Ripot Long Wok Bilong Kingdom
‘Man i Kisim Gutpela Tingting Em i Ken Amamas’
OL SAMTING i kamap long Korea i truim dispela tok bilong Baibel. (Sindaun 3:13) Long Korea ol Witnes Bilong Jehova i kamap planti tru, winim 71,000. Na planti bilong ol, olsem 42 pesen ol i save autim tok long olgeta de! Ol stori nau mipela laik kamapim i makim olsem ol man i wok long painim gutpela tingting i kam long God ol i save amamas.
Wanpela meri long Pusan em i bin i go long wanpela lotu ol i kolim Kristen inap 16 yia. Em i bin lukim planti pasin ol i mekim i no stret long tok bilong Baibel, olsem na em i kisim tingting olsem i no gat wanpela God i stap. Tasol em i lukim ol samting i makim olsem God i stap, olsem na em i beten askim God long helpim em long painim lotu i tru sapos i gat wanpela i stap. Em nau, wantu em i tingim ol Witnes Bilong Jehova, na em i save misin bilong em i nolaik tru long ol na i toksave long lain bilong en olsem ol i mas klia long ol, long wanem, ol dispela Witnes Bilong Jehova i no bilip long God Triwan, na bikpaia, na sampela bilip moa bilong ol misin. Meri i tingting: Ating dispela lain i trupela lotu? Wanpela meri i stap klostu long em i helpim em long painim Haus Kingdom. Long de bihain em i go long miting.
Em i kirap nogut long pasin ol i mekim long miting. Ol i no singaut singaut na singsing long narapela kain pasin olsem lotu bilong em i save mekim. Wanpela Witnes i orait long stadi wantaim em long Baibel, na namba wan stadi ol i mekim i go inap sampela aua, long wanem, em i gat planti askim. Long namba tu stadi em i tokaut olsem em bai lusim lotu bilong em na kamap wanpela Witnes. Em i tokim Witnes, em i no gat wok moa long kam stadi wantaim em—em i ken i go long ol miting tasol. Tasol Witnes i soim em, em i mas stadi long Baibel tu—em bikpela samting—nogut em i go long ol miting tasol. Em i orait long dispela na em i givim bel long stadi na bihain em i kisim baptais.
Nau em i amamas tru, long wanem, em i painim pinis gutpela tingting i kam long God tru, Jehova, na em inap tingting long i stap oltaim long nupela taim God bai kamapim long graun.
Kepten Bilong Ami i Lainim Tok i Tru
Meri bilong wanpela kepten bilong ami em i bin kisim baptais long 1962. Pastaim man bilong em i birua long lotu bilong em, tasol bihain em i no mekim moa. Orait, ol brata i stadi wantaim em, tasol em i save lusim stadi na bihain em i kirap stadi gen wantaim narapela brata, i go i go inap 28 yia. Em i go long sampela miting na kibung, tasol em i no ting tok i tru i bikpela samting em i mas tingim. Orait, long 1990 em wantaim meri bilong em i go long Japan na ol i go long wanpela kibung distrik. Nau em i putim gut yau long ol tok i kamap—bipo em i no bin mekim olsem. Em i kirap nogut long ol strongpela tok ol i mekim bilong kamapim rong bilong ol lotu giaman, tasol nau tingting bilong em i klia na em i save long pasin giaman bilong ol dispela lotu i tok ol i Kristen. Em i lukim lain bilong God long Japan i mekim stret ol samting na ol i stap amamas, wankain olsem em i bin lukim long Korea. Taim em i go bek long Korea em i kirap stadi long Baibel na bihain em i kisim baptais.
Orait, taim em i baptais pinis em i mekim wanem? Em i lusim bikpela wok bilong em long i stap presiden bilong wanpela haus pasindia bilong ol turis, na em i kirap autim tok bilong Baibel long olgeta de wantaim meri bilong em, olsem wok painia oltaim. Em i pilim olsem dispela wok em i bilong inapim dispela 28 yia i bin lus nating.
Nau em i save tru, dispela tok long Baibel olsem “man i kisim gutpela tingting na save, em i ken amamas,” dispela tok i makim em tu!