Ripot Long Wok Bilong Kingdom

Ol Gutpela Pasin i Litimapim Nem Bilong Jehova

LONG tok bilong em antap long maunten, Jisas i tokim ol disaipel bilong em olsem: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong papa bilong yupela i stap long heven.” (Matyu 5:​16) Olsem tasol, ol trupela Kristen bilong nau i mekim “ol gutpela pasin” bilong litimapim nem bilong Jehova.

Wanem ol dispela gutpela pasin? Wanpela em wok bilong autim gutnius, tasol gutpela pasin yumi mekim em i bikpela samting tu. Planti taim gutpela pasin bilong yumi i save pulim ol manmeri i kam long kongrigesen Kristen. Ol ekspiriens long ol paragraf daunbilo i kamapim olsem wanem ol Witnes Bilong Jehova long Matinik i larim ‘lait bilong ol i lait long ai bilong ol manmeri.’

◻ Taim em i wok long autim tok long ol haus, wanpela Witnes bilong Jehova i go lukim wanpela meri Katolik. Inap 25 yia dispela meri i stap wantaim wanpela man, tasol tupela i no marit tru. Meri i save long ol tok ol Witnes Bilong Jehova i save skulim ol man long en, long wanem, 7-pela yia i go pinis em i bin kisim buk Yu Inap i Stap Oltaim Long Paradais Long Graun.a Dispela meri i tokim Witnes: “I gat planti lotu tumas. Mi no save bai mi bilip long wanem lotu namel long ol dispela lotu.” Dispela Witnes i stori long em olsem em inap painim tok i tru long Baibel tasol, na bilong painim tok i tru, em i mas stadi gut long Baibel, na em i mas beten askim God long givim spirit holi long em na soim rot long em.

Meri i laik stadi long Baibel tasol inap sampela taim em i no laik i go long ol miting long Haus Kingdom bilong ol Witnes Bilong Jehova. Bilong wanem? Long wanem, em i save sem. Tasol bihain, taim ol Witnes i singautim em i kam long Memorial bilong tingim i dai bilong Jisas, em i daunim pasin bilong em long sem na em i go long Memorial.

Samting i kirapim tru bel bilong em long dispela miting, em long Haus Kingdom i gat gutpela pasin sori i stap namel long ol brata na sista. Em i no bin pilim kain pasin pren olsem long haus lotu bilong em! Bihain long Memorial em i kirap long go long olgeta miting bilong ol Witnes Bilong Jehova long hap bilong em, na i no longtaim em i bin maritim tru dispela man em i bin stap wantaim em. Nau em i wanpela sista bilong kongrigesen i baptais pinis.

◻ Gutpela pasin bilong narapela Witnes i kamapim ol gutpela samting. Em i gat wanpela gutpela wok i gat namba long wanpela ofis. Ol i kisim wanpela man bilong ailan Reyunion long kam mekim wok, na sampela wokman ol i save lap nogut long em, long wanem, em i sotpela man. Man hia i kamap olsem samting bilong lap long en. Tasol long olgeta taim Witnes i save mekim gutpela pasin na tingim gut dispela man. I no longtaim na man hia i askim Witnes bilong wanem em i narapela kain long ol narapela wokman.

Witnes i tok em i bihainim gutpela pasin, long wanem, ol Witnes Bilong Jehova i bin lainim em long ol lo bilong Baibel. Na tu em i soim em ol tok bilong Baibel i stori long laik bilong God na nupela graun. Dispela man i orait long stadi long Baibel, em i kirap long go long ol miting Kristen, na em i maritim meri i bin stap wantaim em.

Bihain em i go bek long Reyunion. Long bipo em i bin hatwok tru long stap wantaim lain bilong em na famili bilong meri bilong em. Tasol nau ol i kirap nogut long gutpela pasin Kristen bilong em. Dispela man i baptais pinis na nau em i wanpela wokman bilong kongrigesen. Sampela long famili bilong em na meri wantaim tupela pikinini meri bilong em, ol tu i mekim wok pablisa insait long kongrigesen bilong autim gutnius bilong Kingdom bilong God.

[Futnot]