Ripot long Wok Bilong Kingdom
“Yupela i Mas i Stap Holi”
God i tokim ol Kristen: “Bipo yupela i no gat save, na yupela i stap long pasin bilong bel i kirap. Nau yupela i no ken bihainim dispela pasin moa. Nogat. God i singautim yupela pinis, em i holi. Olsem na yupela tu i mas i stap holi long olgeta wokabaut bilong yupela. Baibel i tok olsem: ‘Mi stap holi. Olsem na yupela tu i mas i stap holi.’” (1 Pita 1:14-16) Sapos yumi stap holi long olgeta wokabaut bilong yumi, planti taim dispela i kirapim ol narapela man long litimapim nem bilong God. (1 Pita 2:12) Long olgeta hap bilong graun long nau, planti man i kirap senisim pasin bilong ol bambai ol i ken bihainim dispela tok. Lukim ol dispela stori hia:
◻ Wanpela man bilong Ekwado i stadi wantaim wanpela Witnes, tasol bihain em i lusim stadi, long wanem dispela Witnes i mekim pasin pamuk na kongrigesen i rausim em. Tasol dispela man i pilim olsem em i sot long ol samting bilong spirit, olsem na em i kirap skelim sampela narapela lotu. Bihain em i kirap bihainim lotu Evanjelis, na bihain moa em i kamap wanpela pasto bilong dispela lotu. Tasol bel bilong em i kotim em, long wanem em i sindaun nating wantaim wanpela meri na em i no marit tru long dispela meri. Taim em i askim ol narapela pasto bilong lotu bilong em long dispela samting, ol i tokim em, em i no ken tingting planti. Tasol em i pilim olsem dispela i no stret, long wanem dispela Witnes i bin stadi wantaim em em i mekim wankain pasin na kongrigesen i rausim em. Em i no save bilong wanem misin bilong em i no krosim em long dispela pasin em i mekim. Bihain dispela meri em i sindaun wantaim em, em i bungim ol Witnes na em i kirap long stadi. Man tu i kirap long stadi. Nau tupela wantaim i save kam long ol miting, na ol i wok long kisim save long ol lo bilong Baibel, na ol i wok long stretim marit bilong ol bambai ol i ken mekim wok bilong Jehova na i stap holi long ai bilong Em.
◻ Wanpela Witnes i stori long narapela samting i bin kamap long Ekwado, em i tok: “Long Februeri 1984 wanpela meri i gat 40 samting krismas em i tokim mipela long stadi wantaim em.” Wanem samting i mekim na em i laik stadi? Brata bilong em i bin kamap wanpela Witnes Bilong Jehova na em i lukim gutpela pasin bilong em. Namba tu taim ol i stadi wantaim dispela meri ol i toktok liklik wantaim em long pasin bilong smok, long wanem em i gat hevi long dispela samting. Wanpela wik bihain, taim ol i go bilong stadi wantaim em, em i amamas na em i tokim ol, em i kisim save long tok bilong Baibel na nau em i lusim pinis smok! Em i gat narapela hevi tu—ol piksa bilong lotu long en ol i pulap long haus bilong em. Taim em i lukim tok bilong Diuteronomi 7:26 (NW ), em i kirap kukim olgeta dispela piksa long paia. Dispela ves i tok: “Yu no ken kisim wanpela samting Jehova i no laikim na kisim i kam insait long haus bilong yu . . . Jehova i makim bilong bagarap.”
Kirap long dispela taim na i kam inap long nau, em i no bin lusim wanpela miting. Liklik taim bihain em i winim nambawan bikpela hevi bilong em. Em i pinis long pren wantaim wanpela man em i marit long narapela meri. Nau long namba wan taim, em i stap amamas tru, long wanem bel bilong em i no kotim em moa na em inap mekim wok bilong Jehova. Em i kisim baptais long Epril 1985. Taim em i kisim baptais em i gat 4-pela Baibel-stadi. Em i tingting strong long kirap mekim wok painia, long wanem em i pilim olsem dispela em i nambawan gutpela rot bilong tenkyu long Jehova, em Jehova i bin helpim em na em i lusim ol pasin i no stret na nau i stap bilong em i gat as bilong en.
◻ Taim yumi bihainim pasin bilong God, gutpela samting i save kamap, olsem i bin kamap long wanpela skul bilong ol meri long Kenya. Ol skulmeri i save slip long skul na i gat 9-pela tisa ol i man. Wanpela tisa em i wanpela Witnes Bilong Jehova na gutpela pasin bilong em i kamap long ples klia. Long narapela narapela taim ol tisa i pamuk wantaim ol skulmeri na skul i rausim ol i go i go na bihain i gat wanpela tisa tasol i stap em i no bin mekim dispela pasin—em dispela tisa em i wanpela Witnes Bilong Jehova!
Tru tumas, ol manmeri i bin mekim pasin i no stret, ol inap senisim pasin bilong ol. Taim yumi “stap holi long olgeta wokabaut” bilong yumi, yumi litimapim nem bilong God long ai bilong ol man na yumi mekim Jehova i belgut. Na yumi inap kisim laip i stap oltaim.—Provep 27:11.
[Blok long pes 23]
“Long wanem mi Jehova, mi God bilong yupela; na yupela i mas mekim yupela yet i kamap klin na yupela i mas i stap holi, long wanem mi stap holi.”—Levitikas 11:44, NW.
[Blok long pes 23]
“Yumi mas rausim olgeta doti bilong bodi na bilong spirit, na i stap klin.”—2 Korin 7:1.