Ripot Long Wok Bilong Kingdom

Ol Sipsip Bilong Jisas i Save Harim Maus Bilong Em

WOK bilong autim tok i go bikpela long olgeta hap na Jehova, long rot bilong ol ensel, em i stiaim ol wokboi bilong em i go long ol man i gat pasin kain olsem sipsip. Ol i harim maus bilong Jisas na ol i lain long mekim wok bilong em, na bai ol inap kisim laip oltaim. Long Jon 10:​27, 28, Jisas i tok: “Ol sipsip bilong mi i save harim maus bilong mi, na mi save long ol, na ol i bihainim mi. Mi givim laip i stap gut oltaim oltaim long ol.” Long Madagaska, sampela man i gat gutpela bel i bin harim maus bilong Jisas, olsem:

Wanpela Witnes Bilong Jehova i givim sampela buk Yu Inap i Stap Oltaim Long Paradais Long Graun na buk Rot Bilong i Stap Amamas Taim Yu Yangpela Yet long dokta i kam lukim papa bilong em, taim papa i sik.

Dokta em i wanpela Talatala na em i biruaim ol Witnes. Tasol em i kaunim buk, na ol tok bilong Baibel long en em i skelim wantaim Baibel bilong em yet. Meri bilong em, em wanpela Katolik na em tu em i wanpela dokta, em i kaunim buk Yangpela inap tupela o 3-pela taim samting, long wanem em i tok, i olsem ol i bin raitim dispela buk bilong helpim em yet. Buk Stap Oltaim i kamapim sampela tok bilong Baibel bilong helpim ol man long save olsem wanem yia 1914 em i bikpela yia, na tupela i amamas tru long kisim dispela save. Dokta i lukim gen dispela Witnes, na Witnes i givim narapela buk long em (Life​—⁠How Did It Get Here? By Evolution or by Creation?), na em i stretim rot bilong i go lukim em wantaim meri bilong em bilong bekim sampela askim bilong ol. Em i kirapim Baibel-stadi wantaim tupela na 3-pela pikinini bilong ol. Ol i kisim kwik save long Baibel.

Bihain long namba wan stadi, famili olgeta i kirap long kam long ol miting long Haus Kingdom, na i no longtaim na ol i insait long Skul Bilong Wok Autim Tok. Pasin bilong ol pikinini i wok long i kamap gutpela. Long Baibel-stadi ol i kisim save olsem ol Kristen tru i no save mekim betde o Krismas o Ista samting, olsem na ol i no mekim moa. Maski ol i no lain yet long Baibel i tok wanem long blut, man ya i no laik givim blut bilong em bilong helpim wanpela wanblut. Bihain liklik, em i kisim klos bilong em bilong mekim karate na givim long wanpela man bilong samapim klos bilong ol pikinini long dispela laplap. Em i kukim olgeta nius na buk bilong em ol i stori long pasin bilong lukluk long ol sta bilong painim save. Tripela mun tasol bihain long ol i kirap long stadi, man tupela meri ol i lusim olpela lotu bilong ol na tokaut olsem ol i laik autim tok. Nau ol i baptais pinis.

◻ Wanpela meri long Tailan em i wok long painim tok i tru. Em i bilong lotu Buda, tasol em i no save givim bel long lotu bilong em, long wanem, em i lukim planti wanlotu ol i giaman long bihainim lotu bilong ol na ol i mangal long mani. Na tu, i gat sampela pasin bilong lotu em i no wanbel long en. Em i no amamas long ol dispela samting.

Orait, bihain wanpela meri i tokim em long traim kisim save long lotu Kristen na em i kisim em i go long haus lotu bilong ol Pentikostal. Taim ol i lotu i stap, meri i gat strongpela laik long lusim ol i go, long wanem, i gat bikpela pairap na olgeta manmeri i beten long strongpela nek. Em i no go gen long dispela haus lotu.

Bihain, em i go long lotu Katolik. Em i go planti taim na bihain em i kisim save olsem dispela lain tu ol i save giaman na mangal, na tu, pris i gat planti gutpela samting bilong skin. Em i no laikim ol dispela pasin na em i no go moa. Pris i laik save i gat wanem as na meri i lusim ol. Meri i toksave, na pris i tok bilas olsem: “Sapos yu laik insait long wanpela lotu i gat strongpela lo, orait, yu mas go long ol Witnes Bilong Jehova.” Meri i askim pris: “Ol i stap we?” Pris i tok: “Ol i stap klostu long ples bilong kaunsil bilong mekim gut wara.” Long de bihain em i go painim ol Witnes, nogat. Em i bel hevi, na olgeta taim em i tingim ol Witnes.

Wanpela de em i harim wanpela man long haus klostu long em i tok bilas long narapela, olsem: “I no longtaim, na bai yu kamap wanpela Witnes Bilong Jehova!” Meri i ran i go long dispela man na askim em: “I gat sampela Witnes Bilong Jehova i stap long dispela hap?” Man i tok “Yesa. Sampela bai kam long ol haus na autim tok. Bai yu inap luksave long ol​—⁠ol i save pasim klinpela klos na ol i bilas gut.” Meri i ran i go painim ol. Pastaim em i no lukim ol, tasol taim em i wokabaut i go bek long haus em i lukim tupela meri i bilas gut na ol i toktok wantaim wanpela man. Meri i askim tupela, “Yupela i Witnes Bilong Jehova?” Taim ol i tok “Yesa,” em i krai long tupela olsem: “Plis kam long haus bilong mi. Mi laik toktok wantaim yupela.”

Witnes i kirapim Baibel-stadi wantaim dispela meri, na maski ol famili i birua long em na tok bilas long em, meri ya i save kam long ol miting na autim tok long ol wanblut.

Tru tumas, Jisas i save pinis husat ol i sipsip bilong em, na em i wok long bungim ol i kam insait long lain bilong em na bai ol inap kisim laip long nupela taim i gat stretpela pasin long en.