tasol dispela samting tu i no helpim em long kisim save long tok i tru o helpim em long painim as bilong sindaun bilong em.
Bihain em i go lukim smolmama bilong em. Smolmama i tokim em em i bilip olsem tok bilong ol Witnes Bilong Jehova i stret, na dispela yangpela meri i kirap nogut tru. Smolmama bilong em i kaunim sampela tok bilong Baibel i stori long laik bilong God long mekim dispela graun i kamap ples paradais, na em i givim dispela buk Tok i Tru i Bringim Man long Laip Oltaim long em. Dispela yangpela meri i tingting long kaunim dispela buk na painim ol popaia i stap long en—em i laik painim sampela tok i no stret, tasol nogat, em i kaunim dispela buk, na em i save dispela buk i kamapim tok i tru. Nau em i painim as bilong i stap bilong em. Em i raitim pas i go long lain i bin wokim dispela buk na tokim ol long salim wanpela man i kam helpim em. Tupela de bihain, tupela sista i mekim wok painia ol i kam kamap long haus bilong em. Ol i kirapim Baibel-stadi wantaim dispela meri, na em i kirap long i go long ol miting long Haus Kingdom. Taim em i go long ol miting, em i pilim tru gutpela pasin sori i stap namel long ol manmeri long miting. Em i stadi i go, na wanpela yia bihain em i kisim baptais, na em i kirap mekim wok painia na i go long “Skul Bilong Ol Painia.” Em i tok: “Nau mi inap i stap amamas” Em i wok long painim tok i tru na nau em i painim pinis.
Kain gutpela ekspiriens olsem i kamap planti tausen taim nau long dispela taim bilong yumi. Yumi stap long ‘taim bilong pinis’ na em i taim bilong Jisas, em Gutpela Wasman, em i wok long bungim ol “arapela sipsip” olsem em i tok long Jon 10:16. (Matyu 24:3) Olsem na olgeta man i wok long painim tok i tru na God i blesim ol, ol i ken i stap amamas.—Matyu 7:7.