Ripot Long Wok Bilong Kingdom
“God i Save Mekim Wankain Pasin Long Olgeta Manmeri”
INAP 19 handet yia i go pinis, aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Ol man bilong olgeta kain skin na lotu i kamap Witnes Bilong Jehova. Ol i laikim stretpela pasin, na ol i aninit long God. Jehova i amamas long olgeta kain man olsem i kam insait long lain bilong nupela taim, olsem wanpela meri long Sat.
Dispela meri i no amamas long lotu bilong em. Sampela yia bipo em i kisim buk Rot Bilong i Stap Amamas Taim Yu Yangpela Yet, em ol Witnes Bilong Jehova i wokim, na em i pilim tru ol gutpela tok i stap long en. Wanpela Witnes i kirapim Baibel-stadi wantaim em na em i no lusim wanpela stadi. Tasol taim Witnes i kirapim em long kam long ol miting long Haus Kingdom, em i no kam. Bilong wanem em i no kam? Man bilong meri i no pasim em long stadi, tasol em i no orait long em i ken i go long ol miting long Haus Kingdom.
Taim meri i laik go long kibung sekit, Witnes i lukautim stadi i soim program long man bilong meri na i stori long sampela gutpela tok i mas kamap long kibung. Man i orait long meri i go long “dispela wanpela taim tasol.” Em i go na em i laikim tru ol tok bilong kibung. Em i stori long man bilong em long ol samting em i bin lainim, na nau man i no pasim em moa long go long ol miting. Meri i lukim kongrigesen ol i bilong kain kain skin na narapela i tingim tru narapela, na dispela i kirapim tingting bilong em. Bihain em i go long kibung distrik na em i kirap nogut long lukim ol pikinini bilong em i sindaun long lek bilong ol Witnes bilong ol narapela kantri. Ol i givim kaikai long ol pikinini na sori long ol olsem ol i pikinini bilong ol yet. Dispela samting i mekim na nau em i tingting strong long bihainim ol tok em i lainim.
Tasol i gat sampela man i laik pasim em. Em meri bilong pret, tasol em i kirap long bekim sampela tok long ol miting na taim ol wanblut na wantok i mekim sampela tok bilong daunim em, em i no pret—em i sanap strong. Tru inap planti yia em i bin sindaun wantaim man bilong em, tasol tupela i no marit tru. Meri i laik stretim marit long gavman, tasol em bai tokim man bilong em olsem wanem? Em i beten strong long Jehova na nau em i toktok wantaim man. Man i tok em bai tingting gut pastaim, na bihain, tupela i marit long pasin bilong gavman.
Wanpela tambu meri i sindaun wantaim ol em i save putim planti hevi long ol, tasol man i sambai long meri bilong em. Bihain papa bilong man i kam stap wantaim ol. Em i tokim pikinini bilong em long katim marit, long wanem, meri i bin senisim lotu bilong em. Papa i tokim pikinini em bai baim nupela meri bilong em. Pikinini i tok: “Nogat, mi no ken mekim olsem. Meri bilong mi em i gutpela meri. Sapos em i laik go, em samting bilong em, tasol mi no ken tokim em long go.” Meri i mekim gutpela pasin long tambu papa, na papa i sem long pasin em i bin mekim. Tasol taim em i go bek long ples, em i raitim pas long pikinini i tok, sapos em i no rausim meri bilong em, orait, em i no ken i stap pikinini moa bilong em. Man i sambai gen wantaim meri bilong em. Meri i amamas tru long lukim man bilong em i mekim olsem.
Nau tupela liklik pikinini man bilong tupela ol i amamas long go wantaim mama long Haus Kingdom. Tupela i lukim ol brata i mekim tok ol i pasim nektai, na ol i tokim papa ol tu i laik kisim nektai. Nau dispela meri i baptais pinis.
Em wanpela bilong ol 345 Witnes long Sat ol i amamas long autim gutnius bilong Kingdom bilong Jehova na ol i pilim tru olsem, tru tumas, “God i save mekim wankain pasin long olgeta manmeri.”